1 Vakolindo 3
3
Uwunyalumwinga mu malimo ga Nguluvi
1Vafuuwa vayangu, pe ndaali ukwenyo, ndaalemiilwe ukulonga naanye ngita vaanu avali nu Mubepo va Nguluvi nu kwikala ewo, nda haamu, ngita vaanu va mwe naanyi, kangi ngita vaana fyali pa kumufuuwa uKilisiti. 2Ifyali fyafinyuwa amadziva, fisiipeelwa ikyakuliya kya vaanu avavina. Ndeeni na yuune, ndavapeeliye imbulanidzo imeefu, pakuva mwali musinaa mukangala, nambe lino musinaa mukangala. 3Unyeenye mwave muli vaanu va mwe naanyi, pakuva pagatinagati apeenyo pali giila na mabaatu. Ongo, ifyo fisiiwoneesa ukutigila, mukwikala ngita vaanu va mwe naanyi? Mwave muli vaanu va mwe naanyi! 4Kangi umuunu yumwinga iilonga ukutigila, “Uneene va Pawulo,” uyungi iitigila, “Uneene va Apolo.” Idzo dziiwoneesa ukutigila, mwave mupilima ngita vaanu va mwe naanyi.
5Neke lino, uApolo ye ani? UPawulo ye ani? Uneefwe tuli valimila-vangi hela ve átutumile uNguluvi ukuvatanga unyeenye ukumufuuwa. Nayula iilima ngita kye aapeeliilwe nu Mutwa. 6Uneene ndaayaalile imbeyu, uApolo iikwitililaga, neke kangi uNguluvi ye mwene ye aamedziidze nu kukudza. 7Lwe lwene umunya kuvyala nambe munya kwitilila si kiinu, nda haamu, uNguluvi ye iikudza ye mwene ye va kuhuuvila. 8Ye iivyala na ye iikwitilila, vonda válingʼiine. UNguluvi alamupeela nayula uluwonolo lwakwe, ngita kye álimile amalimo gaakwe. 9Pakuva uneene nu Apolo, twilimasa amalimo nu Nguluvi. Unyeenye gwe mugunda gwakwe, kangi ye nyumba yaakwe.
10Wiimila wa malimo ge áameeliye uNguluvi mu lusungu lwakwe, uneene ndídzengile uwaalo ngita munya kudzenga umunya wuwuya, lino umuunu uyungi iidzenga pakyanya pa waalo uwo. Neke kangi nayula iiyangalilage kye iidzenga pakyanya pa waalo uwo. 11Pakuva uwaalo úwudzengiilwe, ye Yesu Kilisiti mwene. Sikwali umuunu ye iisunga adzenge uwaalo uwungi. 12Neke kangi pakyanya pa waalo uwo, ngana umuunu ye avedzaga adzenge ni sahabu, nambe ni fyuma, nambe na maganga ga wutalamu, enewuli na mabiki, nambe ni lisoli, nambe na mabelege, 13amalimo gaakwe galaawoneka nde gali wuli. Ikigono ikya luhigo, amalimo gonda galaavedza pa weelu, pakuva amalimo ga muunu ye avedzaga, galaagelwa nu mooto gwa luhigo. 14Ngana amalimo ga muunu gasigale kitapiya mu mooto, uyo alaanukila uluwonolo lwakwe. 15Neke kangi, ngana amalimo ga muunu gapiye, apo asilaanukila uluwonolo, nda haamu, umwene alaapokwa ngita muunu ye ákulwike ukuhuma mu mooto.
16Ongo, musiidzeela ukutigila, unyeenye muli tembeli ya Nguluvi, kangi uMubepo va Nguluvi akwikala mugati umwenyo? 17Lino wone umuunu aanange itembeli ya Nguluvi, uNguluvi ahadza akumwananga umuunu uyo, pakuva itembeli ya Nguluvi ndzimike, kangi unyeenye ye tembeli iyo.
18Mutanage ukwidzanga. Ngana umuunu umwenyo akwiwona ukutigila, ali nu luhalawukagudzi ngita avaanu va musika ugu, iihambusage mupuva, ukuta aanukile uluhalawukagudzi lwa ndakyene. 19Pakuva uluhalawukagudzi lwa vaanu va mwe naanyi umu, pa miiho ga Nguluvi, wupuva. Ngita kye lúsimbiilwe mu Wusimbe uWiimike ukutigila, “UNguluvi akuviibata avanya luhalawukagudzi mu wubanga waawo.”#Ayubu 5:13 20Kangi lúsimbiilwe mu Wusimbe uWiimike ukutigila, “UMutwa Nguluvi iidzeela amahoodzo ga vanya luhalawukagudzi ukutigila, gangaya luwumbulilo.”#Ndzimbililo 94:11
21Lino umuunu ye avedzaga atanage ukwilumba wiimila wa vaanu wuli. Pakuva uNguluvi aaviikile ifiinu fyonda wiimila weenyo, 22avedze uPawulo, enewuli avedze uApolo, enewuli avedze uKefwa,#3:22 UKefwa Wiimbe uwooledzi ku 1 Vakolindo 1:12. enewuli fivedze fya mwe naanyi, enewuli uwuumi, enewuli fuwa, enewuli ifili poofili lino, enewuli ifilaavedza poofili. Fyonda fyenyo, 23pakuva unyeenye muli va Kilisiti, uKilisiti nave va Nguluvi.
Currently Selected:
1 Vakolindo 3: BEZ
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
