1 Kronikas 15
15
O David anel e arka katar o Del o Gazda ando Jerusalem
2 S 6.12-23
1O David cherda peke chera ando foro e Davideko, ta lacharda iek than te thoven e arka e Devleki, ta vazdia lake iek chara. 2Ondaka o David phenda:
Niko nasti inllarel e arka e Devleki, samo e levitura soke o Del esvirisarda len te inllaren la ta te radin leke ostade.#Nm 1.50; 7.9; Dt 10.8; 31.25.
3Mapalal chidia sa e foro katar o Israel ando Jerusalem te anen e arka e Devleki ando than kai lachardaia. 4Ta i chidia e chaven katar o Aaron ta e levitonen. 5Katar o Koat chidinaile stotina ta bis. O Uriel kai saia o gazda ta leki familia. 6Katar o Merari chidinaile dui stotine ta bis. O Asaias kai saia o gazda ta leki familia. 7Katar o Gerson chidinaile stotina ta tranda. O Joel kai saia o gazda ta leki familia. 8Katar o Elisafan chidinaile dui stotine. O Semaias kai saia o gazda ta leki familia. 9Katar o Jebron chidinaile ojtovardes. O Eliel kai saia o gazda ta leki familia. 10Katar o Uziel chidinaile stotina ta desudui. O Aminadab kai saia o gazda ta leki familia.
11Mapalal o David ikharda e Sadoke ta e Abiatare, e poponen, e levitonen o Uriel, o Asaias, o Joel, o Semaias, o Eliel ta o Aminadab, 12ta phenda lenge:
Tumen kai sen gazda pe familie katar e levitura, chistosaon tumare familienchar te sai anen e arka katar o Del o Gazda, o Del e Israeleko, ando than kai lachardem. 13Soke e purvo drom tumen ni cherden le sar phenela le o Del, goleke dukhada amen, pala gua kai ni puchlam le sar saia te chera le.
14Ondaka e popura ta e levitura chistosaile te sai anen e arka katar o Del o Gazda, o Del e Israeleko. 15Ta ande e arka e Devleki pe pe dume thodi pe pulsura, sar phendaia le o Moises prema o alav e Devleko.#Ek 25.13-14; Nm 1.50; 7.9.
16Ta i o David phenda e gazdenge katar e levitura te ikharen llenen te llilaben ta te basalen ande salteriura, ande arpe ta ande sastrura kai basen, te basalen ta te asundol lengo avazi veselimaia. 17Ta e levitura ikharde e Emane chavo katar o Joel ta e Asafe chavo katar o Berekias. Katar o Merari ta leke phlal, e Etane chavo katar o Kusaias. 18Ta i ikharde avere phlalen kai sea o Zakarias, o Jaaziel, o Semiramot, o Jeiel, o Uni, o Eliab, o Benaias, o Maasias, o Matatias, o Elifeleu, o Miknias, o Obed Edom ta o Jeiel kai arakhena e udara.
19O Eman, o Asaf ta o Etan llilabena ta basalena ande kotora tuchne. 20O Zakarias, o Aziel, o Semiramot, o Jeiel, o Uni, o Eliab, o Maasias ta o Benaias basalena ande salteriura po Alamot. 21O Matatias, o Elifeleu, o Miknias, o Obed Edom, o Jeiel ta o Azazias basalena e arpe pe ojtoto te inllaren angle o basaldipe. 22Ta o Kenanias o mai preche maskar e levitura, thode le te sikavel len te llilaben, soke vou llanela but ande gola ezgode. 23Gola kai arakhena e udara katar e arka sea o Berekias ta o Elkana. 24E popura o Sebanias, o Josafat, o Natanael, o Amasai, o Zakarias, o Benaias ta o Eliezer basalena e tuturuge angla e arka e Devleki. I o Obed Edom ta o Jeias arakhena o udar katar e arka.
25Ondaka o David, e purane katar o Israel ta e gazda e milienge llele veselimaia kai o cher katar o Obed Edom te anen e arka e Devleki. 26Ta sar o Del pomozila e levitonen kai inllarena e arka, die kurbano efta telchura ta efta bakre. 27O David saia furiado ando lino but sukar, ta i e levitura kai inllarena e arka, e levitura kai llilabena ta o Kenanias kai sikavela e llenen te llilaven, llala anglal. Ta po David saia iek efod cherdo katar o lino. 28Gia sa e llene katar o Israel inllarena e Devleki arka katar e alava, urkina veselimatar ta basalena e tuturuge, basalena ande sastrune kai basen, ande salteriura ta e arpe.
29Kana e arka katar o Del avili ando foro e Davideko, e Mikal chorri e Sauleki, dikhla katar iek penllerava sar o charo jutela ta chelela, ta marda letar espurnia ande po lio.
Currently Selected:
1 Kronikas 15: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
