1Tawarikh Uram 15

“Ukubdarur-ukuna mem,” en uram Yerusalem atei deibkwamaici, boboka anabminikmai uram deyok

15:1–16:6

(2Sam. 6:12-23)

1Weik sienyi Daud biryi erbiramnyi ati weik ai mikbaryi Daud atei dam doamwe. Ani, erci, “Ukubdarur-ukuna mem,” en uram deirin keis ol ai ababyi sirya doamwe. 2Ura, Daud biryi ato ebmou, “Lewi yala nang aryi, ‘Ukubdarur-ukuna mem,’ en uram akwe bobkwanung. Ara, Er Iya Erebdobnyi biryi sunsi wiboka wa kareburyi, Er Iya Erebdobnyi co sangkol bobkwanung. Tonda, Er Imtamnyi ai wa inung. Ani, iya ibmurubde binkwaming,” ebmou.

3Sirya ebmou ura, Daud biryi, “Sun Israel nang nirya asi Yerusalem atei yandarur,” eboka nabmou. Ura, yanmaici, neika Yerusalem atei bulubmai. Sirya bulubmai ura, ato ebmou, “ ‘Ukubdarur-ukuna mem,’ en uram boboka ai sirya dobdeibse ai umbura bobinkwayeb,” ebmou. 4Sirya ebmou ura, Daud biryi, “Harun deibdoba ab, Lewi yala nang ab asi neika bulubdarur,” eboka arukmou. 5Ura, a yandoka bulubmai nang si ara Kehat yalanyi si Uriel yanmou. Uriel biryi 120 baryi nang kalingnamunyi yanmou. 6Tonda, Merari yalanyi si Asaya yanmou. Asaya bira 220 baryi nang kalingnamunyi yanmou. 7Ba, Gerson yalanyi bira Yoel yanmou. Yoel bira 130 baryi nang kalingnamunyi yanmou. 8Ba, Elisafan yala ara Semaya tingyanmou. Semaya bira 200 baryi nang kalingnamunyi tingyanmou. 9Ba, Hebron yala nang ara Eliel tingyanmou. Eliel bira 80 baryi nang kalingnamunyi tingyanmou. 10Ba, Uziel yala ara Aminadab tingyanmou. Aminadab bira 112 baryi nang kalingnamunyi tingyanmou.

11Sirya tingyanmai ura, Daud biryi ninyi dama deirin nang si imam Zadok ab, imam Abyatar ab, Lewi yala nang nabaryi tingyanmai nang ab nabmou. A nabaryi nang si ara Uriel, Asaya, Yoel, Semaya, Eliel, Aminadab nabmou. 12Sirya buluryanmai ura, Daud biryi ato ebmou, “Sunda Lewi yala nang kankan dam aryi wa dobdob nang. A deyok aryi sun ab, sun Lewi yala nang miliramnyi nang ab ara nong nirya me ilikdobdarur. Ara, sun Lewi yala nang aryi, Er Imtamnyi biryi ebdeibsou uram, ‘Ukubdarur-ukuna mem,’ en uram bobkwamarum. A boboka deirbinkwamarum ai ara niryi sirya akai dobsiryi wibdeibse. 13Ara, sun Lewi yala nang minob buluryangana kum kubmandau ba, Er Imtamnyi biryi ebdeibwe to kuboka, ‘Ukubdarur-ukuna mem,’ en uram deirin co sangkol boyangana kum kubmoubwe. A deyok aryi Er Imtamnyi biryi nunsi kereboka wenebsou. 14Ati, imam bitinyi ab, Lewi yala nang ab ara sun nong nirya me ilingdonmandarur. Ba, ‘Ukubdarur-ukuna mem,’ en uram deirin co sangkol bobkwamarum. 15Ba, Lewi yala nang aryi a co sangkol bobkwamamunyi ura, Er Iya Erebdobnyi ebdeibwe to kuboka bobkwandarur. Ara, co maloua caboka takonya deici deibdongoboka bobkwandarur,” ebmou.

16Ura, Daud biryi sun Lewi yala ninyi kalingna nang asi ato kuboka arukmou, “Sun yala ninyi asi mot sebde bankwamang ninyi wibdarur,” ebmou. Ura, sun Lewi yala kalingna nang aryi mot seboka gambus ab, kecapi ab, ceracap ab obde binkwamai ninyi wibmai. 17Ba, Lewi yala nang asi kecapi ab, gambus ab, obdarur ebmou nang si ara Yoel mi Heman ab, sun yala Merari yala nang si Berekhya mi Asaf ab, Kusaya mi Etan ab asi arukmai. 18Ba, sun kwit yabwe mot si kong ena weikanun eren nang ara Zakharia, Yaaziel, Semiramot, Yehiel, Uni, Eliab, Benaya, Maaseya wibmai. Ba, luknubdongoboka kecapi obkwamai nang ara Matica, Elifele, Mikneya, Azazya, ani Er Imtamnyi ai kalingna nang bitinyi, Obed-Edom ab, Yeiel ab wibmai. 19Ba, sun mot semai to kekenkwamai nang ara Heman, Asaf, Etan ab, wibmai. 20Ba, sun mot si kong ena weikanun ereboka kecapi ab obkwamai nang ara Zakharia, Aziel, Semiramot, Yehiel, Uni, Eliab, Benaya, Maaseya wibmai. 21Ba, luknubdongoboka kecapi obkwamai nang ara Matica, Elifele, Mikneya, Azazya, ani Er Imtamnyi ai kalingna nang bitinyi, Obed-Edom ab, Yeiel ab wibmai. 22Ba, Lewi yala nang sun dunyi si Kenanya bira mot semna sienyi wibmai. A wibmai deyok ara erda mot semna tam nirya bikamwe ati wibmai. 23Ba, Berekhya ab Elkana ab ara, “Ukubdarur-ukuna mem,” en uram deirin co sangkol bobanmai u dam tikmarei. 24Ani, Sebanya, Yosafat, Netaneel, Amasai, Zakharia, Benaya, Eliezer, ab imam nang ab ara trompet aryi, “Ukubdarur-ukuna mem,” en uram deirin co sangkol kisok dam tikoka buu ebdarur ebmai. Ba, Obed-Edom ab, Yehia ab aryi a co sangkol bisik bublan kalingmarei.

25Ura, Daud ab, sun Israel yuk sien nang aryi kilkil asa aryi Er Iya Erebdobnyi co sangkol Obed-Edom ai dam aryi boboka er atei deiryanmai. 26Er Iya Erebdobnyi biryi Er co sangkol boboka banmai nang Lewi yala nang milinmou deyok aryi yan yanina lang nabaryi yanirdongorbintok ara bisam lembu wisi ton, mi ton bingbing eboka nebmouci, minta bobmou domba akwe oboka dama deibmou. 27Ba, Daud ab, sun Lewi yala nang ab, sun mot semna nang ab, sun bobaramnyi nang sienyi Kenanya ab aryi Imtamnyi ai wa in nang ongoraming aling, lenan aryi wiraming aling ongobloboka, mikib asa aryi Er Iya Erebdobnyi urasin dam merebde banmou. 28Ba, sun Israel ninyi nirya, “Ukubdarur-ukuna mem,” en uram bobmaici, Yerusalem bobanmai. A bobanmai talak ara gambus ab, kecapi ab aryi oboka mot sebde banmai. 29Bobanmai ani, Yerusalem atei dam boboka binmai. Ura, Saul nebnyi aryi deiamunyi si Mikhal biryi dinmou uca, Daud bira kilkil asa aryi, mereboka mot sebde banmou asi eibmou. Ura, Mikhal kanyitam aryi Daud kunmou to ara duknasito tenebmou.

Currently Selected:

1Tawarikh Uram 15: MTG

Highlight

Copy

Compare