2Raja-raja Uram 3

Yoram biryi Moab atei nang asi mar bobmou uram deyok

3:1-27

1Weik sienyi Ahab mi Yoram biryi Samaria atei sienyi kiboka talebmou. Ara, Israel mutuk aryok asi, bokoka eitam doramnyi mutuk. Ara, Yosafat biryi Yehuda mutuk sienyi kiboka taleamwe talak aryi sienyi kibmou. Ba, Yosafat biryi Yehuda mutuk sienyi kiboka taleamwe ara kwalina 18 baryi taleamwe. Ba, Yoram biryi Samaria atei sienyi kiboka taleamwe ara kwalina amolbaryi taleamwe.

2Ba, sienyi Yoram biryi Er Iya Erebdobnyi urasintam asi iya malyi dinyi kuramwe. Bok, er nai ab, er kwin ab aryi malyi kurandei to kum kuramwe. Yoram biryi Baal kwemdeina molona ai ati, er nai biryi ikoka doamwe abyokomna asi dakoka bai donokamwe.

3Ato kuramwe bok, minob sienyi kiboka taleamunyi si Nebat mi Yerobeam biryi malyi dinyi kuramwe deyok aryi, sun Israel ninyi nirya asi malyi kun dinyi bobminikamwe. Asi, erci, “Mem,” eboka sengminingna kum kuamwe. Eda, er ab, sun Israel nang ab aryi tuba ati moloboka miliramnyi.

4Ninyi si Mesa biryi Moab atei sienyi kiboka tikamuryi, taleamwe. A taleamwe talak ara bisam domba ilinto taleramuryi, winiramwe. Ba, erci Israel mutuk sienyi bisi bisam domba mi 100.000 baryi ab, yim bisam domba otong bisam domba dinyi 100.000 baryi ab asi kwalina uki tentok maberekni tok dengnamwe. Ato kuramwe ara Israel sienyi biryi Moab atei nang asi mar boboka muna kibdongoamwe deyok aryi ato kuramwe.

5Bok, weik sienyi Ahab sirya dibmou talak aryi, Moab mutuk sienyi Mesa biryi Israel mutuk ukuryok sienyi Yoram bisi mar ibkalibmou.

6Bok, a tum ara Samaria atei sienyi Yoram bira er atei aryi anaboka Israel mutuk yin doun nang nirya asi bulubdeibokaburyi, “Ato kuboka mar boboka obkwanub,” eboka Moab yin doun nang asi kiknirdeirbinmou.

7Ani, a tum aryok erci Yehuda atei sienyi Yosafat bisi ninyi ton arukokaburyi, uram ebdeibmou. Ara, ato eboka ebdeibmou, “Moab mutuk sienyi biryi nisi mar ibdeibmanir! Ati, nun tonkwa antanibdaka Moab mutuk sienyi bisi mar bobtinimnyi do?” ebmou. Uca, Yosafat biryi ersi ato ebmou, “Yo, niryi kan ab tonkwa Moab sienyi bisi mar bobkwamanim. Ati, ni atei ninyi babyi kan atei ninyi babyi, tonda ni bisam kuda babyi kan bisam kuda babyi aryi bulubdeiboka ersi mar bobkwanim,” ebmou. 8Ani, tubto sienyi Yoram biryi ato eboka ersi asibmou, “Dantam bisik kuboka ibinkwanim do?” ebmou. Uca, sienyi Yosafat biryi ato ebmou, “Ara, yini mutuk Edom mutuk bisik kuboka ibinkwanim!” ebmou.

9Ba, Israel mutuk sienyi ab, Yehuda mutuk sienyi ab, Edom mutuk sienyi ab tonkwa binmai. Bok, sun a anabmaici, binkwamnyi ara yini mutuk bisik kuboka baramnyi. Ara, uki tabaryi binamnyi. Ba, sun yin doun nang yina kwaning babyi, me babyi kum daneibmaici, sun bona-bona bon bisam kuda ababyi kwaning ab, me ab ton kum yibkarebmai. 10Ura, Israel sienyi biryi ato ebmou, “Se, mem e. Er Imtamnyi biryi a bisik boyibasurur ara nun winiryi nang asi, ‘Moab atei sienyi biryi oboka muna kibdongobdura,’ tenen Er Iya Erebdobnyi biryi sirya moun yibsou arya!” ebmou. 11Uca, Yosafat biryi Yoram bisi ato eboka asibmou, “Akatei ara Imtamnyi uram ermurunanyi nabi bira da ton kum darib? Ba, er deici aryi Er Iya Erebdobnyi bisi, ‘Nunsi, Kan tenebmaminyi to kuboka lak kibdeibsurum,’ eboka molobdobkwayeb?” ebmou. Uca, Israel mutuk sienyi biti wa inanyi biryi Yosafat bisi ato ebmou, “Minob talak aryi Elia wa iramunyi Safat mi si nabi Elisa a kunmar,” ebmou. 12Uca, Yosafat biryi ersi ato ebmou, “Diba, anyi bira Er Iya Erebdobnyi uram ermurunanyi kurur,” ebmou.

Ura, Yosafat ab, Israel mutuk sienyi ab, Edom mutuk sienyi ab aryi Elisa bisi binmai. 13Ura, sunci Elisa bisi sirya binmai ba, Elisa biryi Israel sienyi Yoram bisi ato ebmou, “Nira kan kikimna anyi kuma. Ati, kan nai Ahab ab, kan kwin Izebel ab sun molorandei kwemdeina uram ermurun nang asi bindobdum,” ebmou. Uca, Israel sienyi Yoram biryi ersi ato ebmou, “Ato ening kum! Er Iya Erebdobnyi biryi nun a winiryi sien nang asi nabsou ara, ‘Moab atei nang taruk dam asi dobkarebkwamasir,’ ati nabsou,” ebmou.

14Uca, Elisa biryi Yoram bisi ato ebmou, “Dib en uram aryi Er Iya Erebdobnyi, imtam yin doun nang sienyi, iya kam kururnyi Ersi diba tenebsiryi, molonunyi si deici aryi niryi kan mambul kun dinyi asi kum milibkitinyi. Bok, ni sienyi Yosafat Yehuda mutuk sienyi deyok aryi sun winiryi sien nang asi milibkwan. 15Ati, ukuca kecapi onanyi borbinurum,” ebmou. Ba, mot sebkwamingiryi, oraming dinyi si kecapi onanyi boyanmou ba, onmou ura, Er Iya Erebdobnyi kanya aryi Elisa kanyatam asi wa ibmou.

16Ura, Elisa biryi, “Er Iya Erebdobnyi ato ebdeibmasir ara, ‘A mutuk lu me cebwe me kin asi, me yiban bisik wakdarur!’ ebdeibmasir,” ebmou. 17“Er Iya Erebdobnyi uram ara ato ebdeibwe, ‘Sunci kumwe ab, mo ab ton kum dobkwamarum. Bok, a mutuk lu ara me aryi langkibde ba, sun ab, sun obde yin bisam ab, kirim ab sun bona-bona bon bisam ab a me yibkwandum,’ ebkarebmou.

18A kubkwande dinyi ara Er Iya Erebdobnyi asing dam ara mitik dinyi kurur. Tonda, sun Moab ninyi ara Erci sun taruk dam karebkwansir,” ebmou. 19“Sunci Moab mutuk mitik-mitik atei nirya asi daluboka malyi kibminikwandum. Tonda, a mutuk teleb-teleb co nirya asi kwebkwandum. Tonda, a mutuk me u nirya tunibkwandum. Ani, tukwe teleb wa ibde yinunga nirya asi sunci keil aryi donokoka malyi kibsinibkwandum,” ebmou.

20A tum maberekoka belekuna kobdob ara sun Israel nang aryi Imtamnyi dama deiboka uk daramnyi talak aryi Edom tam aryi me yandokaburyi, akatei dingiboka langdibmou. 21Ba, Moab mutuk nang nirya aryi, “Sun sien nang winiryi ara mar boboka iyanganmasing,” en uram sirya kekebmai. Ura, ninyi on ya douboka obdanmanto nang nirya asi, “Mutuk wiliba asi kalingbindarur,” eboka bokeibdanmai. Ara, wisi-wisi nang nirya ababyi, “Ninyi kalingbindarur,” ebdeibdanmaici, kalingbinmai. 22A maberekoka berentam ara a wakmai ba, dingibmou me deici asi kiting sinarya donokmou. Ba, sun Moab nang aryi, “Me urasintam ara ining bol ato kubmar,” ebmai. 23Ura, sun kanya karyi asa aryi uram welekoka dobdanmaici, ato ebmai, “Ara, ining aca!” ebmai. “Ara, a winiryi sien nang ab, yin doun nang ab sun mamun obdanmai aryi kubmou. Akiryi ukura, sun Moab mutuk nang, sun bona-bona nirya malyi kibminikoka dobdobkwayeb!” ebmai. 24Bok, sunci sun Israel nang keis ol ai dam binmai uca, sun Israel mutuk nang aryi bukalabokabiryi, Moab mutuk nang asi kulablobmai ba, sun Moab atei nang nirya cungdoryanmai. Bok, sunci domyandokabiryi, Moab atei wengyanmaici, akatei nang nirya asi obminikmai.

25Ani, akatei dalubokabiryi, sun wa tukwe teleb ara keil doboka dalunmaia aryi malyi kiboka siklibmou. Sun me u nirya tunibminikoka, co teleb nirya asi kweboka malyi kibsinibmai. Eda, atei si Kir-Hareset demang taklobmai. Bok, akatei ara keil asi tabwe aryi biribdongoboka dona co biribdob nang yandoka keil dobnin yibinmai ba, akatei daluboka malyi kibminikmai. 26Ba, er Moab sienyi eibmouci, a ukunmaia asi er ilil weik kubmou ura, ninyi on ya doun nang 700 baryi nang bobokaburyi, “Edom sienyi yin doun nang tikmang bisik kuboka bindobkwan,” tenen binmou. Uca erci, “Ato kuboka bindobkwan,” tenebmou to kum bindobmou. 27Ura, er mi yuma mi asi sienyi kiboka er unubkwamwe mi doboka bobmou. Ura, boboka lika dub asi boyandoka Moab nang moloramnyi kwemdeina asi dama deiboka uk daboka molobmou. Ba, sun Israel nang aryi ato kubmoua asi eibmaici, ilil weik kubmou. Ura, sunci Moab sienyi bisi takloboka sun atei yuk-yuk binsekdobmai.

Currently Selected:

2Raja-raja Uram 3: MTG

Highlight

Copy

Compare