1Samuel Uram 2

Er Hana biryi Er Iya Erebdobnyi bisi si weik eboka molonmouci, kibdobmou deyok

2:1-10

1Ura, er Hana biryi ato eboka kibdobmou,

“Nai Iya Erebdobnyi, Kanci nisi lebdobmanirim.

Nisi li tenenunung nang asi malyi kibkwan ati, ni kanya kilkil kubmanir.

Ani, Nai Kan kurandim to dinyi aryi ni kanya kilkil kubdeibmanirim.

Ba, ni kanya kilkil mitik kum kubmanir.#Luk. 1:46-55

2Nai, Kanda malyi dinyi beterdongona kum uca, kait kanya borumnyi kurum. Kan kurum atonyi yuk nang da ton kum kunung.

Ani, Nai Kan Iya Erebdobnyi Kan kuruma atonyi ton yuk dinyi da ton kum kurur.

3Er Imtamnyi bira Er Iya Erebdobnyi kururci,

utotoa dinyi nirya biti lilirandanyi kurur ati,

sunci wingdana uram ebmunyei.

Ani, sun si bambul dam aryi durungna uram anabsicei.

4Ninyi on nang yin sirya bulakabmar.

Ba, mitang nang ara mikib kibkarebmar.

5Min talak yina ilinto yiramungwe ninyi ara ukura yina utan aryi yina ingkiringkwamang.

Ani, min talak yina bulung kuramungwe ninyi ara karyi asa aryi teleb asa kuronkwamang.

Ani, mi you nerabwe ara mabwe tabaryi deinkwamang.

Uca, mabwe ilinto yaldangnamingnyi nerabwe ara mi you nerabwe kuna, sun kikwe engebde kubkwaming.

6Er Iya Erebdobnyi bira ninyi dibdei bok, ninyi kam bukei bok, kimnanyi kurur.

Ani, ninyi din nang kankan dobkwetebokabne ani, tubto doronanyi kurur.

7Ani, Er Iya Erebdobnyi biryi bona bonanyi kibdeibokabci ani, bona bon kumnyi kimdeirurnyi kurur.

Ani, erebdeibokabci ani, luknurdeirongnanyi kurur.

8Er Iya Erebdobnyi bira sungsunga alibde kuroranci ba, ‘Malinyi,’ teneramingnyi bisi, ererdeirinanyi kurur.

Ani, mintal umbura wekmarinyi bisi lukeiboka, teleb asa kuramingnyi nang kankan dordeirirurnyi kurur.

Dobdeibci ura, erebdob sokon deici burdeirirurnyi kurur.

Er Iya Erebdobnyi bira tukwe amwetam yangabwa dinyi ab,

alibtam tukwe ab ara Er yan yanina kiknibwe deyok aryi ato kurur.

9Er uram tuba kunuraming nang yan yanina ara Erci kalingdur.

Ucab, Er uram kum kekerana ato kun nang ara kunuk kankan kuraming aryi dirbanung.

Ato kunung ara mikib weiktonyi nun taleanci aryi mikib doboka kum kunung.

10Er Iya Erebdobnyi uram yan yanirandinyi bira obminikwande.

Ura, suntiboka imtam aryi liman debkwande.

Ani, tukwetam dinyi nirya liliboka wenebde binmaci asi, im dangna tukwe dangna nirya liliboka wenebkwande.

Ukubci ura, Erci weik sienyi tentok wiboka tikeibci ura,

me kisok likeiboka mikib karebkwande,” ebmou.

Ato eboka, Hana biryi Er Iya Erebdobnyi bisi si weik ebmou.

Er Eli mabwe aryi malyi dinyi kunuramnyi deyok

2:11-26

11Er Elkana ab, er nerabwe ab a mutuk aryi kuboka sun atei Rama dam binmai. Ucab, a mi Samuel bira Er Iya Erebdobnyi wa irmilinanyi kibmou. Ba, Eli akai dama deiboka wa inanyi imam biryi eterenkwamwe ati takloboka binmou.

12Eli er mabwe ara Er Iya Erebdobnyi bisi ilil kuna kum uca, dakbisiboka malyito dinyi kunurandei. Ara, Er Iya Erebdobnyi ai wa in nang imam nang wa asi sunci manmalirsinirandei. 13-14Er Iya Erebdobnyi dama deiriryanganmangiryi yubmangnyi bisam domba tub asi Eli mabwe sun nai iramwe wa irandei aryi yandoka te kwaleng bela aryi yun moyok toto, kuali toto, belanga toto, ani, co yung urun keica toto umbura yubmangnyi asi lukoka-lukoka dobde yirorandei. Sun Israel nang Silo dam yanmangiryi dama deibmangnya nirya ara te kwaleng bela aryi lukdongoboka, doboka erebdobmangnyi dinyi ara Er Imtamnyi ai wa inanyi imam dinyi kimdamnyi. 15Ani, bisam sapi kob dama deiboka, “Uk dabkub,” tenen kungnyi asi, Eli mabwe yandoka a dama deirabdinyi bisi ato erandei, “Nun nai, imam Eli bira youn dinyi ara kum yirande ati, yik deibmarum dinyi asi karebdarur,” erandei. 16Uca, a yandoka dama deinmarinyi biryi, “Minta ara ukubkwandarur eboka aruksou to kuboka uk dabnyi ba, sunti kiknibdeibsinyi dinyi asi, sun teleb kubsici to dobdobdurum,” ebingnyi bok asi, titik-titik eboka, “Ukuca karebnurum! Ola kum karebmaniminyi ura, kulabloboka dobdobkwaman,” erandei. 17Ato kurandei uca, Er Iya Erebdobnyi urasin dam sun malyito kunun dinyi ilinto kuramwe. Ara, a bitinyi kam nang sun kanya ara, “A dama deirinung ara kunkunya kununga,” tenerandei.

18Er Samuel bira Iya Erebdobnyi ai wa irmilinanyi kiboka akai wa iramwe. Samuel bira mitik mi tuba kuramuryi, er ongon aling ara Imtamnyi ai wa in nang ongoraming aling si efod ongoramwe. A ongoramwe ongon aling ara lenan aling aryi er kwin biryi wiramwe ba, ongororamwe. 19Kwalina kwalibdongobne tok ara er kwin ab er akenyi ab kwalina tentok dama deiboka moloryanmaringnyi tok ara er kwin biryi mitik dolengni ongon aling er kikib asi wiboka boyangaramwe. 20Ani, Er Iya Erebdobnyi biti dama yandoka deibmarei ura, Eli biryi sunsi ato eboka kisal dakmou, “Er Iya Erebdobnyi biryi a ner kan deici aryi mi yaldakdum. Ba, Er Iya Erebdobnyi biti karebdurumwe mi unubdobkwandurum,” eboka kisal dakmou. Sirya ukuboka kisal dakmou ura, sun atei bindobmarei. 21Ura, Er Iya Erebdobnyi biryi Hana bisi mi dein ner kibdeibmou ba, sal winiryi deibmou ura, nerabwe bitinyi deibmou. Ba, Samuel bira Er Imtamnyi ai wa iramwe ai aryi nong nebdoro baramwe ani, sirya nebdobmou.

22Ura, Eli bira sirya wis danmou. Ba, Eli kekenmaci uca, er mabwe aryi sun Israel nang asi malyito kimdongorandei. Ara, Er Imtamnyi ai bublan dam wa in nerabwe ab tonkwa manung ena kekeramwe. 23Ura, er mabwe asi ato ebmou, “Sun unati malyi dinyi kururum uca, Israel nang nirya aryi, ‘Kan mabwe ara malyito kururung,’ enunung da? 24A mabwe ato dinyi kununa mem se! Er Iya Erebdobnyi uram keken nang asi malyi dinyi bordongorurum asi kekebman! 25Ninyi mamun asi manmalirdongordarantibyi ura, Er Iya Erebdobnyi biryi lebdeibkwansute. Bok, malyi dinyi kunubmarinyi ab, Er Imtamnyi ab yu bordana ara unanyi biryi lebdeibkwansute do?” eboka wenebmou. Uca, Er Iya Erebdobnyi biryi, “A mabwe ara obkwan,” eboka minob kiknibdeiamwe aryi a bitinyi mabwe sun nai ebmou uram kum kekebmareici, kisok taba biribmarei.

26Ba, Samuel bira nebdoro baramwe ba, ninyi kanya babyi, Er Iya Erebdobnyi Kanya babyi, sun kanyi deiriramnyi.

Eli ab er mabwe silib ab asi ikin dinyi karebkwamwe ati, kunumna kunubdeibmou deyok

2:27-36

27Uki tentok tum aryi Er Iya Erebdobnyi uram ermurunanyi si nabi tentok yandoka Eli bisi ato ebmou, “Er Iya Erebdobnyi biryi ato ebmar, ‘Sun abwe Harun ab, er ai ninyi ab asi Mesir mutuk dam kuramnyi talak ara Firaun biryi arungnamwe ba, mambul weik il doramnyi. Ba, sun Israel nang kunuboka il doramnyi talak aryi Niryi sunsi lak kimdaranse ara bingdarur do? 28Ani, Niryi sun Israel yala ninyi nirya kankan aryi Harun yala nang asi, “Niti dama deiboka ni ai wa imam wa ibkwaming,” tenen wianse. Ani, “Ni dam aryi sunci Niti dama deirin keil lamna deici asi, Niti dama deiboka tong teleb co yung uk dan nang kiboka, Ni ai wa in nang imam nang ongon aling si efod ongobkwaming,” tenen wibmase. Ani, “Sun Israel ninyi nirya aryi Niti dama deibmaningnyi dinyi ara Harun ab er mabwe ab aryi, ton uk dabingnyi ura, tonda sun yibkwaming tenen,” sunti wibmase. 29Ucab, kanda unati Ni ebdeibse to kuboka, Niti bisam oboka uk dan dinyi ab, yina-yina Niti dama deiboka uk dabmangnyi dinyi ab asi caknam dinyi tenerum do? Kanci, Nira malyi kiboka kan mabwe ati, teleb-teleb dinyi ara sun tikwe yanlorum do? Niti dama deibmaningiryi, karebmaningnyi dinyi asi kan mundu dikde yirum ara malyito kurum. 30Nira sun Nai Iya Erebdobnyi Israel nang sun Nai kununyi biryi minob uca ato eanse, “Kan yala ninyi ab, kan mabwe ab ara Ni ai iya wa ibde binkwaming,” eanse. Ato eanse ucab, ukura a eanse dinyi kum kunubkwan. Ara, ato ati ebman, Ni kanya deianingnyi ninyi asi Nibabyi sunsi kanyi deibkwan. Ba, Nisi kanyi kum deianingnyi ninyi ara sunbabyi kanyi kum deibkwan. 31Kan mabwe kam nang ara Niryi obkiribnyi ba, dirsengkwaming. Kam kuna uki weikto nun kum kubkwaming ati bikandum. 32Ati, sun Israel nang yuk nang asi Niryi sunsi kisal dangna dinyi karebnyi ba, kan asing eibminci, kan kanya sukwankir. Ucab, kan mabwe kobdoba ara uki cang ton kum kubkwaming. Eda, minob dibsekwaming. 33Ucab, kan mi kobdoba sal tentok asi takdongobnyi ba, kam kurandiryi Ni ai wa inanyi kibkwande. Bok, anyi bira kib kum kubkwande eda asing kuandiryi, “Se,” tenen kanya akwe bobde kubkwande. Ba, kan mabwe yuk nang nirya ara obkiribkwaming.

34Niryi a ebne uram ara tola kum ebman, eda dib sirik ebman. Arub tum aryok kan mabwe Hofni ab, Pinehas ab dibkwinding asi asing eibkwindim. 35Ukubdingnyi ura, Ni teleb tenebmanyi to kuboka busul asa Niti dama deiboka Ni ai wa inkwanci imam asi wibkun. Wibnyi ura, ersi mabwe yaldangna dinyi karebnyi ba, yaldakoka sasibingiryi, ni ai wa aminda ababyi ibde binkwaming. Ba, sunci Ni wiboka me kisok likeibninyi bira weik sienyi dam aryi Niti dama deiboka, Ni ai wa ibde binkwaming. 36Ba, kan mabwe kam tuba kuramingnyi ninyi ara Ni ai wa irandinyi bisi yina ab, uang ab molorbindoka ato ebkwande. “Er Imtamnyi ai wa in sokon ni ton lobdeibnurum. Ba, Ni Imtamnyi ai wa ironiryi yina mitikanun karebnumunya yironkwan,” ebkwande.’ Ara, Er Imtamnyi biryi ato ebmar,” eboka, Er uram ermurunanyi nabi biryi ebmou.

Currently Selected:

1Samuel Uram 2: MTG

Highlight

Copy

Compare