1Samuel Uram 1
1
Samuel deibmou deyok
1:1-28
1Mutuk si Efraim dam Ramataim-Zofim mutuk kon asi sal tentok kuramwe. A kuramunyi er si ara Elkana kuramwe. Ba, Elkana bira er nai si Yeroham biryi deiamwe. Yuma kobdob ara Efraim mutuknyi si Zuf biryi Tohu deiamwe. Tohu biryi Elihu deiamwe. Ba, Elihu biryi Yeroham deiamwe. Yeroham biryi Elkana deibmou. 2Anyi Elkana bira nerabwe bitinyi doamwe. Er nerabwe si ara Hana ab, Penina ab doamwe. Er nerabwe bintiniamwe uca, Penina bisi mi deiramwe. Ba, Hana bira mi ton kum deiramuryi, eda, mi you ner kuramwe. 3Ba, a nerabwe sun akenyi Elkana bira kwalina kwalibne tok ara Er Iya Erebdobnyi, imtam yin doun nang sienyi biti mutuk Silo dam dama deiboka tuba-tuba molorbaramwe. Ba, Silo dam ara Eli mabwe si Hofni ab, Pinehas ab asi Er Imtamnyi biti dama deirin ai wa in nang imam nang kiandeici, Imtamnyi ai wa irandei.
4Ba, Elkana biryi Er Imtamnyi biti dama deiboka uk dabde molonmaci tum ara a bisam domba dinatam kiboka er ner Penina ab, er nermabwe ab, er mabwe ab ati dinatam kimdeiriramwe. 5Uca, er ner Hana bira er kanyi deiriramwe bok, Er Iya Erebdobnyi biryi Hana bisi mi you ner kibdeiamwe deyok aryi ersi bisam kalimna tentok kareramwe. 6Ba, Hana bira mi you ner kuramwe ati, er ka Penina mi deiramwe ner biryi mar iramwe. Ba, Hana er kanya, “Se,” teneramwe. 7Kwalina o kwali-o kwali baramnyi talak nirya ara mi you ner iya tuba kuramwe. Hana bira tuba-tuba Er Iya Erebdobnyi ai baroramwe uca, er ka Penina biryi tuba-tuba durungnamwe. Ba, er ka Hana bira engena akwe tuba engeroramuryi, yina ton kum yiramwe. 8Ato kuramwe ura, er akenyi Elkana biryi ato ebmou, “Hana kanda unati engeronikwe kimdumci, yina kum yirum da? Kanda engen kanya akwe borum ara unati do? Ni mabwe sal takubaryi ati kanya deinun ara alib langlang to. Ucab, kansi kanyi deibkise ara iya ni noutama kobdob kurum,” ebmou.
9-10Uki tentok tum ara Er Iya Erebdobnyi biti dama deiboka molon ai Silo dam Elkana ab, er nerabwe mabwe ab dama deiboka molorbinmai. A talak ara Eli bira Silo dam Er Iya Erebdobnyi biti ninyi dama deirinanyi imam kiboka Imtamnyi ai wa inanyi kuramwe. Elkana ner Hana bira sun yina ab me ab sirya yibmai ura, Hana biryi Eli Er Iya Erebdobnyi biti dama deiboka molon ai abyokomna wiliboka bublan dam bukmou asi binmou. Ura, “Se,” tenen kanya aryi Er Iya Erebdobnyi bisi moloboka, isin dakeiboka-dakeiboka engebmou. 11Ura, Hana biryi Imtamnyi biti, “Niryi, aminda Kanti ukubkwankin,” en uram eboka ato ebmou. “Nai Iya Erebdobnyi, Kanda im ab, tukwe ab kiknibumnyi kurum. Kanci, ni kan wa in ner mambul kanya bonun dinyi asi, iya dib dibliliboka, ni molona kekebnurum. Kekebniminyi ura, sal mi tentok karebnurum. Ba, niryi a mi ara Kansi iya karebkwankin. Ba, a mi ara Imtamnyi Kanti wiboka karebkinyi ba, Kan mi kibci ura, Kan wa iya ibde binkwande. Ba, er otong ara otong komna but aryi er kisok otong asi mitik ton kum kalubdenkwaming,”#Bil. 6:5 ebmou. 12Ura, Hana bira Er Iya Erebdobnyi bisi molonmou ba, Eli bira a ner er si bambul akwe diblilibokmou. 13Hana Er Iya Erebdobnyi bisi molonmou ara er kanyatam aryok molonmou. Ba, er si bambul ara mormor enmou uca, er uram ara lak kum enmou. A deyok aryi Eli biryi ato tenebmou, “A ner ara walina talebmar,” tenebmou. 14Ura, erci ato ebmou, “A ner, dora walina talebmakir ati, takloboka birum,” ebmou. 15Uca, Hana biryi ato ebmou, “Nai, ni walina talebmanira kuma, eda nira mambul kanya weik bobde kunun ner kunun. Nira anggur babyi, yuk walina talen me babyi ton yinun ner kuma. Eda, ni mambul kanya bobmanci, ni tenen kanya Er Iya Erebdobnyi biti lak eboka molonman. 16Ni kanya, ‘Se,’ tenen dinyi weikto tenenun ba, ni kanya u yinurur aryi uki weikto molonman. Ati, nai, kanci, ‘A ner ara ner enkuma aryi kunmar,’ tenebniminyei,” ebmou. 17Ura, Eli biryi ato ebmou, “Teleb, ur birum! Nun Israel nang molonubnyi biryi kanci Ersi molobdobmarim to kunubdeibkwamakir,” ebmou. 18Ato ebmou uca, Hana biryi ato ebmou, “Teleb aryi ni kan wa irmilininto ner asi boukwe kimna dinyi karebnurum,” ebmou. Ura, a ner anaboka atei bindobmouci, urasin lengleng en asa aryi bindoka yina yibmou.
19Ura, er akenyi Elkana ab, er nerabwe mabwe ab mabmai ani, berekwe ura belekuna kobdob aryi Er Iya Erebdobnyi bisi kisok luknubdongoboka molobmai. Sirya molobmai ura, sun atei si Rama dam binmai. Binmai ura, Elkana er ner Hana ab kunmarei ura, Er Imtamnyi biryi Hana er molona sirya teneibmou ura, ersi mi karebmou. 20Ura, kwalina tentok sirya kwalibloboka talak ara Hana mundu bobmouci, sal deibmou. Sirya deibmou ura, er si ara, “Ni Iya Erebdobnyi bisi molobdobse ba, karebnou,” eboka a mi si Samuel dobmou.
21Kuramnyi ani, kwalina tentok Er Iya Erebdobnyi biti dama deirirban talak sirya berekmou ura, anyi Elkana ab, er ai ninyi nirya ab anaboka Er Iya Erebdobnyi biti dama deiboka uk darbinmai. Tonda, Er Iya Erebdobnyi biti, “Ukubkwankin,” eamwe dinyi ati, aminda er yuk dama deirbinkwamwe. 22Ati, Hana biryi er akenyi bisi ato ebmou, “Nira tonkwa kum binkub, eda ni mi deibaba debci ba, moum dakeibniryi aminda aryi Er Iya Erebdobnyi biti iniboka iya kamdeirbinkunyi uca binkwan. Ba, a mi er dibkwanda babyi, kam kubkwanda babyi Er Iya Erebdobnyi dam iya kubkwande,” ebmou. 23Ura, er akenyi Elkana biryi Hana bisi ato ebmou, “Ato ebmarim ura, kanci teleb tenebminyi to ur mi moum dakeibminci, Er Iya Erebdobnyi biryi ebdeibwe to kunuboka bobirum,” ebmou.
Ura, er ner Hana bira a mi moum dinibde kuramwe ani, moum sirya dakeibmou. 24Moum sirya dakeibmou ura, a mi ab, bisam sapi yim winiramwa kwalina winiryi kibmou bisam ab, roti kikniraming keica aling tentok ab, anggur du yung kin aling tentok ab boboka Iya Erebdobnyi ai Silo dam bobinmou. A mi ara iya mitik tuba bok iniboka bobinmou. 25Sirya bobinmou ura, a sapi oboka, a mi Er Imtamnyi ai wa inanyi Eli dam bobinmou. 26Bobinmou ura, Hana biryi ato ebmou, “Nai teleb, minob ni a yandoka kan dam tikmasiryi, Er Iya Erebdobnyi biti molonmase ner bikmanirim do? 27Ara, Er Iya Erebdobnyi biti, ‘Mi ton karebnurum,’ eboka molonmase. Ba, Er Iya Erebdobnyi biryi ni molobdobse to kunuboka a mi karebnou ba, a boyan. 28Ato kuboka molobse uca karebnou ati, a mi ara Er Imtamnyi biti iya karebne. A mi er dibkwanda babyi, kam kubkwanda babyi ara Er Iya Erebdobnyi Er taruk dam kubkwande,” ebmou. Ura, sun kisok luknubdongoboka Er Iya Erebdobnyi biti si weik eboka molobmai.
Currently Selected:
1Samuel Uram 1: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
