Maluko 14
14
Imigelanihidze gya kumukoma uYesu
(Matayo 26:1-5; Luka 22:1-2; Yohana 11:45-53)
1Fyasigiye figono fivili ukufikila ikyaka kya Paasaka#14:1 Ikyaka kya Paasaka Lole ku Figanulo. ni kyaka kya mikaate igingaya luhaafu.#14:1 Kyaka kya mikaate igingaya luhaafu Lole Ikyaka kya mikaate igingaya luhaafu ku Figanulo. Avateekedzi avakomi na vawulanidzi va milagililwe vaatemulaga ingʼaasi kinyele iya kumwibatila uYesu, ukuta vamukome. 2Viitigilaga, “Fitane ukuvedza figono fya kyaka, ukuta avaanu vatane ukuhula ilyowo.”
Umwayuuva akumuhululidzila amafuta uYesu
(Matayo 26:6-13; Yohana 12:1-8)
3Umusika ugo, uYesu aali ku Betaniya mu nyumba ya Simoni ye aali nu wutamwa uwa kinyamuvili pa kutala. Pe ali kuliya, iikwingilaga umwayuuva ányamuwe isupa ya liganga iyinya mafuta matalamu. Amafuta ago gaali nu lunuusi lunofu, kangi gaali ga magoobeli goloofu. Gaawuyiipwe ukuhuma ku kimelo ikiitambulwa naludo. Neke apimulage isingo ya supa iyo, amuhululidzilage uYesu pa mutuwe. 4Avaanu avangi avaali baaho pe valuweene ulo, viiviipaga hiilo viitigilaga, “Kye kiki ukuyadza amafuta matalamu ago? 5Kiba ngana gakali gagudzwe ukulutila idinaali#14:5 Idinaali Aga gaali magoobeli ga Valoma. Idinaali yimwinga yaalingʼiine nu luhombo lwa mulima-malimo mu kigono kimwinga. magana gadatu (300), neke amagoobeli ago vagavilwe avahangala!” Avaanu viivangaga ukumukenyela mbandu umwayuuva uyo.
6UYesu akuvalongelaga iitigilaga, “Mumuleke! Kye kiki mukumudaasa? Amalimo aga ge áandimiye manofu. 7Avahangala muli navo ifigono fyonda, ponda pe mwikeela musiilemwa ukuvatanga. Neke kangi uneene musili naane ponda. 8Umwayuuva uyu álimile mwe ágeliye. Águbakile amafuta umuvili gwangu ukugugelanidza ukusiilwa kwangu.#14:8 Águbakile amafuta umuvili gwangu ukugugelanidza ukusiilwa kwangu Gyali mivedzehedze gya Vayahudi ukubaka amafuta manofu umuvili gwa muunu ye áfuwe, ukugugelanidza ukusiilwa. Umwayuuva uyu aalimile ewo kitadzeela ukutigila, ikigono ikya kufuwa kwa Yesu kíhegeliye. 9Ndakyene ndikuvalongela ndiitigila, ponda pe yiidalikwa iMola iNofu mu lidugulu lyonda, avaanu valiiwuka nu kugalonga amalimo aga manofu ge áandimiye umwayuuva uyu.”
UYuda Isikalyote akumusutula uYesu
(Matayo 26:14-16; Luka 22:3-6)
10Neke baaho uYuda Isikalyote, yumwinga mu vanyigendwa vanyikyumi na vavili (12), ahelelage ku vateekedzi avakomi, ukuta amusutule uYesu ukwawo. 11Pe vaaviye vápuliike ulo viikeelaga hiilo, neke vamuhuuvidzage uYuda ukumupeela amagoobeli. Suwe uYuda iivangaga ukutemula umusika umunofu ugwa kumusutula uYesu ukwawo.
Ukwigelanidza ulwa Paasaka
(Matayo 26:17-25; Luka 22:7-14, 21-23; Yohana 13:21-30)
12Ikigono ikya kutala ikya kyaka kya mikaate igingaya luhaafu kiifikaga. Ikyo kye kigono ikya kuhindzwa indzanangʼolo iya Paasaka. Avanyigendwa va Yesu vakumuwuudzaga viitigilaga, “Kwe kwiya kwe wiisaka tuhelele tukakugelanidzile pa kuliila ikyakuliya kya Paasaka?”
13UYesu iitumaga avanyigendwa vavili iitigilaga, “Muhelelage ku wudzenge wa Yelusalemu, mudzitaangʼana nu mwadaada íitwikile indziilo ya lulenga. Mumuniniilage 14ukufikila mu nyumba ye iikwingila, apo mumulongelage umunya nyumba uyo mutigilage, ‘UMuwulanidzi iiwuudza ukutigila, “Kigenda kwiya ikiyumba kya vagendzi? Ndiisaka ukuliilasa na vanyigendwa vangu ikyakuliya kya Paasaka.” ’ 15Uyo ahadza akuvawoneesa ikiyumba ikikomi kya kukyanya ku goloofwa íkigelaniidzwe pa kwikala. Umo mwe mwene mukatugelanihidzile.”
16Avanyigendwa viihelelaga ku wudzenge, neke vakawonage dzonda dzili ngita kye ávalongiye uYesu. Neke vagelanidzage ikyakuliya kya Paasaka. 17Pe yaafikile ikyamihe, uYesu pamwinga na vanyigendwa vaakwe vanyikyumi na vavili viifikaga mu kiyumba ikyo. 18Pe vali mu kuliya, uYesu akuvalongelaga iitigilaga, “Ndakyene ndikuvalongela ndiitigila, yumwinga umwenyo ahadza akuusutula, uyo ye mwene ye iiliilasa naane!”#Ndzimbililo 41:9 19Avanyigendwa viihuguvalaga mbandu, yumwinga yumwinga akumuwuudzaga uYesu iitigilaga, “Ongo, ndiivedza siye neene?” 20UYesu iihigaga iitigilaga, “Ye yumwinga umwenyo vanyikyumi na vavili, ye iidzaba umukaate mu kitonga pamwinga naane. 21Ndakyene uMuswamuve va Muunu iihelela kukomwa, ngita kye lúsimbiilwe wiimila wa mwene. Neke kangi ali nu lukali uyo ye akumusutula uMuswamuve va Muunu! Kiba umuunu uyo akali atane ukuholwa.”
Ulukeelanilo lwa wusililo
(Matayo 26:26-30; Luka 22:14-20; 1 Vakolindo 11:23-25)
22UYesu na vanyigendwa vaakwe pe vali mu kuliya, iinyamulaga umukaate, akugufuunyililaga, iimegulingʼasaga, akuvapeelaga avanyigendwa vaakwe, iitigilaga, “Kote muliyage, ugu gwe muvili gwangu.” 23Neke anyamulage ikinywelo ikili ni difwayi, amuhongedzage uNguluvi, avapeelage, vonda vanywelage ukuhuma umo. 24Iilongaga iitigilaga, “Iyi ye danda yangu ya lufingo,#14:24 Lufingo Lole Ulufingo ku Figanulo. iyiikwitika wiimila wa voloofu. 25Ndakyene ndikuvalongela ndiitigila, sindilaanyuwa kangi idifwayi ukufikila ikigono pe ndilaanyuwa idifwayi imiya ku wutwa wa Nguluvi.” 26Neke viimbage ulwimbo lwa kumulumba uNguluvi,#14:26 Ulwimbo lwa kumulumba uNguluvi AVayahudi umusika pe vaavedzaga vámalile ukuliya ikyakuliya kya Paasaka, viimbaga Ndzimbililo 113-118. vahegage vahelelage ku Kidunda kya Miseyituni.
UYesu iilonga ukutigila uPetulo ahadza akumukaana
(Matayo 26:31-35; Luka 22:31-34; Yohana 13:36-38)
27UYesu akuvalongelaga avanyigendwa vaakwe iitigilaga, “Unyeenye nyivonda muhadza mwinyila nu kuundeka, pakuva lúsimbiilwe ukutigila,
‘Ndihadza ndikumutova umudiimi va ngʼolo,
nadzi ngʼolo dzihadza dziipalaangʼana.’#Sakalya 13:7
28“Neke kangi pe ndiivedza ndídzulubwike, ndihadza ndikuvalongola ukuhelela ku Galilaya.” 29UPetulo iitigilaga, “Nde vavedzage vakukuleka vonda, uneene sindikukuleka.” 30UYesu akumuhigaga iitigilaga, “Ndakyene ndikukulongela ukutigila, ikilo iya neengʼuli pe yisinaa yivika indzogolo ulwa kavili, wiivedza úungʼaanile nyakadatu.” 31UPetulo iikangadzaga hiilo iitigilaga, “Nde ndivedzage ndili munya kufwilasa, uneene sindikukaana nambi!” Avanyigendwa avangi vonda, navo viilongaga ndeeni.
UYesu iilapangila ku Getisemane
(Matayo 26:36-46; Luka 22:39-46)
32UYesu na vanyigendwa vaakwe vaaheliye apoono apiitambulwa Getisemane, akuvalongelaga iitigilaga, “Mwikale baaha, uneene pe ndiihelela kulapangila.” 33Akuvanyamulaga uPetulo, uYakobo nu Yohana iihegaga navo. Neke uYesu avangage ukuhuguvala nu kunyengʼemala hiilo, 34atigilage, “Inumbula yangu yili nu wuhuguvafu mbandu, ngita kufuwa. Mwikale baaha, muvedzage miiho.” 35UYesu aahegeliye pawutalo padebe, iigwisile paanyi kinyalileme, aalapangilaga kwa Nguluvi iitigila, ngana lwivagila, amuhedzehedze umusika gwa mumuko ugo. 36Mu ndapangilo idzo iitigilaga, “Aba,#14:36 Aba Mu ndongele ya Kialamayo, kwe kutigila Daada. ve Daada kisikukulema kiinu. Ndiinyilika uunyedzehedze ikinywelo kya mumuko iki. Neke kangi si kutigila lulimikage lwe ndíkeeliye uneene, nda haamu, lulimikage lwe úkeeliye uveeve!”
37Iipilukaga, iiwonaga avanyigendwa vonda vágoneeliye. Neke amuwuudzage uPetulo atigilage, “Uveeve Simoni, úgoneeliye? Úlemiilwe ukuvedza miiho nambe kivalilo kimwinga? 38Muvedzage miiho nu kulapangila, ukuta ingemyo dzitane ukuvalema. Inumbula dzeenyo dzíitawuwe, neke kangi imivili gingaya ngufu.”
39Iihelelaga kangi kulapangila dziidzila dze álapangiye ulwa kutala. 40Pe iipiluka, iiwonaga vágoneeliye kangi, pakuva amiiho gaawo gaali ni tulo. Sivaludzeeliye ulwa kulonga. 41Iihelelaga kulapangila ulwa wudatu. Pe aapilwike, iitigilaga, “Mwave múgoneeliye nu kupola? Suwe! Ikivalilo kífikile. Lolage, uMuswamuve va Muunu iisutulwa mu mawoko ga vanya ndzanangifu. 42Mwime! Tuhege! Lolage, umunya kuusutula ali biihi.”
UYesu iikwibatwa na valongodzi va Vayahudi
(Matayo 26:47-56; Luka 22:47-53; Yohana 18:3-12)
43UYesu pe ali mu kulonga idzi, uYuda yumwinga mu vanyigendwa vanyikyumi na vavili, iifikaga pamwinga ni lilugu lya vanya mapanga ni sondzo. Vátumiilwe ukuhuma ku vateekedzi avakomi, avawulanidzi va milagililwe na vavaha va Vayahudi. 44Umunya kumusutula uyo aali ávapeeliye ikimanyilo ukutigila, “Umuunu ye ndihadza ndikumunoonela pe ndikumuhungila, ye mwene. Mumwibatage muhegage nave ali mu mawoko ga vakolakyanda.”
45Umusika guugo, uYuda iihelelaga kwa Yesu, akumulongelaga iitigilaga, “Muwulanidzi!” Akumunoonelaga. 46Avaanu avo vakumwibataga uYesu. 47Neke yumwinga mu avo avaali pamwinga nu Yesu, ahoonolage kisaatu ilipanga, amumyatulage ilisiikidza umulimila-vangi va muteekedzi umuvina. 48UYesu akuvawuudzaga iitigilaga, “Mwádzile na mapanga ni sondzo kuundzibata, ngita ndikuyigaluka isilikaale? 49Ifigono fyonda, ndikali naanye mu lipaala lya tembeli, ndikiiwulanidzaga kangi musikaandzibatiige! Neke kangi dzonda idzo dzíhumiye, ukuta uWusimbe uWiimike wukwile.” 50Avanyigendwa vaakwe vonda vakumulekaga uYesu viinyilaga.
51Aali pwali umudiimi yumwinga ye amuniniilaga uYesu, aafwalile umwenda umudekedeke. Vaasakaga ukumwibata, 52umwene akuvalekelaga umwenda mu mawoko gaawo, iinyilaga wufuula.
UYesu iihigwa pa kiwungu ikya Vayahudi
(Matayo 26:57-68; Luka 22:54-55, 63-71; Yohana 18:13-14, 19-24)
53Vakumusindikaga uYesu ku nyumba iya muteekedzi umuvina. Avateekedzi avakomi na vavaha va Vayahudi, pamwinga na vawulanidzi va milagililwe vakumulundanilaga apo.#14:53 Kwe kutigila, kyali pookili ikiwungu ikya Vayahudi mu nyumba iya muteekedzi umuvina. 54Pe vamusindikaga, uPetulo amuniniilaga uYesu pa wutaali, iifikaga pa lipaala lya muteekedzi umuvina. Apo akwikalaga pamwinga na vakolokolooni iikoota mooto.
55Avateekedzi avakomi pamwinga ni kiwungu kyonda ikya Vayahudi,#14:55 Kiwungu kyonda ikya Vayahudi Lole Ikiwungu kya Vayahudi ku Figanulo. viisakulaga uwoolesi wa wudesi uwa kumutaaha uYesu, ukuta vamukome. Neke kangi vasawuweene uwoolesi wuwuvedzaga. 56Avaanu voloofu voolelelaga uwoolesi wa wudesi, neke kangi uwoolesi waawo siwaapuliingʼanaga.
57Avangi mu avo, viimile ukoolela uwoolesi wa wudesi viitigilaga, 58“Tukaapuliike iitigila, ‘Ndihadza ndiimamula aPiimike pa tembeli apaadzengiilwe na vaanu, kangi mu figono fidatu ndiidzenga iyingi iyisiidzengwa na vaanu.’ ” 59Na mu lukaani ulo, uwoolesi waawo siwiidiingʼiine.
60Neke umuteekedzi umuvina iimage pagati, amuwuudzage uYesu atigilage, “Ongo, we woolesi wuki uwu we viileeta avaanu wiimila waako? Usiihiga kiinu?” 61Neke kangi uYesu atanage ukuhiga kiinu. Umuteekedzi umuvina iiwilaga ukumuwuudza iitigilaga, “Uveeve ve Mesiya, Muswamuve va Mufuunywa?” 62UYesu iihigaga iitigilaga, “Ye neene. Neke kangi muhadza mukumuwona uMuswamuve va Muunu íikalile ulubali ulwa kundiyo#14:62 Ulubali ulwa kundiyo Kwe kutigila, uYesu iitemasa nu Nguluvi. ulwa Nguluvi uMunya Ngufu, pe iikwadza mu mafunde ga kukyanya.”#Ndzimbililo 110:1; Danyeli 7:13-14 63Umuteekedzi umuvina iideemulaga umwingila gwakwe, iitigilaga, “Twisakula kiki kangi ukuvedza na voolesi avangi? 64Mwípulikiye yuunye uwulonga fivi waakwe! Unyeenye mwitigila wuli?” Vonda viihigaga viitigilaga, iivagila akomwage.
65Neke baaho avangi vamufuunyilage amati, vamudindage nu mwenda ku miiho, vamutovage ni fundzi, vamulongelage vatigilage, “Salile, ye ani ye ákutovile!” Avakolokolooni vakumunyamulaga, vakumutovaga ifivaate.
UPetulo akumukaana uYesu
(Matayo 26:69-75; Luka 22:56-62; Yohana 18:15-18, 25-27)
66Umusika gonda ugo, uPetulo aali mu lipaala, paanyi pa kiyumba apoono pe aawuudzwaga uYesu. Baaho iikwadzaga umuhindza umulimila-vangi va muteekedzi umuvina. 67Pe aaviye ámuweene uPetulo iikoota umooto akumulolaga mbandu, akumulongelaga iitigilaga, “Uveeve naave ukali pamwinga nu Yesu umuhuma ku Nasaleti yula.” 68UPetulo iikaanaga iitigilaga, “Sindiidzeela nambe kulufika lwe wiilonga uveeve!” Neke ahelelage ku mulyango. Baaho yiivikaga indzogolo.
69Pambele umuhindza uyo akumuwonaga kangi, neke awiilage ukulonga ku vaanu aviimile apo atigilage, “Uyu nave ye yumwinga navo.” 70UPetulo iikaanaga kangi.
Pe gwaviye gúhelaniidze musika mudebe, avaanu avaali víimile apo viitigilaga, “Ndakyene uveeve ye yumwinga mu vaanu avo, pakuva uveeve naave wiihuma kuuko ku Galilaya!” 71UPetulo iivangaga ukwiyiigilidza nu kuyiiga iitigila, “Umuunu ye mwitambula uyo, sindimudzeeliye!”
72Musika guugo indzogolo yiivikaga ulwa kavili, neke uPetulo iiwukage amadzwi gala ge amulongiye uYesu ukutigila, “Indzogolo pe yisinaa yivika ulwa kavili, wiivedza úungʼaanile nyakadatu!” Neke avangage ukuvemba hiilo.
Currently Selected:
Maluko 14: BEZ
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
