1Tawarikh Uram 16
16
1Ura, Er Imtamnyi biryi, “Ukubdarur-Ukuna mem,” ebdeiamwe uram kerek sengna deirin co sangkol ara Daud biryi a co sangkol deirin ai, keis ol ai minob kikniboka doamwe ai deibmai. Ura, sunci Er Iya Erebdobnyi biti, bisam domba toto, sapi toto oboka nong nirya uk dan dinyi ton uk dabmai ura, sun malyi dinyi aryi lemdaron dinyi ton dama deibmai. 2Ukuboka Daud biryi Er Imtamnyi biti, domba oboka nong nirya dama deiboka uk dan dinyi ab, sun malyi dinyi aryi lemdarona dinyi ati dama deirin dinyi ab sirya ukubmai. Ura, Yerusalem atei ninyi a wekmai ninyi asi Er Iya Erebdobnyi si deici aryi kisal dangna dinyi karebmou. 3Ura, roti kwaning a wekmai ninyi nirya asi bokeibmou. Sun a wekmai ninyi nirya, sal babyi, nerabwe babyi nirya roti kwaning tokol tentok ab, domba bisam toubdoba ab, kue kismis tokol tentok ab dobnin yibinmai.
4Ani, Daud biryi Lewi yala nang mikbaryi Er iya Erebdobnyi ai, “Ukubdarur-ukuna mem,” en uram deirin co sangkol dam wa inkwamnyi nang tikeibmou. Ani, tonda Er Iya Erebdobnyi, Israel ninyi moloraminyi biti, si weik eboka semni mot ab, “Nun Nai, nun babya,” en mot ab semkwamnyi nang ton wiboka wa karebmou. 5A wiboka wa karebmou nang si ara Asaf akai wa in nang sienyi kibdeibmou. Ba, er amwetam ara Zakharia tikeibmou. Ba, sun amwetam nang si ara Yeiel ab, Semiramot ab, Yehiel ab, Matica ab, Eliab ab, Benaya ab, Obed-Edom ab, ara gambus ab, kecapi ab douboka lilim en nang kibdeibmou. Ba, Asaf bira lilim ena si ceracap douboka lilim kwemnanyi kibdeibmou. 6Ba, akai wa in nang imam nang bitinyi si Benaya ab, Yahaziel ab ara Imtamnyi biryi, “Ukubdarur-ukuna mem,” ebmou uram kerek sengna deibmai ai dam tuba trompet aryi lilim en nang kibdeibmou.
Daud biryi mot seboka Imtamnyi bisi si erebmou deyok
16:7-36
7Ura, a tum aryok Daud biryi yuma kobdob arukmou ba, Asaf ab, er du yabwe-er weit yabwe ab tonkwa Er Iya Erebdobnyi bisi si weik ereboka, “E, Nun Nai, nun babya,” en mot yuma sebkalibmai. A sebmai mot ara ato eboka sebmai,
8 #
Mzm. 105:1-15
“Er Iya Erebdobnyi biti, ‘Nun Nai, nun babya teleb,’ eboka kibdarur.
Nun Nai, Er Iya Erebdobnyi ukurur to ara yuk mutuk im dangna tukwe dangna ab asi, ‘Imtamnyi bira ukururnyi kurur,’ ebde bindarur!
9Nun Nai Iya Erebdobnyi bisi mot seboka si weik erebdarur!
Er Iya Erebdobnyi biryi ilil tenen dinyi kunurur to asi, ‘Imtamnyi bira ukurur,’ eboka nukde bindarur.
10Nunda, Er mabwe nermabwe kunub ati, Er Iya Erebdobnyi bisi si weik ererdeirina teleb.
Nun Er Iya Erebdobnyi bisi ingkiringnandum ninyi ara kanya kilkil asa kuna teleb.
11Er Iya Erebdobnyi ab, Er mikib ab asi ingkiringna teleb.
Er Iya Erebdobnyi urasin asi ingkiringna teleb.
12Er Iya Erebdobnyi biryi ilil tenen dinyi ukurur dinyi asi tuba teneina teleb.
Er Iya Erebdobnyi biryi ukubmanto kum dinyi ukuboka, ninyi asi ikin dinyi kareboka wenerurci, ‘Ukuboka wenebkwansin,’ erur dinyi asi teneina teleb.
13Er Iya Erebdobnyi wa in nang, Israel mabwe nermabwe se! Er Iya Erebdobnyi bikwe si weik ebdarur!
Yakub mabwe nermabwe Imtamnyi biryi wiboka er dinyi kibsou ninyi se! Er Iya Erebdobnyi bikwe si weik ebdarur!
14Er Iya Erebdobnyi bira nun molonanyi kurur!
Im dangna tukwe dangna nirya Erci ikin kareboka wenen dinyi kunubde barur!
15Er Iya Erebdobnyi erci, uram talak kirikeibwe dinyi ara luba kimna kum uca, tuba teneirur!
Er Iya Erebdobnyi biryi er uram iya omona eamwe uram, ninyi odei-odei yangaramnyi ani, liki 1.000 baryi deirinung ababyi Er uram tuba bingdur.
16A uram ara Abraham deici asi, uram talak eboka kirikeiamwe.
Ani, Ishak deici asi iya dib uram ebdeiamwe.
17Ani, Yakub deici asi iya uram kibdeiamwe.
A uram ara Israel nang ati, iya kum danana kum uram talak eboka uram talak kirikeiamwe.
18Er Iya Erebdobnyi biryi a uram talak eamwe uram ara ato eamwe,
‘Sunsi Kanaan mutuk karebkwansin. Ba, Kanaan mutuk ara sun mutuk kobdoba kibdobkwandum!’ eamwe.
19Minob talak Kanaan dam bindoka tingbinamnyi ara ninyi yubwa kum wengbinamnyi.
Eda, ninyi mitikanun bindoka kuramnyi.
20Ani, nun abwe yabwe ara ton mutuk bindoka kunman ani, ton mutuk bindoka kubde baramnyi.
Ani, ton mutuk sien nang kiboka talean mutuk kunman ani, mitik atei tingdorbaramnyi.
21Bok, sunsi Er Imtamnyi tuba kalingnamwe deyok aryi, a nang asi yuk nang aryi, taleboka sun il dimna nang ton kimna kum kuramnyi.
Eda, sun deyok ati, sien nang kiamingnyi nang asi weneboka, ikin kareramwe.
22Ani, Er Imtamnyi biryi ato eramwe, ‘Ni mabwe kibse nang asi dumtordena mem!’ eramwe.
Ani, tonda ‘Ni uram ermurun nang asi mar ina mem!’ eramwe.
23 #
Mzm. 96:1-13
Ati, nun tukwetam kunub ninyi nirya Er Iya Erebdobnyi biti mot seboka si erena teleb!
Er Iya Erebdobnyi biryi lemsurur dinyi ati, dantam-dantam nirya asi, ‘Imtamnyi biryi tuba-tuba lemsurur,’ ebde bana teleb.
24Er Iya Erebdobnyi biryi Er ibarya milil kurur dinyi ati, yuk mutuk nang asi nukde bindarur!
Ani, Imtamnyi biryi ilil tenen dinyi kunurur dinyi ati, yuk-yuk mutuk nukde bana teleb.
25Ara, Er Imtamnyi Iya Erebdobnyi kurur ati, Er si weik erena teleb!
Ani, yuk-yuk kwemdeina ara Er Iya Erebdobnyi ukurur dinyi kikibmanto kum kurur! Er Iya Erebdobnyi bira ilil tenen dinyi bisiboka weikto dinyi kunurandanyi kurur.
26Tukwetam kwemdeina molonung dinyi ara ninyi aryok, ‘Ukutotoa,’ tenen kiknibdeiboka molonung.
Uca, Er Iya Erebdobnyi bira Erci im ab tukwe ab kiknibunyi kurur!
27Er Iya Erebdobnyi bira Er iya ereboka bukuryi, Er dam ibarya dumdum erur!
Er kurur ai dam ara milil araboka, iya telebto dikum aryi kilkil asa kun ai kurur.
28Tukwetam nang nirya Er Iya Erebdobnyi bisi si weik ereboka kisal dangna teleb!
Er Iya Erebdobnyi dam akwe ibarya kuboka mikib dinyi kurur!
29Er Iya Erebdobnyi bisi si weik ereboka ibarya kibkarebdarur.
Er Iya Erebdobnyi urasin dam wengbindoka, Erti dama deirina teleb.
Ura, sun nong bol asi Imtamnyi dam wengbana kikiman bol kibdandobmunci, Er Iya Erebdobnyi dam bindoka kutam sunsunubmunyi ura, kisok luknubdongoboka molona teleb.
30Im dangna tukwe dangna ninyi nirya, se, Er Iya Erebdobnyi urasin dam sirim talena ara teleb.
Tukwe yangabwa ara eimlamna kum kubdur, Imtamnyi biryi iya katabdeibwe.
31Im kan kilkil kukina teleb! Tukwe kan karya karyi kukina teleb.
Im dangna tukwe dangna nang asi, ‘Weik sienyi bira Er Iya Erebdobnyi tentok kurur,’ eboka eterebde bindarur!
32Weik me kwan ab, a me kwan umbura kurande kamyoa yala nirya ab karyi kusina teleb.
Tukwe kib ab, tukwe kib kurande dinyi co yala ab, kamyoa yala ab nirya kilkil kanya bona teleb.
33Er Iya Erebdobnyi bira tukwetam deyok liliboka weneryankwansir ati,
Er urasin dam aryi co yala bai kurur dinyi nirya kilkil kuboka limlam ena teleb.
34 #
Mzm. 106:1,47-48 Er Iya Erebdobnyi bira iya telebnyi kurur. Ati, ‘E nun Nai, nun babya,’ eboka kirona teleb.
Er Iya Erebdobnyi biryi busul kuboka, boukwe kimsurur dinyi ara kum danana kum kubkwande. Eda, iya kubmurubkwande.
35Ani, ato ebdarur, ‘Nai, Iya Erebdobnyi, nun molokunubnyi. Kanda ninyi lemnanyi kurum!
Ati, nun yuk mutuk nang kankan kunub asi, Kanci leboka tentok dikum akwe bulubdeibsurum!
Ba, nunci Kan iya teleb si deici aryi, “Nun nai, nun babya,” eboka kibdobkwankib.
Ani, nunci, Kan kisal dangna mot seboka, Kan si erebdeibkwankib,’ eboka mot sebmou.
36Er Iya Erebdobnyi, Israel nang molonubnyi bisi si weik eboka kirona teleb. Ara, minob a kuramwe ani, iya kubde binkwande ati, Ersi akwe si weik ena teleb.
Ba, sun a wekmai ninyi nirya aryi, ‘Yo, diba, Amin!’ Nun Nai Iya Erebdobnyi si weik ebmakib,” eboka mot sebmai.
Er Imtamnyi ai wa in nang ninyi mikbaryi wiboka wa karebmou deyok
16:37-43
37Ura, Daud bira Er Iya Erebdobnyi uram deirin co sangkol dam tikmou ani, takloboka bindobmou. Ba, Asaf ab, Lewi yala nang yuk nang ab ara sun wa ukubde iramnyi to kuboka, tuba-tuba Er Imtamnyi co sangkol dam wa inmai. 38Ba, Yedutun mi Obed-Edom ab, er yala nang 68 baryi nang ab, Hosa ab ara bisik bublan dam kalingni wa kareamnyi aryi Er imtamnyi ai lika bisik bublan dam kalikmai.
39Uca, Er Imtamnyi ai wa inanyi imam Zadok ab, er yala nang yuk imam nang ab ara Er Imtamnyi biti dama deirin mutuk kon Gibeon kon aryi Kemah Suci ai umbura Er Iya Erebdobnyi wa tuba ibde kunmai. 40Ba, a kunmangnyi aryi, Er Iya Erebdobnyi biryi sun Israel nang ati ebdeiamwe to kuboka, belekuna babyi, sintam babyi Er Iya Erebdobnyi biti bisam domba oboka nong nirya uk dankwamnyi ati, sunda a tuba kunmai. 41Ba, Heman ab, Yedutun ab ton yuk nang si semeboka mot semna nang wibmai nang ab ara tonkwa mot sebmai. Ara, ato eboka mot sebmai, “Er Iya Erebdobnyi biryi nunsi busul kuboka, tuba-tuba boukwe kimsurur dinyi iya kubkwande,” eboka mot sebmai. 42Ba, Heman ab, Yedutun ab ara lilim eboka mot semna keica si nafiri ab, ceracap ab doubmarei. Ba, yuk nang ababyi, lilim eboka mot semna keica yala yuk-yuk douboka, Imtamnyi bisi si ereboka mot sebmai. Ba, Yedutun mabwe ara akai lika bisik bublan dam kalikmai.
43Ukuboka sirya mot sebmai ura, a wekmai ninyi nirya ara sun ai yuk-yuk bindobmai. Ba, Daud bira er ai ninyi asi bindoka kibdobmou.
Currently Selected:
1Tawarikh Uram 16: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
