Mathi 15
15
U Pfutsanuoko Kepetha Die
(Mark 7:1-13)
1Süsie Farisiko mu thezhokepethako huomia Jerusalem nunu Jisu ki vor di sie, 2“Kiüdi noe pethakelieko bu u phichümia zho varhuoya ga? Uko mhakecü mhodzü uko dzie meteiya mo.” 3Sitse puo uko ki, “Nieko kiüdi nie thuo nie zhoko la Ukepenuopfü diekhakeshüu varhuoya ga? 4Kekreilamonyü Ukepenuopfüe pucü#15:4 Leshü kewe huo nu ro diekhashü, di sie., ‘N puo mu n zuo rhulie,’ tsiu ‘kehoupuorei puo puo morei puo zuo gei die kesuo pu ro, puo bu sia zotuo.’ 5Derei nie kehoupuorei puo puo morei puo zuo ki, ‘A mha pie nie khruohi kezhüu pie Ukepenuopfü tsüwate,’ iwa ro sümia we u puonuo#15:5 Leshü kewe huo nu ro morei puo zuo. rhu mo rei vi üya. 6Sidi nie thuo nie zhoko la Ukepenuopfü die pie kemethuo chüwate. 7Nie ketherakezhako! Isayae nieko dze siedzedie pu toupie zhü:
8“ ‘Themia hako u tie se a rhuyakezha zo,
derei uko nou we vo ratsa tuo;
9Uko a rüsuo thedo chü,
kekreilamonyü ukoe themia thuo rhükelie zhoko üse kepetha die üdi pethaya!’ ”
U Va Perhuwayakezhako
(Mark 7:14-23)
10Süsie puoe themia krodiu kiepie puo ki shülie di sie uko ki, “Rünyülie di puocapuola siliecie. 11Themia me nu keleko themia va perhuwaya mo, derei themia me nunu parkezhako thuo themia va perhuwaya.” 12Sitse puoe pethakelieko vor di puo ki, “No pukeshüu la Farisiko u nou kekrütakecü si ba mo?” 13Derei puo la sie, “Teigei keba a Puoue leishü kemo seiünha kheko phewatuo. 14Uko bu si ba zolie; ukoe mhiciemia di mhicieko cha tha tuoyakezha zo. Siro mhiciemia thuo mhiciemia cha tha ro, kenienie te thekhe nu letatuo,” sita. 15Derei Pitor sie puo ki, “Dievi hau ca pupie hie kieshücie.” 16Sitse puo sie, “Nieko tsie rei mha hako lelieya mo me? 17Mhakehoupuorei u me nu keleu u va nu ke, di khapie cavüchü nu shüwayakecü nie si mo me? 18Derei u me nunu parkezhako u melou nunu parya, mu süko u va perhuwaya. 19Kekreilamonyü u melou nunu kerüzhü noudoko, mia kedukhri, pieü, pierüü, kerügu, ketijü zhapu, mia ketha hako paryakecü la. 20Mha hako thuo themia va perhuwaya; derei u dzie metei mo di mhacükezha la themia va perhuwaya mo.”
Kananmiapfü Puo Kepele
(Mark 7:24-30)
21Süsie Jisu thechü sünunu tuo Tur mu Sidon rünatsa vota. 22Süki sütsa lhouyakezha Kananmiapfü puo vor puo ki, “Niepuu, David Nuou, no a ngumezhieshücie! A nuopfü terhuokesuo bu puo kebi ze tuote,” idi cha shiekhouita. 23Derei puo dieca puorei pie hapfü ki pu la mota. Sitse puoe pethakelieko vor puo ki pu bei di, “Puo ketsewacie, kekreilamonyü puo u siemedzi shie tuo zotakecü la,” sita. 24Ru puo la sie, “A ketsepie Israel seyie jüketa tekuoko ki rübei keshü zo.” 25Derei hapfü phir puo mhodzünu khoutoupfü di sie, “Niepuu, a khruohishü zocie,” ilata. 26Puo la sie, “Nhicunuoko nouva kelhoupie tefünuoko tsükewa puotou mo.” 27Sitse hapfüe sie, “Ulie, Niepuu, sirei tefünuoko zorei u niepumia mizhü geinu uca rürie ketsuko rei pacüya zolie,” sita. 28Süla Jisu hapfü ki, “Thenupfü, n kepele zha za ha! N kemenguu chüpie n ketsüu chüliecie.” Sitse sümesetouki puo nuopfü sü vilieta.
Jisu Kechümia Kekra Chü Pevikeshü
29Süsie Jisu sünunu tuo Galil dzükezha merhie vota, siro puo kijüthouu gei kho di sügei balie. 30Sitse themia krodikoe phiyhomia, kerünyiemia, mhiciemia, keliehuomia mu kekrei kekra rei ze puo ki vor. Ukoe süko khapie puo phi ki shü, sitse puo süko chü pevishü, 31süla themia kroko keliehuomia die pukelie, kerünyiemia vikelie, lalhimia chatuokelie mu mhiciemia mha nguketa ngushü di uko ngota. Sidi uko Israel Kepenuopfü tsheta.
Jisu Themia Nyie Dia Vachükeshü
(Mark 8:1-10)
32Süsie Jisue pethakelieko kie kengupie puo ki shülie di sie, “A themiako ngumezhiete, kekreilamonyü uko zha se a ze tuote mu mhapuorei kecü jüketa la; mu a uko vachü mo di uko ketseshü nyü mo, kekreilamonyü uko cha nu phisiata rei si momu.” 33Sitse pethakelieko sie, “Úko rayha nu tuokecü ha kirapuo nu kecüca krodi haicü kelhuo ngulietuo ga?” 34Sitse Jisu sie, “Nieko niekhrüda kitsuo tuoluo ga?” Sitse uko sie, “Thenie mu khuo kecü huo.” 35Sitse puo themia kroko bu ke kijü balienushü. 36Sidi puo niekhrüda thenieko mu khuoko pielie di kethezie khashü di süko bietshielie di pie pethakelieko tsüshü, mu pethakeliekoe khapie themia kroko tsüshü. 37Sidi uko pete süko cü di pevü phrelie, süsie ukoe cü kepesha puoseko merha ketshu thenie kengulie. 38Siro uko keze mhakecüko thenuthenuo mu nhicunuoko sa kemo mia nyie dia. 39Jisu themiako ketsekewa sie puoe rou nu lelie di Magadan#15:39 Leshü kewe huo nu ro Magdala morei Magdalan. kijütsa vota.
Currently Selected:
Mathi 15: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
