Rut Uram 4
4
Boas biryi Rut dobmou uram deyok
4:1-17
1Minob sun Israel nang ara sun uram sisingna ara atei wengyangan lika bublan dam asi sisingnamnyi. Ato aryi Boas bira uram sisikwamou ati, bindoka a sisingnamnyi ai bukmou. Asi, Boas biryi Rut bisi ebmounyi, sunsi lebdobmantonyi kobdoba mininga a yibau asi eibmou. Ura, Boas biryi anyi bisi ato ebmou, “Ni kwit a, kanda ni bukmana dam a buryarum. Ba, tonkwa a buknimiryi uram ton sisingkwanim,” ebmou. Ba, anyi er dam buryanmou ura, uram sisikmarei. 2Uram sisikmarei ura, Boas biryi sun Betlehem atei sien nang ninyi takubaryi nabmou. Ba, a sien nang yanmai ura, Boas biryi sunsi ato ebmou, “Uram deyok ton sisikwayeb ati, a bukdarur,” ebmou. Ba, sunbabyi a yandoka bukmai. 3Ura, Boas biryi er kwit Naomi ab Rut ab lebdobmantonyi kobdoba asi ato ebmou, “Ni kwit a, nun du Elimelekh dibunyi iramwe wa tukwe ara er doamwe ner Naomi Moab mutuk aryi tamuryauci, ‘Elimelekh iramwe wa ara yuk nang asi dekdobkwan,’ tenebmar. 4Ati, ni kanya teneibman dinyi asi kan dam asi ebkwaman ara kikiman kubkwamar. Ara, nira ato teneibman, ‘Elimelekh iramwe wa tukwe asi yuk yala nang aryi dekdobkwamang ara malyito kubkwamar.’ Ato ara kum kiknibkwamar. Eda, nun Elimelekh yala nang kobdoba er wa tukwe ibkwanim ara kikiman. Ati, ukuryok ara nun bitinyok kununum. Nunci nun du doamwe ner sulyi lebdobkwamanim ara kikiman. Ati, kan kum, ni kum aryi ersi lebkwanim. Bok, kansi ara diba ati Naomi bisi lebdobmantonyi kobdob kurum. Ba, kanci kum lebdobtum uca, nira unubmantonyi kunun. Ati, nun atei sien nang ab ton yuk nang a buluboka wekmang nang ab kekebkwaming ati, kan tenen dinyi lak ebokdum. Elimelekh doamwe ner Naomi bira kanci lebdobminci er tukwe ababyi kanci dekdobkwandim do, kum do? Kanci, ‘Ni kum lebdobkwan,’ tenebminyi ura, nisi ebdum. Kanci ersi kum lebminyi ura, nibabyi ersi lebmantonyi kunun ati, niryi Naomi bisi lebdobkwan,” ebmou. Ura, er kwit lebmantonyi kobdobanyi biryi, “Yo, teleb, niryi a tukwe dekoka abniryi Naomi bisi lebkwan,” ebmou. 5Uca, Boas biryi ersi ato ebmou, “Kanci Naomi er tukwe dekdobkwiminyi ura, Naomi er mi dibwe mi doamwe ner, Moab mutuk ner si Rut bibabyi youak dakwandum. Ara, ‘Ato kuboka Maklon dibunyi er yala kum dacei,’ teneboka a Moab ner asi doboka mi deibci mi ara Maklon mi kibkwandur,” ebmou. 6Ura, er kwit lebmantonyi kobdobanyi biryi, “Ato ebdim ura, ni kum lebkwan. Niryi nun kwit Maklon dibunyi biti mi deibnyi ba, a mi aryi a wa damnyi kibci asi, ni dekanyi tukwe wanikminiknicei ati, ni kum lebkwan. Eda, kanci unuboka Naomi bisi lebdum. Niryi ersi lebmanto bok ni kum lebkwan ati, kanci unuboka ersi lebdum,” ebmou. 7-8#Ul. 25:9-10 Ato ebmou cok, erci Boas bisi tubto ton ato ebmou, “Niryi Naomi tukwe kum dekwan. Ati, kanci ur dekdum. A deyok sirya lilibdeibmab ara ninyi nirya bikwaming ati, ni yan karuk kwiribdeibkwankin,” ebmouci, lebmantonyi kobdoba aryi er yan karuk dinatam dem kwiribtaleboka Boas biti karebmou. Lebmantonyi kobdoba aryi ukubmou to ara sun Israel nang minob ukuramnyi to aryi ukubmou. Ara, sun Israel nang ara ato kuramnyi, “A tukwe dengna deyok sirya lilibdeibmab,” eboka, sun yan karuk kwiribtaleboka a tukwe dekmananyi bisi karerdaramnyi.
9Kwiribdeibmou ura, Boas biryi sun akatei sien nang ab yuk nang a uram sisingna dam wekmai nang ab asi ato ebmou, “Ni nai yabwe, sun nirya a dinmasurum bok, arub aryi niryi Naomi bisi sun mabwe silib Elimelekh ab, Mahlon ab Kilyon ab aryi iramnyi wa ara ni sirya dekdobman, ara sun asing nirya eibmanurumci bikmanurum. 10Ani, Moab mutuk ner Maklon doamwe ner si Rut bibabyi ni Boas biryi youak dakdobkwan. Ba, nun atei nang ukuramib to kubkwan. Ara, aminda mi deibnimnyi ura, a mi ara Mahlon kisok deibdeibkwanim. Ba, Maklon iramwe wa nirya ara a mi aryi talebkwande mi deibkwanim. Ato kubnimnyi uca, ‘Maklon yala nang ara nun er yala nang kankan babyi nun atei nang kankan nirya babyi er yala kum danana kum kubkwandur,’ tenen ukubkwanim. A ukubkwanim dinyi ara sun a wekmarum nang nirya ara diboka liliboka bikmasurum,” ebmou. 11Ebmou ura, sun akatei sien nang ab, sun atei lika bublan dam a wekmai nang ab aryi, “Teleb, a deyok sirya kekebmab. Er Iya Erebdobnyi biryi kan dobkwandim ner asi kisal dangna teleb. Erci nun Israel nang nun tat yabwe Rahel ab, Lea ab asi kisal dangnamwe to, Erci ukuryok kan ner asi neiktoto kisal dangna teleb. Ba, nun tat yabwe aryi ninyi yubwa-yubwa deibmarei to, kan ner ababyi yaldakoka ninyi yubwa-yubwa deirina teleb. Ba, Boas kanda nun Efrata nang kankan bikdob kuna teleb. Ba, nun Betlehem atei nang nirya aryi, ‘Boas bira telebnyi kurur,’ eboka kisal dakdobkwaming teleb. 12Sunci deibkwandururum mabwe aryi yaldakwaming mabwe ara yubwa-yubwa ilinto kuna teleb. Ba, a mabwe aryi deirin mabwe ara Tamar biryi Yehuda biti deibkarebmou mi nun abwe Peres biryi er ner doboka deiamwe mabwe aryi yaldakamnyi ba, yubwa-yubwa kunub to kanbabyi neiktoto Er Iya Erebdobnyi biryi ukurdeikina teleb,” ebmai.
13A deyok sirya sisikmai ura, Boas biryi Rut bisi doboka er ner kibdobmou. Ba, Er Iya Erebdobnyi biryi kisal dakmou uca, Rut mi mundu boboka sal deibmou. 14A mi deibmou ati, sun Betlehem atei nerabwe aryi Naomi bisi ato ebmai, “Arub tum aryi kan kaibwe ner aryi kanti mi deibdeibmakir. Ati, Er Iya Erebdobnyi bisi si weik ena teleb. A deibdeibmakir mi aryi kansi kalikoka lebkwankir mi asi karebmakir. Ati, nun Israel nang kunuba kankan ara a deibmar mi deyok ati, nukde yibana teleb,” ebmai. 15Ura, tonda ato ebmai, “A deibmar mi aryi kansi kanya teleb kubdeibkwankir. Ani, kan wisi dandoka buminyi talak ara a mi aryi kansi kalikwankir. Kan kaibwe ner Rut biryi kansi boukwe weik bokurur deyok aryi kurande ati, a mi ara kanti deibdeibmakir. A ner aryi kanti teleb kibdeibmakir dinyi ara ninyi tabaryi mabwe aryi kansi teleb kibkwamakiting dinyi bisibkaboka iya weiktoto teleb kibdeibmakir,” ebmai.
16Ato ebmai ura, Naomi biryi Rut a deibmou mi dobtaleboka iribdobmouci, kalikdobmou. 17Asi, Naomi er ai dam nerabwe aryi Rut biryi deibmou mi si ara, “Obed,” dobmai. Ara, “Rut biryi Naomi biti ninyi sal deibkarebmar,” ebmaici, “Obed,” eboka si dobmai. A mi ara Isai er nai ba, Isai bira weik sienyi Daud er nai.
Weik sienyi Daud er abwe yabwe sun si liliboka kerek sengna uram deyok
4:18-22
18Boas er abwe kisok si ara Peres. Peres yala nang aryi yaldakoka mi deibmai uram ara ato, Peres biryi er mi si Hezron deibmou. 19Ba, Hezron biryi er mi si Ram deibmou. Ba, Ram biryi er mi si Aminadab deibmou. 20Ba, Aminadab biryi er mi si Nahason deibmou. Ba, Nahason biryi er mi si Salmon deibmou. 21Ba, Salmon biryi er mi Boas deibmou. Ba, Boas biryi er mi si Obed deibmou. 22Ba, Obed biryi er mi si Isai deibmou. Ba, Isai biryi sun Israel nang weik sienyi kibkwamunyi si Daud deibmou.
Currently Selected:
Rut Uram 4: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)