2Raja-raja Uram 2

Imtamnyi biryi nabi Elia bisi imtam bowelebinmou uram deyok

2:1-18

1Er Iya Erebdobnyi biryi Elia bisi ilila ibalya biriman aryi imtam bowelebinkwamou talak sirya dam kubmou. A talak aryi, Elia ab, Elisa ab ara Gilgal mutuk dam bisik noutam banmarei. 2Ura, Elia biryi Elisa bisi ato ebmou, “Er Iya Erebdobnyi biryi, ‘Betel atei yarum!’ ebmanir ati, Betel binan. Ati, niryi kansi molobmakin ara Gilgal atei a kurandum,” ebmou. Uca, Elisa biryi ersi ato ebmou, “Er Iya Erebdobnyi, iya kam kururnyi si deici aryi, kan kam kun dinyi ara niryi kansi kum deiblobkunun,” ebmou. Ba, sun tonkwa Betel atei binmarei. 3Ura, a tum aryok Betel atei dam banmarei bok, akatei kuramiryi nabi nang mer aryi Elisa bisi yandoka ato ebmai, “Kan nai Elia bira Er Iya Erebdobnyi biryi kan dam aryi imtam bowelebinkwamar. Ara, kan sirya bikmarim do?” Ebmai uca, “Nibabyi sirya bikman ati kilikokdarur!” ebmou. 4Ura, Elia biryi Elisa bisi ato ebmou, “Elisa, Betel atei a kurandum. Nira Er Iya Erebdobnyi biryi, ‘Yerikho mutuk birum!’ ebmanir ati, Yerikho binan,” ebmou. Uca, Elisa biryi Elia bisi ato ebmou, “Er Iya Erebdobnyi, iya kam kururnyi si deici aryi, niryi kan kam kun dinyi ara kum deiblobkunun,” ebmou. Ba, sun tonkwa Yerikho atei binmarei. 5Ura, a talak aryi, Yerikho atei kuramiryi nabi nang mer aryi, Elisa dam yandoka ersi ato ebmai, “Arub aryi Iya Erebdobnyi biryi kan nai imtam bowelebkwamar ara kan sirya bikmarim do?” Ebmai uca, erci sunsi ato ebmou, “Nibabyi sirya bikman ati, kilikokdarur!” ebmou.

6Ura, Elia biryi Elisa bisi ato ebmou, “Yerikho atei a kurandum, nira Iya Er Erebdobnyi biryi, ‘Me Yordan kin birum!’ ebmanir ati, me Yordan kin binan,” ebmou. Uca, Elisa biryi ersi ato ebmou, “Er Iya Erebdobnyi, iya kam kururnyi si deici aryi niryi kansi kum deiblobkunun,” ebmou. Ba, sun tonkwa me Yordan kin binkwamareici, anabmarei. 7Ani, me Yordan kin kubkub sirya bindoka tingbinmarei. Ba, sun nabi nang mer ninyi 50 baryi nang ara sun aminda bindoka dinmai uca, me Yordan kubkub o bindoka tikmarei asi eibmai. 8Ura, Elia biryi er ongon aling kwiriboka akub-akub ebtalebmouci, a me asi kulabmou. Ba, a me ara eitam-outam sekdobmou asi, noutam tukwe kib deici asi binmarei. 9Ba, a me kouboka otam sirya binmarei ura, Elia biryi Elisa bisi ato ebmou, “Niryi kansi takloboka, imtam kum welebinabnyi talak aryi, ‘Erci, a dinyi asi karebnute,’ tenerum dinyi ukuca ur molobdobdum ba, karebkwankin ati,” ebmou. Uca, Elisa biryi, “Kan mikib asi karebniminci, tubto tabakoka liki bitinyi karebnurum. Ara, sun Er Imtamnyi uram ermurun nang nabi nang asi karebumwe to kuboka karebnurum. Ba, niryi kan unubniryi, sun sienyi kiboka talebkwan,” ebmou. 10Uca, Elia biryi Elisa bisi ato ebmou, “Er Imtamnyi biryi imtam bowelebanici asi, asing eibniminyi ura, Imtamnyi biryi kan molobmarim dinyi karebkwamakiriryi. Asi, asing kum eibniminyi ura, Er Imtamnyi biryi kan molon dinyi kum karebkwamakiriryi,” ebmou. 11Ura, tuba sisikde banmarei bok, ninyi kongkong eboka borande keica, bisam kuda aryi borande kereta uk buk angmoua aryi yandoka sunsi yuk-yuk bokeibmou. Ura, weik kumwe ibalya deici aryi, Elia bisi imtam bobdakde welebdobmou. 12Asi, Elisa biryi sirya eibmouci, “Nai Elia, nai Elia! Israel mutuk nang asi mikib kuboka talebumci kalingdamoumwe! Bok, Nai ura, kan sirya bindobdim!” eboka uram ngwelekoka dobmou. Ura, Elisa urasin dam aryi Elia sirya bindobmou. Ba, Elisa biryi, “Elia boukwe, se,” tenen kanya bobmouci, er ongon aling kwiliklobmou. 13A sirya ura, Elia imtam welebanmouci, er ongon aling sakmoua asi Elisa biryi buluboka bobmou. Ura, anaboka tamuryanganmouci, me Yordan kubkub yandoka tikmou. 14Ura, Elia ongon aling bobmou aryi, a me deici yandoka kulabmouci, “Elia molorur Imtamnyi, Er Iya Erebdobnyi bira dantam do?” eboka a me asok asi kulabmou. Ba, a me eitam-outam sekdobmou ba, Elisa koubdaka bindobmou. 15Ba, Yerikho atei aryi nabi nang mer ara era mutuk aryi yani tikoka dinmaici, “Elia dam kurur Er Imtamnyi kanya ara Elisa biti kareboka binmar,” ebmai. Ebmaici, ersi yandoka sun yan ikdongoboka kibdobmai. 16Sirya kibdobmai ura, “A dibdesurum! Nun kan mabwe ninyi 50 baryi nang nirya ara mikib nang akwe. Ati, kan nai bira Er Iya Erebdobnyi Kanya aryi, yuk mutuk lu kum, yuk mutuk kon kum da boboka deiblobmar kum. Ati, sun a nang aryi kan nai ingkiringbinkwaming,” ebmai. Ebmai uca, Elisa biryi, “Kanci sunsi, ‘Ur ingkiringbindarur,’ ena mem!” ebmou. 17Ato ebmou cok, sun a 50 baryi nang aryi tuba ati, “Ingkiringbinkwayeb,” ebokabiryi, ersi alyi dakeibmai deyok aryi, “ ‘Ur ingkiringbindarur,’ ebdum,” ebmou. Ba, sun a 50 baryi mikib nang aryi bindoka uki winiryi maboka Elia ingkiringnamnyi bok, kum eibmai. 18Ura, a 50 baryi nang aryi tubto Yerikho atei Elisa kunmou dam tamuryanmai. Ba, erci sunsi ato ebmou, “Niryi sunsi, ‘Ingkiringbana mem!’ ara sirya ebmasounwe do?” ebmou.

Elisa biryi Yerikho atei me asi teleb kibdeibmou deyok

2:19-22

19Yerikho atei ninyi aryi Elisa bisi ato ebmai, “A dibderum! Kanci akatei nirya bukwe tok ara telebto asi sirya eibmarim. Bok, akatei me ara malyi deyok aryi, sun akatei nerabwe mi mundu boamingnyi ababyi, diboka kum deiroramingci, mi yongdeirirur,” eboka Elisa bisi ato ebkarebmai. 20Ba, akatei ninyi asi Elisa biryi, “Ukuryok me yin moyok asi to ena keica si garam a moyok bisik dikdongoboka boyandarur,” ebmou. Ura, erci akatei nang asi eboka arukmou to kuboka er dam boyanmai. 21Ura, akatei me u dam binmouci, a to en keica si garam a me ai dikdongobmou. Dikdongobmouci, ato ebmou, “Er Iya Erebdobnyi biryi ato ebmou, ‘Niryi a me asi sirya teleb me kibdeibne. Ati, a me aryi akatei ninyi dina dinyi ab, mi yongsinin dinyi ab ara aminda aryi ton kum kubkwande,’ ebmou,” Elisa biryi sun akatei nang asi ebmou. 22Akatei me asi iya teleb me kibdeibmou. Ara, Er Imtamnyi biryi Elisa deici aryi ebdeiamwe to kuboka kunubdeibmou. Akiryi a talak ababyi tuba telebto me kibwe.

Betel atei mabwe aryi, Elisa bisi kereboka ina ngilikmai deyok

2:23-25

23Nabi Elisa biryi ato kuboka sirya kubdeibmou. Ura, Yerikho atei aryi anabdobmouci, Betel atei yangaronmou. Bok, Betel atei kabir nang aryi sakweteboka, ina ngilikoka kerebmai. Ara, ato, “Dilonyi o welebarande, dilonyi o welebarande!” enmai. 24Ura, danguboka diramwe uca, erti a enmai mabwe eibmou. Eibmouci, Er Iya Erebdobnyi si deici aryi a mabwe mer asi submou. Ba, a mutuk bai bisam si beruang ner bitinyi aryi anabkaboka sun a 40 baryi ninyi mabwe nirya asi, oboka sun tub kwilik-kwilik ebkabokmou. 25Ura, akatei aryi kuboka Karmel mutuk kon dam yanmou. Ani, a mutuk kon aryi kuboka Samaria atei tamuroryanmou.

Currently Selected:

2Raja-raja Uram 2: MTG

Highlight

Copy

Compare