Maluko 16

UYesu iidzulubuka

(Matayo 28:1-8; Luka 24:1-12; Yohana 20:1-10)

1Pa kyamihe, iSabato pe yaaviye yíhelaniidze, uMaliya Magadalena, uSalome nu Maliya ungʼina va Yakobo, viigulaga amafuta amanofu, ukuta vahelele vakagubake umuvili gwa Yesu. 2Ikigono ikya Mulungu pamilaawo, ilidzuwa pe liihohomoka, viihelelaga ku mombwe. 3Pe vaali mu ngʼaasi viivangaga ukwilondza veene viitigila, “Ye ani ye ahadza iibiilusa iliganga ilili pa mulyango gwa mombwe?” 4Iliganga ilyo lyali likomi mbandu. Neke pe vaafikile pa mulyango, viiwonaga iliganga líbiilwiswe lili pa lubali. 5Viikwingilaga mu mombwe, vakumuwonaga umudiimi yumwinga íikalile ulubali ulwa kundiyo áfwalile umwingila ugwingʼalita. Suwe viikagahalaga mbandu.

6Neke umudiimi uyo avalongelage atigilage, “Mutane ukukagahala! Mukumusakula uYesu uva ku Nasaleti ye akaatoveleliilwe pa kipindulihidzo. Ádzulubwike! Sipwali apa. Mulolage pe vakamugoniike. 7Lino muhelelage mukavalongele avanyigendwa vaakwe nayu Petulo ukutigila, ‘Ávalonguwe ukuhelela ku Galilaya, uko kwe kwene kwe muhadza mukumuwona ngita kye akavalongiye.’#Maluko 14:28 ”

8Avamwayuuva avo viihumaga mu mombwe, viihegaga apo lunyilo, kuno viihilila nu koogopa, kangi viiganguka. Vasamulongiye ulo nambe muunu, pakuva voogwipe mbandu.

UYesu akumuhumila uMaliya Magadalena

(Matayo 28:9-10; Yohana 20:11-18)

[ 9UYesu pe aaviye ádzulubwike ikigono ikya kutala ikya mulungu, akumuhumilaga tandi uMaliya Magadalena, ye mwene uYesu ye amulosiidze imibepo imiviifu mufungʼati (7). 10Uyo iihelelaga kuvalongela avo avaali pamwinga nu Yesu avaahuguvalaga nu kuvemba. 11Pe vaaviye vápuliike ukutigila uYesu ali muumi, kangi uMaliya Magadalena ámuweene, vasaafuuviilwe.

UYesu akuvahumila avanyigendwa vavili

(Luka 24:13-35)

12Pe dzaaviye dzílimiike idzo, uYesu akuvahumilaga mu luhwano ulungi, avanyigendwa vavili avaawuyaga ukwawo ukuhuma ku Yelusalemu. 13Neke navo vapilukage ukuvalongela avayaawo, avo navo vasavafuuviilwe.

UYesu akuvatuma avanyigendwa

(Matayo 28:16-20; Luka 24:36-49; Yohana 20:19-23; Malimo ga Vatume 1:6-8)

14Pambele akuvahumilaga avanyigendwa vanyikyumi na yumwinga (11) pe vaali mu kuliya. Akuvakenyelaga ulwa kitafuuwa nu wukiliitafu wa numbula dzaawo, ulwa kitavafuuwa avo avamuweene pe ádzulubwike. 15Neke uYesu avalongelage atigilage, “Muhelelage ku nyi dzonda mukadalikage iMola iNofu ku figawa fyonda. 16Ye iifuuwa nu kudzabikwa, alaapokwa. Ye asiifuuwa, alaahigwa. 17Avo aviifuuwa valaahuufyaga ifimanyilo ifi. Viilosaga imibepo imiviifu mu litaawa lyangu, kangi viilongaga indongele imiya. 18Viikwibataga amayoka na mawoko gaawo, nde vanyuwe ifiifwisa vasilemala nambi. Vakuvaviikilaga amawoko avatamwa navo viiponaga.”

UYesu iikwinuka kukyanya

(Luka 24:50-53; Malimo ga Vatume 1:9-11)

19UMutwa Yesu pe aaviye álongile navo, iikwinukaga kukyanya, akwikalaga ku lubali ulwa kundiyo lwa Nguluvi. 20Avanyigendwa vaakwe viivangaga ukudalika konda, nayu Mutwa iilimasaga navo amalimo nu koolela ilidzwi lyakwe, mu fimanyilo fye vaahuufyaga.]#16:9-20 Amadzwi aga simoogali mu wusimbe uwungi uwa kataali.

Currently Selected:

Maluko 16: BEZ

Highlight

Copy