1 Petulo 3

Imbulanidzo kwa mudala nu mugoosi

1-2Na yuunye vadala, mwilefyage ndeeni ku vagoosi veenyo. Avo pe vakugiwona imigendele gyenyo iminofu kangi ginya luginiyo, ngana koovali avasikumufuuwa uNguluvi, wugendela ulo vahadza viipokwa kitalongelwa ilidzwi. 3Mutanage ukwinodza ulwa mwivala hela, ngita ukutiva ifwili, ukufwala isahabu ni myenda gya lutogo, 4nda haamu, uwunofu weenyo wuhumilage mugati, uwunofu wa numbula uwunya lutengamaso nu wuleele uwusiikwanangika nambe kusakala. Uwunofu uwo wuli nu wuginalifu wukomi pa miiho ga Nguluvi. 5Ndeeni, avamwayuuva va kataali aviimike, wiimila wa luhuuvilo lwawo mwa Nguluvi, vaawoneesaga uwunofu waawo pa kwilefya ku vagoosi vaawo. 6Umwayuuva yumwinga ye aalimile ewo ye Sala, umudala va Abulahamu. Uyo amwidikaga wunofu umugoosi vaakwe, amutambulaga aatigilaga, “Mutwave.”#Wutalilo 18:12 Lino na yuunye, ngana mwilima inofu kingaya koogopa ifingidzo dzidzivedzaga, mwivedza vaana vaakwe.

7Na yuunye vagoosi, mwikalage wunofu na vadala veenyo, muvaginiyage, pakuva mwidzeela ukutigila, vanya wulemwa. Kangi muvaginiyage, pakuva navo vali luhangano pamwinga naanye, pa kuhaala uwuumi uwa mbeepali wiimila wa lusungu lwa Nguluvi. Apo indapangilo dzeenyo sidzitanidzwa ni kikivedzaga.

Ukupumuka wiimila wa kulima inofu

8Ndiimaliidza ukuvalongela nyivonda ukutigila, muvedzage numbula yimwinga, vanya mahoodzo gamwinga nu kuveenda avafuuwa ngita vayeenyo, vanya kwisungukila nu kwiyisa yuunye mwa yuunye. 9Mutanage ukulumbila uwuhosi pa wuhosi, maligo pa maligo, nda haamu, muvalimilage inofu, pakuva uNguluvi avakemeeleliye ukulima ewo, ukuta mwanukile ulufuunyo lwakwe. 10Lwe lwene lúsimbiilwe mu Wusimbe uWiimike ukutigila,

“Ye avedzaga ye iisaka ukugikeela imiikalile nu kufiwona ifigono ifinofu,

apo nu lulimi lwakwe lutanage ukulonga uwuhosi,

kangi nu mulomo gwakwe gubihilage ukudzanga.

11Atanage ukulima uwuhosi, alimage inofu.

Iikalage mu lutengamaso, alutemulage hiilo.

12Pakuva uMutwa Nguluvi iilola vonda aviilima idza wugolofu,

kangi iipulika indapangilo dzaawo.

Neke kangi aviilima uwuhosi, akuvambila umugongo.”#Ndzimbililo 34:12-16

13Ye ani ye ahadza akuvalemadza, ngana muli vapifu va kulima inofu? 14Neke kangi nde luvedze mwipumuka wiimila wa kulima uwugolofu, uNguluvi ahadza akuvafuunyila unyeenye. Mutanage ukuvedza nu wugayagaya, kitavoogopa avaanu avakuvafingidza.#Isaya 8:12 15Nda haamu, mumuginiyage uKilisiti mu numbula dzeenyo ukutigila, ye Mutwa. Mwigelanidzage ngʼaani ukumuhiga ye avedzaga ye akuvawuudza wiimila wa luhuuvilo lwenyo. 16Neke kangi mulimage ewo mu wuleele nu luginiyo. Muvedzage nu lwikagulo lunofu, ukuta pe mwiligwa na avo avakuvalonga uwuviifu wiimila wa migendele gyenyo iminofu mwa Kilisiti, vawonage nyoni. 17Ndiilonga ewo pakuva, ngana gye mikeelelele gya Nguluvi mupumuswe, kiba ukupumuka wiimila wa kulima inofu, sindawuli ukulima imbiifu.

18UKilisiti nave aapumwike nyakamwinga swe wiimila wa ndzanangifu dzeesu, kwe kutigila, umugolofu aafuwe wiimila wa vanya ndzanangifu, ukuta atuteepule nu Nguluvi. Aakomiilwe ulwa muvili gwa wumuunu, neke kangi aadzulubwiswe mu ngufu iya Mubepo uMwimike.#3:18 Aadzulubwiswe mu ngufu iya Mubepo uMwimike Ikikelo pa kikelo, aahambwiswe muumi mu mubepo. 19Mu ngufu dza Mubepo uyo, aaheliye ukugidalikila imibepo imiviifu igyali mu ndinde. 20Imibepo imiviifu igyo gyakaanile ukumwidika uNguluvi pakataali, uNwaka pe aadzengaga ingalavala. UNguluvi aali nu wisamutima ulwa wuhosi waawo ukufikila ingalavala pe yiiwuyapwa. Neke kangi ku wusililo avaanu munaana (8) hela, ve veene ve avapokile uNguluvi ukuhuma mu lutipulo lwa lulenga.#Wutalilo 6:1–7:24 21Ululenga ulo, kye kihwananidzo kya ludzabiko lwenyo, na yuunye múpokiilwe lino wugendela wa lulenga. Uludzabiko ulo, si wiimila wa kuhedza ilikoyo lya muvili, nda haamu, wiimila wa kwitawulila ngʼaani kwa Nguluvi ukuhuma mu lwikagulo lunofu. Kangi uludzabiko ulo, lukuvapoka wugendela wa ludzulubuko lwa Yesu Kilisiti. 22UYesu uyo, aaheliye kukyanya, lino íikalile apoono pa luginiyo ku liwoko ilya kundiyo ilya Nguluvi.#Ndzimbililo 110:1 Avanyamwandza, ifigawa ifinya wutawulilwe ni finya ngufu, vali mu wutemi waakwe.

Currently Selected:

1 Petulo 3: BEZ

Highlight

Copy

Compare