1 Petulo 4
4
Imiikalile igikumukeeledza uNguluvi
1Lino, pakuva uKilisiti aapumwike mu lwa muvili wiimila wa kudeludza indzanangifu dza vaanu, na yuunye mwikalage lutegase ukupumuka nu kuvedza nu wugulume ngita waakwe. Pakuva umuunu ye iipumuka mu lwa muvili, álekiine ni ndzanangifu. 2Kwe kutigila, asiilongodzwaga nu wudobofu wa muvili, nda haamu, ahadza iisakaga ukumukeeledza uNguluvi mu figono fyonda ífisigiye ifya miikalile gyakwe pe naanyi. 3Umusika goloofu pakataali, mwaniniilaga uwudobofu wuviifu wa vaanu avasimudzeeliye uNguluvi. Mwagendelaga idza wugoni, uwudobofu wuviifu wa muvili, uwugaadzi, ingʼeelanilo dza wuliya hiilo nu wugaadzi, nu kwifuunya ku fihwananguluvi. 4Avaanu avo avasimudzeeliye uNguluvi, viidzuma pakuva musiihangana navo imigendele gyawo imiviifu, kangi vakuvalonga fivi. 5Neke kangi valaanaka vaveene pa miiho ga Nguluvi, ye íigelaniidze ukuhiga avaanu vonda avuumi na ávafuwe. 6Wiimila wa ulo, avaanu avaafuwe, navo vaadalikiilwe iMola iNofu, ukuta vahigwe amalimo gaawo ulwa muvili kulingʼaana na mahoodzo ga vaanu, neke kangi kulingʼaana nu Nguluvi, vavedzage nu wuumi mwa Mubepo uMwimike.
7Uwusililo wa madzwi gonda wúhegeliye. Pa ulo, muvedzage nu luhalawukagudzi pamwinga nu kwiwopa, ukuta muvedzage ni ngufu dza kulapangila. 8Ulukomi ukulutila dzonda, muginage ukwiyenda ulwa ndakyene, pakuva uwende wiigubikila uwoloofu wa ndzanangifu.#Selengo 10:12 9Muvedzage vasandzi ku vayeenyo kitiibungula.
10UNguluvi avapeeliye avafuuwa ifipeelwa ifili poloofu. Nayula iimiililage wunofu ikipeelwa kyakwe ukuvatanga avayagwe, ndeeni akuvawoneesa ulusungu lwa Nguluvi. 11Ngana umuunu ye avedzaga ali nakyo ikipeelwa kya kudalika, adalikage ngita kye ápeeliilwe amadzwi ga Nguluvi yumwene. Ngana umuunu ali nakyo ikipeelwa kya kuvatovela iligendwa avangi, atovelage mu ngufu dze akumupeela uNguluvi. Ndeeni, mu dzonda uNguluvi ahadza iipeelwa indolo wugendela mwa Yesu Kilisiti. Indolo ni ngufu apeelwage mbeepali na mbeepali. Eena.
Ukupumuka wiimila wa Yesu
12Nye vende vangu, mutanage ukudzuma ukutigila, mwipumuka mu ngemyo inalamu, nambe kudziwona ngita kiinu kigendzi. 13Nda haamu, mukeelage, pakuva mwihanga mu mumuko dza Kilisiti, ukuta indolo dzaakwe pe dzilaavilatuka, ulukeelo lwenyo luvedzage lukomi hiilo. 14Ngana mwiligwa, pakuva mwifuuwa mu litaawa lya Kilisiti, mudzeelage ukutigila mwifuunyililwa, pakuva uMubepo va ndolo, kwe kutigila uMubepo va Nguluvi ali pamwinga naanye. 15Lino pe mwipumuka, mutanage ukupumuka pakuva muli vawuladzi enewuli vahiidzi, kangi vahosi enewuli vasongasa. 16Neke kangi, ngana mwipumuka pakuva muli Vakilisiti, mutanage ukuwona nyoni, nda haamu, mumulumbage uNguluvi, pakuva mwikemeelwa ukutigila, muli Vakilisiti. 17Umusika gwa luhigo gúfikile, uNguluvi alaavanga ukuhiga avaanu vaakwe. Lino, ngana uNguluvi iivanga uluhigo lwakwe ukwesu vaanu vaakwe, uwusililo wa avasikuyiidika iMola iNofu ya Nguluvi wulaavedza wuli? 18Ngita kye lúsimbiilwe mu Wusimbe uWiimike ukutigila,
“Ngana avagolofu valaapokwa wugendela wa mumuko,
neke lino lwivedza wuli ku vanya ndzanangifu na avasikumoogopa uNguluvi?”#Selengo 11:31
19Suwe avo aviipumuka wiimila wa mikeelelele gya Nguluvi, vaginage ukulima inofu nu kwiviika mu mawoko ga Nguluvi, uMugavi vaawo muhuuvilwa.
Currently Selected:
1 Petulo 4: BEZ
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
