1 Vakolindo 4
4
Amalimo ga vatume
1Wiimila wa idzo, avaanu vatuwonage uneefwe ukutigila, tuli vatovela-ligendwa va Kilisiti, kangi ukutigila, uNguluvi átupeeliye amalimo ga kudalika imola dzaakwe idzaali ku kinyele. 2Lino umuunu ye ápeeliilwe amalimo, iisakulwa avedzage mulimila-vangi muhuuvilwa. 3Neke kangi si kiinu ukwangu, ngana muunyige yuunye enewuli pawutalo pa muhidzi, nambe uneene sindikwihiga ndimwene. 4Ulwikagulo lwangu lunofu, nda haamu, ulo lusikuumbiika ndivedze ndingaya lugomehedzo. Yu Mutwa uYesu ye mwene ye akuunyiga. 5Neke lino, mutanage ukumuhiga umuunu ye avedzaga, ukufikila umusika gwakwe gwe áviikile uNguluvi. Mudzindilage ikigono kye alaadza uMutwa Yesu. Umwene ye alaangʼalika ifiinu fyonda ífifihiilwe mu kiisi, nu kuwoneesa uwugulume uwuli mu numbula dza vaanu. Umusika ugo, uNguluvi alamupeela nayula amalumbo gaakwe.
6Lino vafuuwa vayangu, mu madzwi gonda ago ndíiviikile uneene nu Apolo ukuvedza kihwananidzo wiimila weenyo, ukuta mwiwulanidze ukwesu ikiganulo kya ndongele iyi, “Mwinatilage dziidzila ídzisimbiilwe mu Wusimbe uWiimike.” Atanage ukuvedza pwali umwenyo ye akumuginiya umuwulanidzi yumwinga nu kumubeda uyungi. 7Ye ani ye ákuviikile ukutigila, wiivagila ukulutila uyungi? Kiinu kiki kye uli nakyo kye usinaa upeelwa nu Nguluvi? Kangi ngana úpeeliilwe, kye kiki ukwilumba ngita usipeeliilwe?
8Lino mukwiwona mwígwite! Mukwiwona muli vamosi! Unyeenye muli vatwa nu kutuleka uneefwe! Ndakyene kiba ngana mukali muvedzage vatwa, ukuta uneefwe tuvedzage vatwa pamwinga naanye! 9Neke kangi ukwesu uneefwe vatume, uNguluvi átuviikile ukuvedza vaanu va kubedwa ukulutila vonda. Tuli ngita avaanu ávahigiilwe ukuhelela kukomwa pa miiho ga voloofu, twaviikiilwe ngita luheso mu nyi yonda, ku vanyamwandza na ku vaanu. 10Uneefwe twiwoneka vapuva wiimila wa Kilisiti, neke kangi unyeenye mukwiwona muli vanya luhalawukagudzi mwa Kilisiti! Uneefwe tuli nu wulemwa, neke kangi unyeenye muli ni ngufu! Uneefwe twibedwa, neke kangi unyeenye muli vatambule! 11Ukufikila mu kivalilo iki, tuli ni ndzala ni ngʼelo, kangi túfuuliike. Tupigina ukutowa, kangi tungaya nambe wiikalo. 12Twigimba ukulima amalimo na mawoko geesu yuufwe. Avaanu pe vakutulekela indeko, tukuvafuunyilila, pe vakutupumusa, tukwigugumidza, 13pe vakutuliga, tukuvahiga wunofu. Nambe lino twiwoneka ngita madeesi ga pe naanyi, kangi mapalagata ga lidugulu.
14Sindikuvasimbila amadzwi ga kuvayeyewusa, nda haamu, ndiisaka ukuvawunga ngita vaana vangu vende. 15Nde muvedze na vaanu mbilima likyumi limwinga (10,000) avakuvalela mwa Kilisiti, nda haamu, musili na vadaada voloofu. Pe ndavadalikiye iMola iNofu mwaholiilwe, lwe lwene uneene nde dadiinyo mwa Kilisiti Yesu. 16Lino ndikuvagongoola ukutigila, muundzigage uneene. 17Ulo lwe lwene úluunyuliye ukumutuma uTimoti umuswamu-vangu umwende, ye ndikumuhuuvila mu malimo ga Mutwa. Ndímutumile ukuta aviiwusage imigendele gyangu mwa Kilisiti Yesu, gye ndiiwulanidza avaanu mu ngʼombeso dzonda.
18Lino avangi umwenyo vali nu lwinunumulo, pakuva viihoodza ukutigila, sindaadza kangi ukwenyo. 19Neke kangi, ngana uMutwa akeele, ndiikwadza kisaatu ukwenyo. Apo ndihadza ndiipulika amadzwi ga avo avakwinunumula, si madzwi gaawo hela, nda haamu, ndihadza ndiilola ni ngufu yaawo. 20Pakuva uwutwa wa Nguluvi siwiiwoneka wugendela wa madzwi, nda haamu, wiiwoneka wugendela wa ngufu. 21Lino mwisaka ndilime kiki? Ndivaadzile nu luboko? Enewuli ndivaadzile ni numbula ya wende ni ya wuleele?
Currently Selected:
1 Vakolindo 4: BEZ
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
