Maluko 15

UYesu pawutalo pa Pilato

(Matayo 27:1-2, 11-14; Luka 23:1-5; Yohana 18:28-38)

1Pamilaawo pe kúkiye, avateekedzi avakomi, pamwinga na vavaha va Vayahudi, avawulanidzi va milagililwe ni kiwungu kyonda ikya Vayahudi viilundanaga, viikwidiingʼanaga vamutaahe uYesu. Neke vamupingage, vamunyamulage, vamugotolage kwa Pilato.#15:1 Pilato Uyu aali Muloma, ye aatemile umugoola gwa Yudeya. 2UPilato akumuwuudzaga uYesu iitigilaga, “Ongo, uveeve ye mwene uMutwa va Vayahudi?” UYesu akumuhigaga iitigilaga, “Yuuve ye úlongile ulo.” 3Avateekedzi avakomi vakumutaahaga uYesu mu madzwi goloofu. 4UPilato akumuwuudzaga iitigilaga, “Usiihiga kiinu? Lolage uwoloofu wa ngʼaani dze vakukutaaha!” 5Neke uYesu atanage ukuhiga kiinu, uPilato iidzumaga mbandu.

UYesu iihigwa ukukomwa

(Matayo 27:15-31; Luka 23:13-25; Yohana 18:38b–19:16)

6Pa kyaka kya Paasaka, uPilato aavedzaga ni mivedzehedze gya kumudindulila umudindilwa yumwinga ye vamusakaga avaanu. 7Aali kwali umuunu ye aatambulwaga Balaba, ye aali mu ndinde pamwinga na vagalusi avangi, wiimila wa kukoma pa musika gwa kuyigaluka isilikaale. 8Neke ililugu lya vaanu lihelelage kwa Pilato kumunyilika avadindulile umudindilwa yumwinga, ngita kye gyali mivedzehedze gyakwe. 9UPilato akuvawuudzaga iitigilaga, “Mwisaka ndivadindulile uMutwa va Vayahudi uyo?” 10Aalongile ewo, pakuva aludzeeliye ukutigila avateekedzi avakomi vamugotuwe uYesu wiimila wa giila dzaawo hela.

11Neke avateekedzi avakomi vavafundage avaanu vamunyilike avadindulile uBalaba. 12UPilato akuvawuudzaga kangi iitigilaga, “Uyu ye mwitigila Mutwa va Vayahudi, lino ndimulimile kiki?” 13Avaanu vonda viiyooyaga viitigilaga, “Atovelelelwe!” 14UPilato akuvawuudzaga kangi iitigilaga, “Kye kiki? Áhokile kiki?” Neke kangi aveene vaginage ukuyooya vatigilage, “Atovelelelwe!”

15UPilato akuvadindulilaga uBalaba, pakuva aasakaga ukulikeeledza ililugu lya vaanu. Iilagidzaga avakolakyanda vaakwe vamutove uYesu ni mikopodzi, viilimaga ewo. Neke amugotolage uYesu ku vakolakyanda, ukuta vamutovelelele pa kipindulihidzo.

Avakolakyanda vakumuyeyewula uYesu

(Matayo 27:27-31; Yohana 19:2-3)

16Avakolakyanda vakumusindikaga uYesu mugati mu lipaala lya litengule, viikemeelaga vakolakyanda avangi vonda, viilundanaga. 17Vakumufwalidzaga umwingila gwa mulangalanga,#15:17 Mulangalanga Iyi yaali langi ya mwenda gwa kufwala umutwa. viitivaga ingeela ya miifwa vakumufwalidzaga pa mutuwe. 18Neke vamuyeyewulage vatigilage, “Aadze senga, ve Mutwa va Vayahudi!” 19Kangi na kangi vamutovaga pa mutuwe nu ludete, vamufuunyilaga amati, vaafugamaga kuno viidungila ukumuginiya. 20Pe vaaviye vámuyeyewiise, vakumufuulaga umwingila gwa mulangalanga, vakumufwalidzaga imyenda gyakwe. Neke vahelelage nave kwivala kumutovelelela pa kipindulihidzo.

UYesu iitovelelelwa pa kipindulihidzo

(Matayo 27:32-44; Luka 23:26-43; Yohana 19:17-27)

21Pe vali mu ngʼaasi, viitaangʼanaga nu muunu yumwinga ye aatambulwaga Simoni, udadaawo va Alekisanda nu Lufo, ukuhuma ku wudzenge wa Kilene. Uyo aahumile ku mugunda. Neke avakolakyanda vamugagiilidzage anyamule ikipindulihidzo kya Yesu. 22Viihelelaga nu Yesu, viifikaga apoono apiitambulwa Goligota,#15:22 Goligota Lole IGoligota ku Figanulo. kwe kutigila, Libangʼa lya Mutuwe. 23Vakumupeelaga idifwayi nyandze ni manemane,#15:23 Manemane Ugu gwali mugoda gwa kugaadza nu kukeefya uwuvafi. neke uYesu akaanage ukunyuwa. 24Vakumutovelelelaga pa kipindulihidzo. Neke vasoolanilage ulusolo ulwa kugavana imyenda gyakwe, ukuta vadzeele nayula gwe iinyamula.#Ndzimbililo 22:18

25Umusika gwe vamutoveleliye kyali kivalilo kya wudatu pamilaawo. 26Pakyanya pa kipindulihidzo vaatoveleliye amadzwi ga kumutaaha agaasimbiilwe ukutigila,

uyu ye yesu, mutwa va vayahudi

27Apoono apo aatoveleliilwe pamwinga na vagonadaasi vavili, yumwinga ulubali ulwa kundiyo, uyungi kungʼigi. [28Neke uWusimbe uWiimike wukwilage uwiitigila, “Aavaliliilwe pamwinga na vahosi.”#Isaya 53:12]#15:28 Amadzwi aga simoogali mu wusimbe uwungi uwa kataali.

29Avaanu avaahelanidzaga ingʼaasi iyo, vamuligaga kuno viiyudza imituwe gyawo viitigila, “Ha! Uveeve waatigiye wiimamula itembeli nu kudzenga mu figono fidatu. 30Lino wiipoke yuuve, wiike pa kipindulihidzo!” 31Ndeeni na vateekedzi avakomi na vawulanidzi va milagililwe, vamuyeyewusaga viitigila, “Akiipokaga avangi, neke kangi iilemwa ukwipoka mwene! 32Ngana uyu ye Mesiya, kangi Mutwa va Vaisilaheli, apo lino iike pa kipindulihidzo, ukuta twilolele, apo tukumufuuwa.” Kangi avaatoveleliilwe pamwinga nave, navo vamuyeyewusaga.

UYesu iifuwa pa kipindulihidzo

(Matayo 27:45-56; Luka 23:44-49; Yohana 19:28-30)

33Ukuvangila ikivalilo kya mutanda (6.00) pa muunyi, ukufikila ikivalilo kinyigondza (9.00), ikiisi kiigwidzaga mu nyi yonda. 34Neke pa kivalilo kinyigondza uYesu iikoolaga iitigilaga, “Eloyi, Eloyi, lama sabakitani?” Kwe kutigila, “Nguluvi vangu, Nguluvi vangu, kye kiki úundekile?”#Ndzimbililo 22:1 35Avaanu avangi aviimile baaho pe vaapuliike ulo, viitigilaga, “Mupulikidze, akumukemeela umuvidzi uEliya.”#15:35 Akumukemeela umuvidzi uEliya Avaanu vaahoodzaga ewo, pakuva uNguluvi amunyamuwe uEliya kuhelela kukyanya kitafuwa, 2 Vatwa 2:11. Kangi aVayahudi vaahuuvilaga ukutigila, uEliya alaadza kangi kwe naanyi, umusika gwa kwadza kwa Kilisiti, Malaki 4:5. 36Umuunu yumwinga iinyilaga kisaatu, iidzabikaga akenda mu difwayi indzadzu,#15:36 Difwayi indzadzu Lole Idifwayi ku Figanulo. iipatikaga mu ludete, iipelanidzaga pa mulomo gwa Yesu, ukuta anyuwe#Ndzimbililo 69:21 iitigilaga, “Mumuleke twilolele ngana uEliya iikwadza mu kumwisa.” 37Neke kangi uYesu akoolage, gwidumukaga. 38Ilibupa lya mwenda mu tembeli,#15:38 Ilibupa lya mwenda mu tembeli Ili lyabaagulaga aPiimike pa Piimike nu kungi. Lole Itembeli ku Figanulo. liideemukaga fipiidza fivili ukuhuma pakyanya ukufikila paanyi. 39Umuvina va kipuga kya vakolakyanda ye iimile baaho iilola uYesu kye gwidumuka, iitigilaga, “Ndakyene uyu akali Muswamuve va Nguluvi!”

40Vaali poovali avamwayuuva vakeefu, viimile pataali viilola idziilimika, avo vaali uMaliya Magadalena,#15:40 Magadalena UMaliya aali ni litaawa ili, pakuva aahumaga ku wudzenge uwaatambulwaga Magadala. uSalome, uMaliya ungʼina va Yakobo umudebe nu Yose. 41Avo ve veene avaali vámuniniiliye nu kumuwombela uYesu pe aali ku Galilaya. Kangi baaho vaali poovali avamwayuuva avangi voloofu avaadzile pa Yelusalemu pamwinga nave.

UYesu iisiilwa

(Matayo 27:57-61; Luka 23:50-56; Yohana 19:38-42)

42Ikigono ikyo kyali Kihaanu, kyali kya kwigelanidza ulwa Sabato. Pe yaafikile ikyamihe, 43iikwadzaga umuunu yumwinga va kiwungu ikya Vayahudi, ye aatambulwaga Yosefu umuhuma ku Alimataya. Uyo aali mutambule ku vaanu vonda, kangi aahuuvilaga ukwadza kwa wutwa wa Nguluvi. Iihelelaga kitoogopa kwa Pilato ukumunyilika umufimba gwa Yesu, ukuta akagusiile.#15:43 Akagusiile AVayahudi vaalagiidzwe ukusiila umufimba gwa muunu ye átoveleliilwe pa kipindulihidzo ikigono kiikyo, Lwiwuko 21:22-23. 44UPilato iigangukaga, akumukemeelaga umuvina va kipuga ikya vakolakyanda uyo, amuwuudze ngana uYesu áfuwe. 45Suwe pe aaviye ápuliike ulo, akumwidikilaga uYosefu anyamule umufimba gwa Yesu.

46Neke uYosefu ahelelage kugula umwenda ugwa pamba, iisage umufimba, agupilingidzage nu mwenda umuvalafu. Neke aguviikage mu mombwe iyaabuguliilwe kwave mu lutalaawe.#15:46 Mu lutalaawe Mu mivedzehedze gya Vayahudi gya kusiila avaanu, vavaviikaga ávafuwe mu manga, nu kudinda ni liganga likomi pa mulyango. Iibiiluhidzaga iliganga ilikomi ukudinda pa mulyango gwa mombwe. 47Apo vaali poovali uMaliya Magadalena nu Maliya ungʼina va Yose, avapaweene apoono pe gwagoniikwe umufimba gwa Yesu.

Currently Selected:

Maluko 15: BEZ

Highlight

Copy