1Tawarikh Uram 17

Salomo biryi Er Imtamnyi ai dobkwamwe deyok ati, Er Imtamnyi biryi uram talak minob ebdeibmou deyok

17:1-15

(2Sam. 7:1-17)

1Ura, Daud er ai kobdob aryi sien nang kuraming atei bindoka kuramwe. Ani, uki tentok tum ara Imtamnyi uram ermurunanyi si nabi Natan bisi ato ebmou, “Natan, nira ai teleb co aras aryi doboka kunun. Ucab, Er Iya Erebdobnyi biryi, ‘Ukuna mem-ukubdarur,’ en kerek sengna deirin co sangkol ara keis ol ai tuba a deiboubwe tok ati, una kubtinyi do?” ebmou. 2Ba, Natan biryi Daud bisi ato ebmou, “Kan kanyatam aryi, ‘Ukubtinyi,’ teneraminyi dinyi ur kunubdum! Er Iya Erebdobnyi kansi milibkwankir,” ebmou.

3Uca, a tum lukunda aryi Natan dam asi Er Imtamnyi biryi ato ebmou. 4“Kan anaboka, ni wa inanyi daud dam asi bindoka, ato ebdum! Ura, ‘Er Imtamnyi uram ara ato ebmar,’ ebkwandum. ‘Ni kubkwan ai ara kanci dobkwanirima kuma. 5Niryi Israel ninyi asi Mesir dam aryi boyangaranse talak aryi kuboka, uku talak ababyi, ai teleb ton kubde yangana ton kum kuranse. Eda, keis ol ai akwe ton dikum dobdeibmanin ani, dakoka tubto o dikum bindoka dobdeibmanin ani, ato ukubde yanganunung. 6Ni ab Israel nang ab, a mutuk yandoka kunman ani, o mutuk yandoka kunman ani, kibde yangaramoubwe talak ara Niryi, “Sunci, Ni mabwe Israel nang sien nang kiboka kalingkwandum!” eboka wianse nang deici asi, “Sunda, Ni kun ai, co aras aryi dobnindarur!” ton ena kum kuranse. 7A deyok aryi Ni wa inanyi Daud bisi ato ebdeibkun, Nira Iya Erebdobnyi, imtam yin doun nang sienyi biryi ebkun. Daud kanda, bisam kambing toto, domba toto kalikde kunmoumwa dam aryi, Israel nang sienyi kiboka talebkwamoumwe ati, dobdankise. 8Ani, Daud kan dantam-dantam yibanmaminya dikum nirya milikunun. Ani, kan dinmaminyi bok, kan mar ordan nang asi oboka ererdeirikunun. Ani, kan si ara tukwetam a kunung yuk weik nang sun si erenung to akwe, kan si ababyi si erebdeibkinyi ba, ukura kan si erebkwanking. 9Ani, ni mabwe Israel nang asi, sun mangkau kuron mutuk tentok sun yuk eterebnyi ba, ninyi iyangana ati, nebneb ena kum asa mangkau kubdobkwaming. Minob kubde yanganung mutuk aryi, ninyi ona ilil asa kubde yanganung to kum kubkwaming. 10Minob Ni mabwe Israel nang kalingkwamnyi nang wibmase talak ara sun mar ordan nang asi oboka sunsi ererdeiriransise. Ani, Niryi Daud kansi sienyi mi karebkwan. Ba, kan ab, kan deibdoba ab asi, sien nang akwe iya tuba kibde bankwandum! 11Ba, kan sirya wise dandoka dibminyi ba, kan abwe yabwe dongoramingnya tukwe dam dongobkwanking. Ato kubkingnyi ura, kan mi kobdoba asi kan olong unuboka sienyi kibdeibkwan. Ukuboka sienyi kibdeibnyi ura, er taleanci mutuk sasibdeibkwan. 12Ukuboka, kan mi kobdob aryi sienyi kibdinyi biryi Ni kunkwanyi ai dobkwanir. Ba, Niryi er sienyi kiboka taleanci mutuk asi iya sasibdeianyi tok kum danana kum kubkwande. 13Kan mi sienyi kibdinyi bira Nira er nai kibnyi ura, erda Ni mi kibkwande. Ani, Niryi busul kuboka, ersi tuba boukwe kimurunkwan. Minob kan sienyi kimna kabul talak aryi sienyi kimnanyi asi boukwe kimna kum uca, tangloranse to kum kubkwan. 14Ani, Niryi ersi Ni ai dam iya sasiboka erebdeibkwan. Ani, kan deibdoba aryi aminda sienyi kiboka talebkwaming nang babyi ara Ni urasin dam aryi, kum danana kum uca, odei-odei nirya mikib dinyi iya sasibdeibkwansin,’ ebkwandum,” ebmou.

15Ura, nabi Natan biryi Er Iya Erebdobnyi uram ebdeibmou to nirya liliboka, Daud dam asi bindoka ebmou.

Daud biryi Er Iya Erebdobnyi bisi molonmouci, “Ni nai, ni babya,” eboka kibdobmou deyok

17:16-27

(2Sam. 7:18-29)

16Sirya ato ebmou ura, weik sienyi Daud biryi Er Iya Erebdobnyi co sangkol deiamnyi ai umbura dam wengbinmou. Ura, Er Imtamnyi urasin dam burbindoka ato eboka molobmou. “Nai Iya Erebdobnyi, nira unatonyi nun kun do? Ani, ni ai ninyi ara unato ninyi kunub do? Kanci uku talak telebto dinyi akwe kunurdeirinurum ara unatonyi kunun ati do? 17Nai Iya Erebdobnyi, ni Molonunyi, nira Kan urasin dam yangana kikiman kumnyi kunun. Bok, Kanci nisi telebto akwe kurdeirinurum to ni ai ninyi ab ni ab asi, ‘Aminda ukubkwankin,’ eanoumwe dinyi sirya lak kibdeibmanirim ati, ni Nai Iya Erebdobnyi, ni babya. 18Nai Iya Erebdobnyi, ni kun dinyi ab, ni tenen dinyi ab nirya ara Kan bikmanirim. Kansi una dinyi molobkitinyi do? 19Nai Iya Erebdobnyi, ni deyok ati Kan tenerum to kunuboka ilila dinyi akwe, ‘Ukubkwankin,’ sirya ebmanirim. 20Ati, Nai Iya Erebdobnyi Kan kurum atonyi bira yuk kwemdeina aryi, ‘Ton a ukurur,’ ena nun amol ton kum kekenub. Eda, Imtamnyi Kan tentok kurum! 21Ani, Nai Iya Erebdobnyi, Kanci, Kan mabwe Israel nang Mesir mutuk mambul doramnyi bok, ilil tenen dinyi ilinto kikniboka, leboka boyamwe. Ato kubumwe to ara tukwetam ninyi kubde banunga nirya ara dan mutuk asi sun kwemdeina aryi ton ukubmou do? Ton da ton ukuna kum kunung. 22Ani, Nai Kanci, Kan mabwe nermabwe Israel nang asi katabdeiboka, Kan mabwe kobdoba ato kibdobumwe ura, Kanda Israel nang sun Nai, Iya Erebdobnyi kibumwe ba, Kanda sun Nai kobdoba kiboka molokunung.

23Ati, Nai Iya Erebdobnyi, ukura Kanci ni deyok ati, uram talak ebdeibnoumwe to ur kunubdeibnurum! Ani, ni deibdoba ati, ‘Ukubkwansin,’ eboka uram talak ebumwe dinyi ur kunubdeibsurum. Ba, nun iya kubde binkwayeb. 24Ba, Nai Iya Erebdobnyi, Kan si akwe iya ererdeirinkwanking. Ani, yuk-yuk mutuk ninyi nirya aryi, ‘Israel nang sun Nai, sun molonungnyi bira imtam yin doun nang sienyi kurur,’ ebkwanking. Ba, ni kan wa inanyi Daud yala ara Kan urasin dam aryi sienyi kiboka iya talebmuruanci tok asi iya kubde binkwande. 25Ara, Nai, Kanci ni Daud bisi ato ebmanirim, ‘Kan deibdoba asi aminda weik sienyi ton kibkwaming,’ ebmanirim deyok aryi ni dabub deiboka kan urasin dam yandoka molonmakin. 26Ati, Nai Kanda Iya Erebdobnyi kurum deyok aryi, Kanci, ‘Ukuboka karebkwankin,’ eboka uram talak ebnoumwe. Ati, kanci teleb tenerandim dinyi ni Kan wa irmilinanyi biti uram ebmaminyi tok kunurur. 27Ati, Nai Iya Erebdobnyi, Kanci ni Kan wa irmilinanyi deibdoba asi kanyi deiboka, tuba boukwe kibde bana teleb. Ba, kan boukwe kimni dinyi akwe iya kubde bana teleb,” eboka molobmouci, kibdobmou.

Currently Selected:

1Tawarikh Uram 17: MTG

Highlight

Copy

Compare