Daniel Uram 4

Babel mutuk sienyi Nebukadnezar biryi lengdera bitinyi dinyi mabmou uram deyok

4:1-33

1Babel mutuk weik sienyi Nebukadnezar biryi im dangna mutuk tukwe dangna mutuk nirya kuramnyi nang ab, yala yuk-yuk kuramnyi nang ab, uram yuk-yuk eramnyi nang nirya ab asi, nirya kekebting tenebwe ura, uram dobmouci, ato ebmou, “Sun nirya teleb ebsin! 2Er Imtamnyi bira Iya Erebdobnyi biryi ni dam asi, ‘Nai e,’ tenen dinyi ab, ilil tenen dinyi ab ukubdeibmanir to asi nukwansin. 3Er Imtamnyi biryi, ‘Nai e,’ tenen dinyi ukurur ara weik dinyi asi ukurur. Erci ilil tenen dinyi ukurur ara ukubman kumto dinyi ukurur. Er Imtamnyi biryi Iya Erebdob sienyi kibkwande ara kum danana kum kubkwande. Eda, Weik Sienyi kianci tok iya kubkwande. Erci, Iya Weik Sienyi kiboka taleanci dinyi ara, sun mabwe odei-odei baramingnyi ababyi iya talebmurubde binkwaming.

4Ni Babel weik sienyi, Nebukadnezar bira ni sienyi kiboka talebse ai dam ur mangkau asa ab, teleb-teleb asa ab akwe kuronun. 5Bok, uki tentok tum lukunda mabmase uca, lengdera deici aryi kunumna kunubdeibnou lengderanun mabse. A lengdera mabse ara, ‘Se nai e,’ tenen kanya bonun. 6Ura, ‘A lengdera kunubkwanir to lak ebdeibnunung,’ tenen Babel mutuk mirei bingni nang nirya nabse. 7Uca, anda yuk-yuk mirei bingna nang aryi ton lak erdeirina kum kubnei.

8Ato kubmase uca, Daniel ni dam yanmou. Daniel er si ara niryi ni kwemdeina si makmak si dobse. A si ara Beltsazar eboka si dobsinyi yanmou. Daniel bisi er Nai Iya Leknyi Kanya er kanya dam asi wekmou. Ba, niryi er dam asi ni lengdera mabmase to nukmase. Ura, ersi ton ato ebmase, 9‘A mi, Beltsazar kanda mirei bingni nang sun sienyi kurum. Kan dib tenebumci, molorumnyi Imtamnyi Kanya kan dam wa ikurur ati, kan walwal kum kubkwamakir. Eda, kanci ni lengdera nukeibkwamanirimca tenebman. Ati, ukura ni lengdera mabmanto asi nukwan ati kekerum. Ba, kanci a lengdera asi, “Ato dinyi kunubkwande ati a lengdera mabmarim,” eboka lak ebdeibnurum.’ 10Ni ai man sokon mabmase uca, lengdera deici aryi ato kuboka lak kibmar asi asing eibman. 11Tukwetam asi co tentok tikamwe. A co tikoka lobde weleamwe ara mikib sasiboka im si toamwe. Ba, a co dub tikoka asing dirdonongna ara im dangna tukwe dangna nirya asing eibmanto co asi tikamwe. 12A co bok ara iya telebto kuramwe. Ani, du ilinto yalingnamwe. Ba, a co du ara tukwetam lulungnande kamyoa nirya yiryangaramnyi. Ani, a co deyok dam ara tukwetam kurande kamyoa nirya sun man ai kiboka maramnyi. Maka ababyi a co taruk asi ai doramnyi. Ato kuboka a co aryi yuk-yuk kamyoa nirya sun yina yiboka kam kuramnyi asi asing eibman. 13Ani, a mabmonwe talak aryok ton diranwe uca, Imtamnyi uram eryuryangananyi, iya leknyi malaikat tentok imtam aryi kuboka yuryanmou. 14Ura, anyi biryi uram iboka ato ebmou,#4:14 Er Imtamnyi uram eryuryangananyi biryi er kwit yabwe yuk malaikat asi arukmou. Ara, co sirik kuma sienyi Nebukadnezar biti co likniboka ebmou. ‘A co nong asi kwebmunyi ura, a co taruk nirya sekokabmunci, a co bok asi kulubkiriboka, du ababyi dakoka yamyamubkabokdarur. Ba, a co deyok maraming kamyoa ab, maka ai a co dub donung dinyi ab ababyi daluboka yakdonokdarur! 15Bok, a co deyok sasa ara tukwe umbura a takdongobkwandarur. Ani, kat tabwe si besi tabwe ab, tembaga tabwe ab aryi a co sasa asi biribdongoboka, a mutuk wa dam murmuta kankan a taklobokamunyi ba, imtam aryi mo ceboka turubkwande. Ba, tukwetam kurur kamyoa nirya ab, maka yala nirya ab sun dinyi kibkwande. 16Ninyi kanya boranci dinyi ara takloboka yuk kamyoa borande kanya wengyankwande. Ba, er kanya ara kamyoa borande kanya akwe boanci tok asi kwalina tabaryi bisibkwande,’ ebmou. 17A uram ara nun Imtamnyi ai dam kalingnamib nang ab, beterdongon dinyi kum uca lek akwe kuraming nang ab aryi ato eboka uram sekwetebmab. Ba, sun ninyi nirya aryi ato tenebkwanung teneboka a uram sekwetebmab. Ara, ‘Er Iya Erebdobnyi bira mikib asa aryi ninyi aryi sienyi kiboka taleraming mutuk kalingdur. Ani, Erci, “Anyi bisi sienyi kimna teleb,” teneboka wibci to anyi bisi tingdeirirande. Ara, luknubdobnyi babyi, ninyi teleb babyi Er tenebmaci to wiboka tingdeirirande,’ ebkarebmanou. 18Nira a mutuk sienyi kunun, a mi Beltsazar, kanci ukura ni lengdera mabmanto asi, ‘Ato kunubkwande ati a lengdera mabmarim,’ ebnurum. Ni sienyi kiboka talebse mutuk nang etekdob bingna bikoka mirei bingna nang aryi, ‘Ato dinyi kunubkwankir ati a lengdera mabumwe,’ eboka lak ton kum ebnei. Ati, kanci ni lengdera mabse dinyi kunubkwande to asi lak ebdeibkwinirim. Ara, kan molorumnyi Imtamnyi Kanya ara kan kanyatam kukurur. Ati, ni lengdera kunubkwande to ara, dib lak ebkwamarim tenebman ati ebman,” ebmou.

19A mutuk sienyi Nebukadnezar biryi ato ebmou ura, Daniel eboka, Beltsazar eboka kimnaminyi bira, “Nai e,” tenebmouci, er kanyatam ilil kubmou ba, kweteblobmou. Uca, sienyi Nebukadnezar biryi ato ebmou, “A mi Beltsazar, a lengdera ab, a kunubkwande dinyi ab ati kan kanya, ‘Nai e,’ tenena mem. Ur lak ebkwamaruma!” ebmou. Ura, Beltsazar ebok, Daniel ebok kimnaminyi biryi ato ebmou, “Nai sienyi, kanci a mabmarim lengdera kunubkwande to ara ni ilil kubmanir, a lengdera kansi kunubkicei. Eda, kan mar ordana nang asi a lengdera kunubkwamote ara kikiman. 20Nai sienyi, a co tikoka lobde weleamwe ara mikib sasiboka im si toamwe. Ba, a co dub tikoka asing dirdonongna ara im dangna tukwe dangna nirya asing eibmanto co asi tikamwe. 21A co bok ara iya telebto kuramwe. Ani, du ilinto yalingnamwe. Ba, a co du ara tukwetam lulungnande kamyoa nirya yiryangaramnyi. Ani, a co deyok dam ara tukwetam kurande kamyoa nirya sun man ai kiboka maramnyi. Maka ababyi a co taruk asi ai doramnyi. Ato kuboka a co aryi yuk-yuk kamyoa nirya sun yina yiboka kam kuramnyi asi lengdera deici aryi asing eibmarim. 22Ara, nai sienyi, kan mining damnyi biti a lengdera mabdeibdanmarim. Ilila co ara kan sienyi kibumci, erebdandoka mikib asa aryi a mutuk im dangna tukwe dangna nirya talebumwe to ati lengdera mabmarim. 23Ani, nai sienyi, kanci dinmomwe uca, Imtamnyi uram erbananyi, iya leknyi tentok imtam aryi kuboka yuryanmou. Ura, erci ato ebmou, ‘A co nong asi kwebmunyi ura, a co taruk nirya sekokabmunci, a co bok asi kulubkiriboka du ababyi dakoka yamyamubkabokdarur. Ba, a co deyok maraming kamyoa ab, maka ai a co dub donung dinyi ab ababyi daluboka yakdonokdarur! Bok, a co deyok sasa ara tukwe ai a takdongobkwandarur. Ani, kat tabwe si besi tabwe ab, tembaga tabwe ab aryi biribdongoboka, a mutuk wa dam murmuta tingdanmaci asi biribdongobkwandarur. Tabwe biriboka a taklobokamunyi ba, imtam aryi mo doun sakoka turubkwande. Ani, tukwetam kurur kamyoa nirya ab tonkwa kubkwaming. Ura, anyi bisi ninyi kanya boranci dinyi ara takloboka, kamyoa borande kanya wengyankwande. Ba, er kanya ara kamyoa borande kanya akwe boanci tok asi kwalina tabaryi bisibkwande,’ ebmou. 24Ato ebmou dinyi kunubkwande to lak ena ara ato, ‘Nai sienyi, a lengdera ababyi kansi kunubkwankir to atikwe lengdera mabdeibdamwe. 25Nai sienyi kanda, aminda ara ninyi kankan kuraminyi asi yakdonokingnyi ba, yuk-yuk kamyoa kuramingnyi kankan mutuk asi bindoka kubkwandim. Ani, nai sienyi, kan yina ara bisam lembu aryi manmalya murmuta yibde kurande to kubkwandim. Ani, nai sienyi, kansi imtam aryi mo ceboka mo doun aryi tarikwankir. Ato kurankici tok asi kwalina tabaryi wengbinkwande. Ato kubkici ura, nai sienyi kanci ato tenebkwandim, “Er Iya Erebdobnyi bira ninyi sirik aryi sienyi kiboka taleraming dinyi nirya kalingdur. Ani, Imtamnyi biryi ninyi wiboka luknubdobnyi babyi, erebdobnyi babyi wa kareboka kalingdur,” ’ tenebkwandim to ati lengdera mabumwe. 26Ba, ‘Co deyok sasa ara tukwe ai a takdongobkwandarur. Ani, kat tabwe si besi tabwe ab, tembaga tabwe ab aryi biribdongoboka, a mutuk wa dam murmuta tingdanci asi biriblobkwandarur,’ ebmou dinyi ara ato ati mabumwe: Nai sienyi, kansi talyi ur kuraminyi ani, kan kanyitam aryi, ‘Im dangna tukwe dangna nirya ara dib Imtamnyi biryok taleboka kalingdur,’ tenebminyi ura, aminda tubto sienyi kibkwandim. Ati, a lengdera mabumwe. 27Nai sienyi, niryi kansi, ‘Ato kubde bankwandum,’ ebkwinkin dinyi asi, ‘Dib ebmanir,’ teneboka kunubde bana teleb. Aminda kanci malyi dinyi kunubde yangarum dinyi taklobminyi ura, telebto u dikum dinyi akwe kunubkwandum. Ani, bona kum nang asi boukwe kibde bankwandum. Ato dinyi asi kunuraminyi ura, aminda ababyi kan kanya kilkil asa kubde binkwandum,” ebmou.

28A dinyi nirya ara Babel mutuk sienyi Nebukadnezar bisi ukubde binamwe to lilibyi. 29A sienyi kubde baramwe ani, wala amolbaryi sirya bisibmou. Ura, uki tentok tum ara er sienyi kiboka Babel mutuk taleamuryi, kuramwe ai aruma dub welebmouci, im dub yangamna dam yibanmou. 30Yibanmouci, a sienyi Nebukadnezar biryi ato ebmou, “Niryi Babel mutuk nirya ilila ai dobde banunci, weik atei kibdeiboka talebse. Ara, ni mikib ab, ni sienyi kiboka talebse dinyi ab, ni si asi erebnou dinyi ab ara ni ukubmanyi biryi ukununa de!” ebde yibanmouci, ererdanmou. 31Bok, Babel sienyi a ererdanmou uram sengdona kum uca, lukdandoka imtam aryi uram ato ebmou. “Sienyi Nebukadnezar a, Kanci sienyi kiboka Babel mutuk talebumwe dinyi ara dobdan ake! 32Ati, kanda ninyi kankan kuboka sienyi kiamoumwe to kum. Eda, ukura bisam toto, kam toto, yuk kamyoa toto kankan asi kubkwindim. Kanda kwaning yiramoumwe to kum kubkwandim. Eda, malmalya murmuta asi yibde kubkwandim. Kwalina tabaryi ara manmalya murmuta asi bisam sapi kuna yibde kubkwandim. Yibde kuraminyi tok ani, kanci ato tenebkwandim, ‘Er Iya Erebdobnyi bira ninyi sirik aryi sienyi kiboka taleraming dinyi nirya kalingdur. Ani, Imtamnyi biryi ninyi wiboka, Erci, “Anyi bisi sienyi kibkwande,” tenebci to kuboka karerur. Ara, luknubdobnyi babyi, erebdobnyi babyi wa kareboka kalingdur,’ tenebkwandim,” ebmou. 33Ura, a uram kekedongou talak aryok sienyi Nebukadnezar a ebmou to kunubmou. Ara, Nebukadnezar sienyi kiamwe dinyi takloboka ninyi kankan kuramwe ara takloboka bai binmouci, bisam lembu kurande to malmalya murmuta bindoka yibde kuramwe. Ba, er nong deici asi mo ceboka taringnamwe. Ba, er otong ara cang doloboka sangnamwe ara maka bib otong ato kuamwe. Ani, er aluk cang ara maka yan burut ato kuamwe.

Babel mutuk sienyi Nebukadnezar biryi Imtamnyi bisi si weik ebmou uram deyok

4:34-37

34Ura, weik sienyi Nebukadnezar ato ebmou, “Ni Babel sienyi Nebukadnezar bisi Er Imtamnyi biryi bisam lembu borande kanya kibdeianou ba, kwalina tabaryi ara malmalya murmuta akwe yibde kuranse. Ani, Imtamnyi biryi suboka talak likeianou to kuboka kwalina tabaryi kubse. Ura, ni koukwe dam asi kanya sirik wengyanmanou. Ura, imtam dibweleboka Imtamnyi, Er Iya Erebdobnyi, Iya Kam Kururnyi bisi si weik eboka ato eboka molobmase, ‘Er Imtamnyi biryi sienyi kiboka talerur dinyi ara kum danana kum kurur. Eda, iya kurur aryi mabwe odei-odei nirya sien nang kiboka talebmurubde banung. 35Er Imtamnyi bisi tukwetam kunung nang aryi, “Malyi caknam tonyi bica,” tenenung. Erci, Er dam kuboka kalingnaming nang babyi, ninyi sirik babyi asi, “Ukubkun,” tenebmaci to kunurdeirirande. Er Imtamnyi biryi ukubmaci dinyi asi ninyi sirik aryi, “Ato kubmarim ara unato ati kubmarim do?” eboka tatabmanto kumnyi kurur. 36Ukura ni kanya teleb sirya ni koukwe dam wengyanmanir. Ani, ni sienyi kianse dinyi babyi, berengna kanya boboka ni sienyi kiboka a mutuk talebse dinyi babyi tubto wengyanmanir. Ba, ni amwetam kuboka wa inung nang ab, ni wa iraming weik nang ab aryi nisi tubto bororyanmanei. Ura, ni minob sienyi kiboka a mutuk taleanse dinyi tubto dobdobmase. Ura, minob sienyi kianse talak aryi ni mikib ibarya kuranou to ara bisibkaboka aminda sienyi kibmase talak ibarya ara ilinto ibarya dongobmanou.

37Ati, niryi Er Imtam Sienyi kiboka talebsounyi bisi si weik ereboka kisal dakdobman. Erci utotoa nirya ukurur dinyi ara iya dib kurur. Ani, Erci, teleb tenerur bisik ara dib dinyi kurur. Ani, Erci, erebdandoka wingdaraming nang asi luknurdeirirande ara dib ati kurur,’ eboka Imtamnyi bisi si weik ebmase,” Nebukadnezar biryi ato eboka ebmou.

Currently Selected:

Daniel Uram 4: MTG

Highlight

Copy

Compare