2Raja-raja Uram 1

Nabi Elia biryi sienyi Ahazia dimna deyok ati uram ebdeibmou deyok

1:1-18

1Ura, Israel mutuk sienyi Ahab sirya dibmou ura, Ahazia bira er nai Ahab unubmouci, Israel mutuk weik sienyi kibmou. A talak aryi sun Israel nang asi Moab nang aryi mar ibdeibmai. Ara, sun Moab nang aryi, “Israel nang ab tonkwa kuna ara nun li,” tenebmaici, mar ibdeibmai.

2Uki tentok tum aryi Samaria atei sienyi Ahazia bira er ai imtam ai aryi sakmouci, obmou ba, ilila dilaka sakmou. Ura, “Ekron nang molonung kwemdeina Baal-Zebub bisi, ‘Ni sakman ba, obmanir dilaka asi nibdobkwandaryok do? Kum nibdobkwande do?’ eboka asirbindarur,” ebmouci, er wa in nang asi bokeibmou. 3Ura, Er Iya Erebdobnyi uram eryuryangananyi si Malaikat Tuhan biryi Tisbe ateinyi Elia bisi yuryandoka ato ebmou. “Samaria atei sienyi biryi Ekron atei kwemdeina si Baal-Zebub asi, ‘Asirbindarur,’ eboka er wa in nang bokdonokmar. Ati, kanci bisik sekoka sunsi ato ebkwandum. Ara, ‘Israel atei ara Er Imtamnyi ton kum kurur ati, banmarum do?’ ebkwandum,” ebmou. 4Ba, Elia sun dam binmouci, sunsi ato ebmou, “Er Iya Erebdobnyi biryi sienyi biti ato ebdeibmar. Ara, ‘Kan obmakir ba, dilaka sakmakir ara kum nibkwankir, eda dibkwandim,’ ebdeibmar,” ebmou. Ato kuboka Elia biryi a nang dam asi sirya ebmou ura, tamuroryanmou.

5Ura, sienyi Ahazia er arukmou nang ara sirya er dam tamurbinmai. Ura, sienyi biryi sunsi ato eboka asibmou, “Unato ati ola tamuryanandum da?” ebmou. 6Uca, sunci sienyi bisi ato ebmai, “Bisik noutam banmab bok asi, sal tentok aryi bisik sekoka ato ebmasir, ‘Tamubokabmunci, sun arukmasir sienyi bisi ato ebkwandarur. Ara, “Er Iya Erebdobnyi biryi kansi ato ebmakir, ‘Israel mutuk ara Imtamnyi kum kurur ati, Ekron kwemdeina Baal-Zebub bisi asirbindarur eboka arukmasir do?’ Ani, tonda ato ebmakir, ‘Kan dilaka ara kum nibkwankir, eda lolorankici tok dibkwandim,’ ebmakir,” ebkwandarur,’ ara sal tentok aryi ebmar ba, yanmab,” ebmai. 7Ba, sienyi biryi sunsi ato eboka asibmou, “Dantonyi biryi sunsi bisik sekmasouci, a uram ebdeibmanir do?” ebmou. 8Uca, sunci ersi ato ebmai, “Bisam domba otong aling ongoboka, kambing kala aryi sabya deibmounyi biryi a uram ebdeibmakou,” ebmai. Uca, erci sunsi ato ebmou, “Ara, Tisbe ateinyi si nabi Elia biryi ebdeibmanir,” ebmou. 9Ebmou ura, er yin doun sienyi ab, er yin doun nang 50 baryi nang ab asi, “Elia borbindarur!” eboka arukmou. Ba, a yin doun nang aryi Elia mutuk kon dub ei kunmou asi welebinmai. Ura, yin doun sienyi biryi Elia bisi ato ebmou, “Se nai, Imtamnyi wa inanyi, sienyi Ahazia bira, ‘Yuryarur!’ ebmakir,” ebmou. 10Uca, Elia biryi a yin doun sienyi bisi ato ebmou, “Nira diba ati, Imtamnyi wa inanyi kuranyi ura, Imtamnyi uk imtam aryi yuryandoka kan ab, kan mabwe 50 baryi nang ab asi nirya uk yibkwamasir!” ebmou. Erdongou aryok, Er Imtamnyi uk imtam aryi yuryandoka er ab, er mabwe 50 baryi nang ab nirya asi yibmou.

11Ato kubmou ura, sienyi Ahazia biryi tubto yuk yin doun sienyi ab, yin doun nang ninyi 50 baryi nang ab asi arukmou. Ba, tubto Elia kunmou mutuk kon dam binmai. Ura, yin doun sienyi biryi Elia bisi ato ebmou, “Se nai, Imtamnyi wa inanyi, sienyi Ahazia bira, ‘Ola yuryarur!’ ebmakir,” ebmou. 12Bok, Elia biryi ersi ato ebmou, “Nira diba ati, Imtamnyi wa inanyi kuranyi ura, Imtamnyi uk imtam aryi yuryandoka kan ab, kan mabwe 50 baryi nang ab nirya asi yibkwamasir,” ebmou. Erdongou aryok Imtamnyi uk imtam aryi yuryandoka sun nirya asi yibmou. 13Ura, sienyi Ahazia biryi yuk yin doun sienyi ab, yin doun nang ninyi 50 baryi nang ab asi, tubto liki winiryi dinyi arukoka bokeibmou. Ba, sunci Elia bisi binmai. Binmaici, yin doun sienyi biryi boukwe to asa kuboka Elia bisi ato ebmou, “Nai, Imtamnyi wa inanyi, ni kam kun dinyi babyi, ni mabwe 50 baryi nang kam kun dinyi babyi ara kan urasin dam aryi iya dengna weik dinyi tenebsurum. 14Nai, sienyi Ahazia biryi yin doun nang bitinyi ab, sun mabwe 100 baryi nang ab yuma bokeibmou ba, yanmai nang asi Imtamnyi uk aryi yuryandoka nirya yibwe. Ato kubwe bok, a tum aryi ni kam kuron dinyi ara, ‘Dengna weik dinyi aca,’ tenebniminci, boukwe kibnurum,” ebmou.

15Ba, a talak aryok Malaikat Tuhan biryi Elia bisi ato ebmou, “Ahazia biti ilil kuna mem! Eda, kan ab, er yin doun nang ab tonkwa ur sienyi bisi yurbindarur,” ebmou. Ba, Elia anabdobmouci, yin doun nang ab tonkwa sienyi bisi binmai. 16Binmai ura, Elia biryi sienyi Ahazia bisi ato ebmou, “Iya Erebdobnyi biryi ato ebdeibmakir, ‘A obmakir ba, sakmakir dilaka ara kum nibkwankir, eda lolorankici tok asi dibkwandim.’ Ara, kanci Israel mutuk ara Er Imtamnyi kum kurana atonun, Ekron nang molonung kwemdeina Baal-Zebub asi, ‘A obmanir ba, dilaka sakmanir dilaka ara nibdobkwanir do?’ eboka kan wa in nang asi arukmoumwe deyok aryi, kanda Er Iya Erebdobnyi biryi, ‘Dibkwande!’ ebdeibmakir,” ebmou. 17Ba, sienyi sirya dibmou. Ara, Er Iya Erebdobnyi biryi Elia deici aryi minob ebdeiamwe to kuboka kunubmou. Ura, Yehuda yala nang sienyi Yosafat mi si Yoram sienyi kiboka taleamwe ara kwalina bitinyi wengbinmou. A tum aryok, Ahazia er weit si Yoram biryi ersi unuboka Israel mutuk sienyi kibmou. Ara, Ahazia mi ton kum deiamwe deyok aryi Yoram biryi sienyi kiboka talebmou.

18Ba, Ahazia biryi Israel mutuk sienyi kiboka taleamwe dinyi ab, er kubde yanamwe dinyi ara Israel mutuk sienyi kiboka minob talebde yanamnyi to ati liliboka sekeibwe kerek sengna umbura sirya a sekeibwe.

Currently Selected:

2Raja-raja Uram 1: MTG

Highlight

Copy

Compare