Isaias 40
40
O Del del zor e Israele
1Len zor, len zor, tumen kai sen mo foro,
gia phenel o Del.
2Den orba kai o lio katar o Jerusalem,
phenen leke urkindo kai getosailo leko vreme,
kai leko bilachipe si prostime,
soke lia katar o Del dui droma e duk
pala sa o bilachipe kai cherda.
3Iek lleno urkil po pusto:
Lacharen o drom e Gazdake,
lacharen po pusto iek drom orta
amare Devleke.#Mt 3.3; Mk 1.3; Jn 1.23.
4Suako umal te avel vazdini,
ta peradino suako burdo,
sogo si bango te avel ortome,
ta e burdura te achen orta sargo iek umal.
5Ka sikadol e zor e Devleki
ta sa e manusa ka dikhen le.
Soke o Del dia orba.#Lk 3.4-6.
6Iek lleno phenela:
Urkisar. Ta me phendem leke:
¿So trubul te pheneu urkindo?
Kai suako manus si sargo e char,
ta sa leko baripe sargo e lulunlla katar o vos.
7E char sukol, ta e lulunllin phuriol
soke e balav e Devleki phurdel pe late,
isto gia sargo e char si o foro.
8Sukol e char, phuriol e lulunllin,
a e alava katar amaro Del achen ostade.#Stg 1.10-11; 1 P 1.24-25.
9Like pe iek baro burdo,
porauka katar o Sion,
vazde zurale cho avazi,
porauka katar o Jerusalem,
urkisar ta na dara,
phen e foronenge katar o Juda:
¡Dikhen kate tumare Devle!
10O Del o Gazda ka avel zoriaia,
ta leko va ka gazdaril,
anel pea o pochindipe,
angla le avel soia ka pochinel.#Is 62.11.
11Sargo iek chobano ka arakhel pi stoka,
ande pe va ka inllarel e bakren,
ta ande po brek ka inllarel len
ka arakhel lachimaia
e bakrien kai avila len minone.
O Baripe katar o Del e Israeleko#Ez 34; Lk 15.5.
12¿Ko llinda e mora pe vastea
Ta o miloso pe cheperkoia,
trine naienchar chidia o prajo e phuviako,
ta phariada e burdura
ta zumada gachin phariaven e umalia?#Job 38.4-11; Pr 8.29.
13¿Ko sikada e Duo e Devleko,
o ko sikada le so te cherel?#Ro 11.34; 1 Kor 2.16.
14¿Ko sikada le te llanel?
¿Ko sikada le o drom katar o chachipe,
o sikada le o bizaipe ta o drom e llanglimako?
15E phuvia si leke sargo iek kuchinorri paieki
kai thavdel katar o bure,
sargo o sano prajo upral pe so phariavelpe,
ta ikanel e forura kai si pe mora sargo prajo.
16Ni o Libano ni resela e iagake,
ni sa leke zivirinie e kurbanoke.
17Sa e phuvia inai niso angla le,
sargo niso ka aven prema le, sargo kana inai.
18¿Prema so ka phene ka si o Del,
savi ezgoda ka cheren te avel sargo vou?
19Iek lleno bilavel o sastri ta cherel iek estatua,
aver kai radil o rup ucharel la ando sunakai
ta bilavel rup ta cherel lake lanchura.
20O lleno chorro, esviril te del le kotora
kastenge kai ni chernion, rodel iekhe llene
bizai kai llanel te radil te cherel iek estatua
katar o kas ta te achel pe porrne.#Is 41.6-7; 44.9-20; Jer 10.1-16; Ech 17.29.
21¿Ni llanen? ¿Ni asunden?
¿Nikada ni phende tumenge omanglal?
¿Ni sikade tumen sar kana cherdili e phuv?
22Vou besel po kolo e phuviako,
ta gola kai zivin pe late si sargo langoste,
vou buliarel o miloso sargo iek chiti,
inzarel le sargo iek chara te zivi.
23Vou zatril golen kai si zurale,
ta golen kai gazdarin cherel te na mol len niso.
24Sargo kana iakom thode len ande phuv,
sargo kana iakom barion lenge zile,
sargo kana lengo kas nikada ni saia le zile
ande phuv ta samo so phurdel pe lende
peren ta e balav inllarel len sargo char suki.
25O Santo Del puchel:
¿Prema so ka phenen kai sem
o savi ezgoda si sargo me?
26Vazden tumare akha upre,
ta phenen ko cherda gola ezgode,
vou ikanel ta llinel sa pe cheraien,
saurren ikharel pe lengo anav,
ni iek ni ka achel, gia bari si leki zor
ta gia baro si leko gazdaripe.
27¿Soke phene, ioi Jakob, ta phene, Israel:
Mo drom si gurudino katar o Del,
ta mo Del ni chinda mange kris?
28¿Ni llanglan, ni asundan
kai o Del ostade si o Gazda,
kai cherda sa e phuv?
Ni jasarel e vlaga ta ni chiniol nikada,
ta niko nasti resel kai leko bizaipe.
29Vou del zor gole kai si chinio,
ta del vlaga gole kai inai le ni iek zor.
30E chaurre jasaren e vlaga ta chinion,
e terne chinion ta peren,
31a gola kai uzdinpe ando Del
ka avel len nevi zor, ka furian sargo e agila,
ka prasten ta ni ka chinion,
ta ni ka jasaren e vlaga.#Sal 25.3; 103.5; Is 49.23.
Currently Selected:
Isaias 40: BACHRO
Highlight
Share
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
