Mathi 18
18
Suomia üse Kezhathotie Shikecü
(Mark 9:33-37; Luk 9:46-48)
1Süki pethakelieko Jisu ki vor di sie, “Teigei kedi nu suomia üse kezhathotuo ga?” 2Sitse puoe nhicunuomia yopuo kielie di puo bu uko donu balie. 3Sidi sie, “A nieko ki pu toushütuo, nieko rüdilie di nhicunuomia kemhielie kemosie nie mhakipuorei teigei kedi nu lelie kenjü zo. 4Kehoupuorei puo chü kerünuopie nhicunuomia hayo mhiekelieu teigei kedi nu kezhatho-uwe. 5Siro kehoupuorei a za nunu nhicumia hikecü yopuorei zeliekezhamia a zelieya.
Kephouma Dophiko
(Mark 9:42-48; Luk 17:1-2)
6“Nie kehoupuorei a pelekezha kecü hako donu mia yopuorei chü pesuokeshümia, mha kegetsie kezha puo pie nie vo gei goushü di dzükezha kesou nunu pelheikhrikewa we nie dze vikuotuo. 7Mhachü kepesuoko la kijüu we ce, chülietie! Mhachü kepesuoko vor molie lho zo; derei puo la mhachü kepesuo bu kevor-u we ce, chülietie!
8“Siro n dzie morei n phi n chü pesuo liro, n geinu süu da kelhouwaliecie; n dzie kenie mu n phi kenie pfü di mia bu n kelhoupie kechachie mi nu shükewa ki n bou lalhi morei n phi lalhi di kerhei nu kele we n dze vikuotuo. 9Siro n mhi n chü pesuoya liro, n geinu süu kerülapie kelhouwacie; n mhi kenie pfü di n kelhoupie mizie nu shükewa ki rei mhi puo pfü di kerhei nu kele we n dze vikuotuo.
Tekuo Jüketayo pie Kedievikeshü
(Luk 15:3-7)
10“Nieko kecü hako mia yopuorei pese molieketuo le terü zoliecie; kekreilamonyü a nieko ki pushütuo, teigei uko dielieko teigei kebau a Puou zie meho sei baya. 11Kekreilamonyü themia Nuou jüketamia kelalietuo üdi vor zokecü la. 12Nieko kedipuo le ga? Mhanuü mia puo tekuo krie puo ba di süko donu puo yotuota ro, puo kekrei hiethepfüethepfüko pie kijüthou gei tha di vo jüketayo pfhü lho üme? 13Siro a nieko ki pu toushütuo, puo süu ngulie ro, jüta kemo hiethepfüethepfüko ki rei süyo la puo neikuotaya. 14Sütuoi teigei keba nieko Puou rei kecü hako donu puorei bu jüketa puo medo mo.
Phoumakewa Siezeu
15“Siro n siezedzürie mia puo n gei kejo chü liro, vo di nnie rübei zokecü kinu puo kejo pu puo kiecie. Puo n die rünyülie liro, no puo nguliete. 16Derei puo n die rünyü mvüta ro, no mia puo morei kenie ze sa vocie, mia keniekese tie se zhapu chü liro die kehoupuorei mvü kemeteilietuo. 17Siro puo süko die rei rünyü mvüta ro pie kehou ki pucie; sidi puo kehou die rei rünyü mvüta ro, puo bu Judakemomia mu thesokeliemia mhietacie. 18A nieko ki pu toushütuo, nie kijü nu mhakehoupuorei kha liro teigei rei kha zotuo, mu nieko kijü nu mhakehoupuorei khrükeshüu teigei rei khrüshü zotuo. 19Siro a nieko ki pu sashütuo, nieko mia kenie kenourhe di mhakehoupuorei cha ro, teigei keba a Puou thuo mha süu chüshü nie tsü zotuo. 20Kekreilamonyü mia keniekese a za nu vo kehoukengukezhara a süko donu ba zotuokecü la.”
Kejo Vapie Ketsükecü
21Sitse Pitor puo ki vor di, “Niepuu, mhanuü a siezedzürie mia puo a gei kephouma puo chüwa ro, a bu va kitsuo vapie puo tsütuo ga? Va thenietuo me?” 22Sitse Jisu puo ki, “Va thenie icüu mo, derei va hietheniecü thenie reicie.
Kejo Vapie Tsükemo Kituou Dievi
23“Süla teigei kedi-e kedimia puoe puo kituomia puo vie se kebako ze mha süko kela mehotuoü kesie ze kemhie zo. 24Siro puo le kesie ki, mia puo talent nyie ker puo pu pfüzhüketa puo ze puo ki vor; 25mu puo thepu su hulie kenjüketa la puo niepuue sie puo mu puo kimia siro puo nuonuoko, tsiu puo vie pete zepie puo suwanuta. 26Süla kituo süue tsu puo mhodzünu khoutoupfülie di sie, ‘No a pfhe zashücie, sitse a n pu chü tseishütuolie’ idi puo mezhiemelota. 27Sitse kituo süu niepuu puo ngumezhieta di puo khashüwa, mu thepuko rei vashü puo tsüwa. 28Sirei kituo süu pra di puo dziese kituo kekrei puo denari#18:28 Denarius ro khunhie mhakrau. krie puo puo pu pfükezhü puo ze keselie tse puo mezha kenie pielie di sie, ‘No a pu pfüketuoko chüshücie,’ sita. 29Sitse dziese kituo kekreiu tsu zhülie di sie, ‘No a pfhe zashücie; a n pu chü lashütuolie’ idi puo mezhiemelota. 30Derei puo mvüta, sidi puo pu chüshü kemochie puo teze vo kedieki nu shüpie ba tso. 31Siro dziese kituo kekreiko mha süu ngu di uko nousuo phita, sidi vor uko niepuu ki mha süko pete pushü. 32Süsie puo Niepuu puo kielie di sie puo ki, ‘No kerüzhü kituou! No a ki n mezhiemeloketa la no a pupfükezhü pete vapie n tsüwate. 33A n ngumezhiekeshü tuoi no rei n dziese kituou ngumezhieshü zhü mo üme?’ 34Sidi puo niepuu puo noukemeyiepfü puo bu thepu pfükezhü pete chü tseishü kemochie puo pechüpenyüwanu di pie mia dzie nu shüwa. 35Sütuoi nieko kehoupuorei nie nou nu nie siezedzüriemia kejo vapie tsülie kemosie, teigei keba a Puou rei nieko gei sükemhie chü zotuo,” sita.
Currently Selected:
Mathi 18: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
