1 Kronikas 16
16
1Ondaka thode e arka e Devleki ande iek chara kai o David vazdia lake. Ta cherde kurbanura phabarde e Devleke ta kurbanura pala e pas. 2Ta kana o David getosarda te del e kurbanura, blagosisarda e foro ando anav e Devleko. 3Ta o David fulada sa e llenenge katar o Israel, murusenge ta diskinienge, suakone dia iek marrno, kotor marrno cherdo katar o datil ta kotor marrno cherdo katar e drak suki.
4O David ikharda e levitonen kai sea te radin angla e arka e Devleki te denpe golli, te den fala ta te blagosin e Devle, o Gazda e Israeleko. 5O gazda saia o Asaf mapalal saia o Zakarias, mapalal o Jeiel, o Semiramot, o Jeiel, o Matatias, o Eliab, o Benaias, o Obed Edom ta o Jeiel kai sea len ezgode te basalen, salteriura ta arpe. O Asaf basalela ande kotora sastrune, 6ta e popura o Benaias ta o Jajaziel suako drom basalena ande tuturuge angla e arka katar e alava e Devleke.
E llili e Davideki te del fala e Devleke
Sal 96.1-13; 105.1-15; 106.47-48
7Isto gua llive o David phenda e Asafeke ta leke phlalenge te blagosin e Devle gia:
8¡Den fala e Devle!
¡Cheren te pinllaren ande phuvia leko anav!
Phenen ande forura so cherda o Del.
9Llilaben leke, llilaben llilia.
¡Den orba katar e bare ezgode kai cherda!
10¡Cheren baripe ande leko baro anav!
¡Te veselinpe e lie
katar e llene kai roden e Devle!
11Roden e Devle ta leki zor
roden le suako drom.
12Den tumen golli katar e bare ta glamne
ezgode kai cherda,
ta katar e zakonura kai phenda.
13Tumen, o porodo katar leko sluga o Israel,
tumen, o porodo katar o Jakob
sen leke esvirime.
14¡Vou si o Gazda, amaro Del!
¡Vou gazdaril pe sa e phuv!
15I te nakhena milia porodura
ni ka bristarelpe kai dia po alav,
16o alav kai dia e Abraame ta e Isaake,#Jen 12.7; 17.8; 26.3.
17ta kai chacharda sargo zakono e Jakobeke,
iek alav ostade e Israeleke,
18kana phenda:
Ka dav tut e phuv katar o Kanaan,
kai si te le so perel tut.#Jen 28.13.
19A von sea cherricha llene,
von sea avere phuvienge,
20ta llana foro forote
ta phuv phuviate.
21O Del ni mukla te dukhavel len niko,
a soke volisarda len, dukhada e charonen
22ta phenda e charonenge:
Te na dodin e llenen kai me esvirime,
na dukhaven me profetanen.#Jen 20.3-7.
23Llilaben en Devleke sa o sueto,
phenen suako llive leko braduipe.
24Den orba katar leko baripe,
ta katar e glamne ezgode kai cherda
angla sa e forura ta e phuvia,
25soke o Del si baro
ta prema le si o blagosipe,
letar si te dara mai but neko katar sa e dela,
26soke sa e dela katar aver phuvia ni mol len niso,
a o Del cherda o miloso.
27¡But baripe si angla le!
¡But zor ta sukaripe si ande leki chara!
28E viche ta e forura
den e Devle e zor ta o baripe.
29Den e Devle o liubao kai si prema leko anav.
Den ande leki bar, ta anen leke so si dino.
Den changa angla o Del ando sukaripe katar e santidad.#Sal 29.1-2.
30¡Daran angla le sa e phuvia!
Vou chapenisarda e phuv te na miskolpe.
31¡Te veselinpe o miloso ta e phuv!
Te phenen ande sa e phuvia:
¡O Del charoil!
32¡Te basel e mora ta sa so si andre!
¡Te veselilpe o vos ta sa so si andre!
33¡Te urkin veselimatar e kasta kai si ando vos,
soke o Del avel te krisil e phuv!
34Den fala e Devle, soke o Del si lacho,
soke leko volipe si ostade.
35Phenen leke gia:
¡Braduisar amen Devla,
tu san amaro braduimari!
¡Chide amen maskar e phuvia,
te blagosi cho santo anav,
ta te blagosi tut veselimaia!
36¡Blagosime te avel o Del katar o Israel,
ostade, ostade!
Ta sa o foro phenda:
Gia te avelpe, ta blagosisarde e Devle.
37Ondaka o David mukla angla e arka katar e alava e Devleke, e Asafe ta leke phlalen te radin ta te cheren so trubul suako llive. 38Ta te arakhen e arka thoda e Obed Edome ta sovardes ta ojto llenen katar leki familia. Ta e Obed Edome chavo katar o Jedutun, ta e Josae, mukla len te arakhen e udara. 39Ta mukla e Sadoke ta e poponen angla e chara e Devleki kai saia po than vazdino ando Gabaon, 40te den suako drom kurbanura e Devle po altar katar o kurbanoko phabardo, thiarinako ta orachaia, prema sar si pisime ando zakono kai o Del dia e Israele.#Ek 29.38-42; Lv 6.9; Nm 28.3,6. 41Ta lenchar mukla e Emane ta e Jedutune, ta ogolen esvirisarde len prema lenge anava te llilaben e Devleke, soke leki zalba pe amende si ostade.#2 Kr 5.13; Esd 3.11; Sal 100.5; 106.1; 107.1; 136.1; Jer 33.11. 42Lenchar o Eman ta o Jedutun basalena e tuturuge ta e sastrura kai basen ta aver ezgode te sai llilaben e Devleke. A e chave katar o Jedutun arakhena e udara.
43Mapalal sa irisaile kai pe chera ta i o David irisailo kai po cher te blagosil pe familia.#2 S 6.19-20.
Currently Selected:
1 Kronikas 16: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
