Mathi 16
16
Zasi Puo Chakecü
(Mark 8:11-13; Luk 12:54-56)
1Farisiko mu Sadukiko Jisu bu teigei nu zasi puo chüpie uko kienu di vor puo medophita. 2Sirei puo uko ki, “Thevatie ler tse nieko sie, ‘Tei vituoü bate, kekreilamonyü tei merie zhaketa la,’ siya. 3Siro khise gei nieko sie, ‘Thie teirütuoü bate, kekreilamonyü tei merie mu zeide-i zhaketa la,’ isiya. Nieko tei zie meho di tei kevikesuo si kekreilieya, derei nieko puotei zasiko we silie kenjü. 4Kerüzhü mu pieüpiera phouu zasi pfhüya, derei Jona geinu chüshüwaketa zasiu sie zasi kekrei puorei kha sashülie lhote.” Sidi puo uko khawa di tuota.
Farisiko mu Sadukiko Khrei
(Mark 8:14-21)
5Siro pethakelieko dzükezha cie kekreitsatie vota, mu uko niekhrüda pfülie rükra mota. 6Sitse Jisu sie uko ki, “Nieko menuoliecie, Farisiko mu Sadukiko khreiu la nieko kirei tuolie.” 7Sitse uko thuo kerüchü di sie, “Haha, úko niekhrüda pfülie rükra moketa la zo.” 8Derei Jisue süu silie di sie uko ki, “Nie kepele ketsako, kiüdi nie thuo nie donu niekhrüda pfülie moketa kepuya ga? 9Nieko tsie rei puoca silie mo me? Niekhrüda pengou pie themia nyie pengou vachülie di nieko bu khopenuo kitsuo pfhü lalie ga? 10Morei niekhrüda thenie pie themia nyie dia vachülie di nieko bu merha kitsuo pfhülie shicü nieko rükra mote me? 11Kiüdi nieko a niekhrüda kemo puo dze pu keba cau silie mo ga? Nieko Farisiko mu Sadukiko khreiu kitsa nie kireiliecie!” 12Süze uko puo uko bu niekhrüda khreiutsatie monyü Farisiko mu Sadukiko kepetha dietsatie u kireinushü ücü lelie.
Pitor Jisu Dze Phrakeshü
(Mark 8:27-30; Luk 9:18-21)
13Süsie Jisu Kaisaria Filipi rüna nu vorlie tse, puo sie puoe pethakelieko ki, “Mia Themia Nuou üse supuo üya ga?” idi ketso. 14Sitse uko sie, “Huomia pucü Johan mia dzülukepfüu üya, kekreiko pucü Elija mu huomia Jeremia morei siedzekesiko mia puo üyalie.” 15Puo sie uko ki, di siro “Nieko a üse supuo üya ga?” 16Siru Simon Pitor sie, “No Khristau, rhei tuoyakezha Ukepenuopfü Nuou zo.” 17Sitse Jisu sie, “Jona nuou Simon, no thejakepfütho zo, chüüzie nunu monyü, teigei keba a Puou thuo pie n pesipengushü zokecü la. 18Süla harie, no Pitor#16:18 Gk Petros., a tsiedi hau geinu a kehou chütuo; siro Hades kharuko puo penyülie lho. 19A teigei kedi cabiko pie n tsütuo; tsiu no kijü nu khakecüko teigei rei khatuo mu mhakehoupuorei kijü nu khrüshü ro teigei rei khrüshü zotuo,” sita. 20Süsie puoe pethakelieko bu puo Khristau zo ükecü se mia puo ki rei pu hienuwa.
Jisu Puo Mezhie mu Puo Se Dze Kepu
(Mark 8:31—9:1; Luk 9:22-27)
21Sü yawinu Jisue Jerusalem nu vo di phichüko mu zievokezhako siro thezhokepethako dzie nunu kemezhie phiketuo mu mia bu puo dukhriwa di zha se nhie rheilasielie morosuo ükecü pupie pethakelieko kie tuota. 22Sitse Pitor puo ze mharapuo vo puo kerhie di sie, “Niepuu, kenyüthor! Mhakipuorei n bu silie lho zo.” 23Sitse Jisu reipra Pitor ki, “A sietsa votalie, Satan! No a chakha puo zo, kekreilamonyü no Ukepenuopfü medoko le monyü themia medoko leyakezha zocü la,” sita.
Krus mu U Thuo U Meliekecü
24Süsie Jisue pethakelieko ki, “Kehoupuorei a siemedzi kenyümia sümia bu u thuo u meliewa, mu u krus pielie, di a siemedziliecie. 25Kekreilamonyü kehoupuorei u thuo u phou pekru nyükezhamia süu pejüwatuo; derei kehoupuorei a la puo phou pejükeshüu süu ngu lalietuo. 26Siro miapuonie kijüu pete peviepie puo vie chülie ürei puo phou pekapejüwa ro kedipuo pralietuo ga? Morei mia puo kedipuo pie puo phousou chülie vituo ga?
27“Kekreilamonyü Themia Nuou puo Puou zayie se di puo dielieko ze tsurtuo, mu puoe mia puopuo mhatho kheki sü chü zhakhra chüshütuo. 28A nieko ki pu toushütuo, haki ketha themia huo Themia Nuou puo kedi chü kevor ngu kemochie sialie lho,” sita.
Currently Selected:
Mathi 16: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
