Maluko 13

Ifimanyilo fya wusililo wa musika

(Matayo 24:1-28; Luka 21:5-24)

1UYesu pe aaviye iihuma mu lipaala lya tembeli, yumwinga mu vanyigendwa vaakwe akumulongelaga iitigilaga, “Muwulanidzi, lolage amaganga na mayumba aga kye ga kudzumwa!” 2UYesu iipilusaga iitigilaga, “Ukugawona amayumba gonda aga kye makomi? Sikoolili nambe liganga limwinga ililaasigala pakyanya pa liyagwe, gonda galaakunamulwa!”

3UYesu pe aali íikalile pa Kidunda kya Miseyituni ikiiloleengʼana ni tembeli, uPetulo, uYohana, uYakobo nu Andeleya, vakumuhelelelaga ku kinyele, vakumuwuudzaga viitigilaga, 4“Utulongele dzeene idzi dzilaahumila pandali? Kulaavedza ni kimanyilo kiki pe dzili biihi ukwadza?”

5Neke uYesu avalongelage atigilage, “Muvedzage miiho, umuunu ye avedzaga atanage ukuvadzanga. 6Avaanu voloofu valaadzila mu litaawa lyangu, nayula alaatigila, ‘Uneene nde Mesiya,’ valavadzanga voloofu. 7Pe mulaavedza mwipulika imola dza magoha, ni mwepo dza magoha mwali mutane ukwituunidza, pakuva idzo dzinya kuhumila tandi, neke kangi uwusililo wulaavedza waave. 8Pakuva inyi yimwinga yilayaaluka inyi iyingi, nu wutwa wumwinga wulawaaluka uwutwa uwungi. Kulaavedza ni filindima ni lipunge fivala fivala. Dzonda idzo dzilaavedza we waamulilo wa wuvafi ngita wa kuhola umwana.

9“Apo unyeenye mwiyangalilage, pakuva avaanu valavasindika kuhigwa mu nyigilo, nu kutowa mu nyolanilo. Unyeenye mulaasindikwa ku vatemi na vatwa, pakuva unyeenye nye vanyigendwa vangu, ukuta muvedze voolesi ukwawo. 10IMola iNofu idzo dzinya kutala ukudalikwa tandi ku nyi dzonda. 11Pe mulaavedza mwíbiitwe nu kusindikwa kuhigwa, mwali mutanage ukoogopa ikya kulonga. Umusika guugo mulaapeelwa ulwa kulonga, pakuva si yuunye ye mulaalonga, yu Mubepo uMwimike. 12Umaamiye alamusutula umunungʼuve ukukomwa, udaadiye alamusutula umwana vaakwe ukukomwa, avaana valavagaluka avavaha vaawo, na vavaha valaasindikwa ukukomwa. 13Avaanu vonda valavasuula, pakuva unyeenye muli vanyigendwa vangu. Neke kangi umuunu ye aliigugumidza ukufikila ku wusililo, uyo alaapokwa.

14“Pe mulaavedza mukuluwona ‘uluviifyo lwa wanandzi’#Danyeli 9:27; 11:31 lwímile apo aPiimike mu tembeli#13:14 APiimike mu tembeli Lole Itembeli ku Figanulo. pe lusivagiye ukwima, ndiilonga ukutigila ye iikwimba amadzwi ago alufikage. Apo avali mu Yudeya, vaali vanyililage ku fidunda. 15Nave ye ali kukyanya ku likiingʼa, aali iikage nu kunyila, kangi aali atane ukwingila mu nyumba yaakwe kunyamula ikiinu kikivedzaga. 16Ndeeni, ye ali ku mugunda aali atane ukupiluka ku kaaya kunyamula ilikoote lyakwe, nda haamu anyilage. 17Vali nu lukali avamwayuuva avalaavedza nu wuvaha, kangi aviikoongʼeledza mu figono ifyo! 18Mulapangilage, ukuta dzeene idzo dzaali dzitane ukuhumila mu musika gwa ngʼaala. 19Pakuva mu figono ifyo, kulaavedza ni mumuko ngomi, idzisinaa dzihumilaga ukuvangila uNguluvi pe aagavile ilidugulu kufikila lino, kangi sidzilaagela dzihumile nambi. 20Ngana uMutwa Nguluvi akali atane ukukeepudza ifigono ifyo, apo ngali sikwali umuunu ye akali iipokwa. Neke kangi wiimila wa vahaagulwa vaakwe, ákeepwidze ifigono ifyo.

21“Umusika ugo, ngana umuunu akuvalongela unyeenye iitigila, ‘Lolage, uMesiya ali apa,’ enewuli, ‘Ali kula,’ mwali mutane ukufuuwa. 22Pakuva valaahumila avaanu avakwitambula Mesiya na vangi avakwitambula ukutigila vavidzi. Vonda avo valaavedza vadesi. Valaahuufya ifimanyilo ni fidzumo fikomi ukuvadzanga avaanu, nde vavedze vahaagulwa va Nguluvi. 23Unyeenye mwiyangalilage, ndívalongiye dzonda pe dzisinaa dzihumila.

Ukwadza kwa Muswamuve va Muunu

(Matayo 24:29-31; Luka 21:25-28)

24“Mu figono ifyo, imumuko pe dzilaavedza dzídzumbile,

‘uNguluvi alaahambusa ilidzuwa ukuvedza kiisi,

umwedzi gulaatilivadzwa,

25ni nondwe dzilaaguwa paanyi,

kangi uNguluvi alaatendemya ifiinu fyonda ifikomi ifyo ifili kukyanya.’#Isaya 13:10; 34:4; Yoheli 2:10; Amosi 8:9

26“Pa musika ugo, avaanu valamuwona uMuswamuve va Muunu iikwadza mu mafunde ni ngufu ídzilutiye pamwinga ni ndolo.#Danyeli 7:13 27Alavatuma avanyamwandza vavalundase avahaagulwa vonda ukuhuma imbali dzonda dzitayi idza nyi.

Ikihwananidzo kya mudzombe

(Matayo 24:32-35; Luka 21:29-33)

28“Mwiwulanidzage ukuhuma ku mudzombe. Pe mwiwona umudzombe gúvangile ukulembula utuhamba utudeke, apo muludzeelage ukutigila umusika gwa minga guli biihi. 29Luli ewo, na yuunye pe mulaavedza mukudziwona dze ndívalongiye dziilimika, mudzeelage ukutigila uMuswamuve va Muunu ali biihi ukwadza. 30Ndakyene ndikuvalongela ndiitigila, ikivegalo iki kisilaahelanidza ukufikila dzonda idzo pe dzíhumiye. 31Ikyanya ni nyi filaahelanidza, neke kangi amadzwi gangu ndakyene gasilaahelanidza nambi.

Sikwali ye iidzeela ikigono ikya wusililo

(Matayo 24:36-44)

32“Neke kangi sikwali umuunu ye iidzeela ulwa kigono kila enewuli ikivalilo kye alaadzila uMuswamuve va Muunu, nambe vanyamwandza va kukyanya, nambe Muswamuve, yu Daada mwene ye iidzeela. 33Muvedzage miiho! Mwikalage mwígelaniidze! Pakuva musiidzeela umusika ugo gulaavedza ndali! 34Luli ngita umunya nyumba ye aaheliye mu lugendo. Pe iihega, akuvalagidzaga avalimila-vangi nayula amalimo gaakwe, kangi akumulagidzaga umukolokolooni avedzage miiho. 35Lino na yuunye muvedzage miiho, pakuva musiidzeela umusika gwe iikwadzila umunya nyumba uyo, nde iifika pamihe, nde iifika mu kilogati, nde iifika pe yiivanga ukuvika indzogolo, nde iifika lwamilaawo. 36Muvedzage miiho ngana aadze kitinuhidza, atane ukuvawona múgoneeliye. 37Kye ndikuvalongela unyeenye, ndiilonga na ku vaanu avangi vonda, muvedzage miiho!”

Currently Selected:

Maluko 13: BEZ

Highlight

Copy