1 Vakolindo 2
2
Ukudalika imola ya Yesu Kilisiti
1Vafuuwa vayangu, umusika pe ndaadzile ukwenyo kudalika uwoolesi#2:1 Uwoolesi Ikikelo pa kikelo, kinyele. uwa Nguluvi, sindaadzile wiimila wa kuvawoneesa ukutigila ndiilonga wunofu, enewuli ndili nu luhalawukagudzi. 2Ndaalimile ewo pakuva ndaalamuwe ukutigila, nditane ukudalika ikiinu kingi kikivedzaga, nda haamu, ndidalike imola dza Yesu Kilisiti, nu kutovelelelwa kwakwe pa kipindulihidzo. 3Umusika ugo pe ndili kwenyo, ndaali nu wulemwa, nu woogofi, kangi ndaahililaga mbandu. 4Umusika pe ndaawulanidzaga nu kudalika, sindaalongaga amadzwi ga luhalawukagudzi ga kuvakoofya ukuta mufuuwe, nda haamu, ndaalongaga amadzwi agaawoneesaga ingufu dza Mubepo uMwimike. 5Ndaalimile idzo, ukuta ulufuuwo lwenyo lutanage ukuhuuvila uluhalawukagudzi lwa vaanu, nda haamu, luhuuvilage ingufu dza Nguluvi.
Uluhalawukagudzi ukuhuma kwa Mubepo uMwimike
6Ulubali ulungi, twilonga imola dza luhalawukagudzi ku vaanu ávakangiye mu lufuuwo, neke kangi uluhalawukagudzi ulo si lwa musika ugu, nambe lwa vatemi va musika ugu avalaayagaanika. 7Nda haamu, twilonga idza luhalawukagudzi wa Nguluvi uwuli ku kinyele, kangi waali wúfihiilwe pa miiho ga vaanu. Umusika uNguluvi pe asinaa agava inyi, aagelaniidze uluhalawukagudzi ulo wiimila wa ndolo dzeesu. 8Kangi sikwali nambe yumwinga mu vatemi va musika ugu, ye akulufika uluhalawukagudzi ulo, pakuva ngana vakali valufike, ngali vasikamutoveleliye pa kipindulihidzo uMutwa uMunya Ndolo. 9Napo kangi, ngita kye lúsimbiilwe mu Wusimbe uWiimike ukutigila,
“Sikwali umuunu ye aagelile ukudziwona nambe kudzipulika,
dzisinaa dzigelaga ukwingila mu numbula ya muunu,
uNguluvi dze avagelanidziye avakumwenda.”#Isaya 64:4
10Neke kangi uNguluvi átuvilatuliye uneefwe uluhalawukagudzi waakwe wugendela mwa Mubepo. Pakuva uMubepo uMwimike iikomandza dzonda, nambe dza ku kinyele kwa Nguluvi. 11Sikwali umuunu ye iidzeela dze iihoodza umuunu uyungi, nda haamu, yu muunu uyo mwene mu mubepo gwakwe. Kye luli ewo, sikwali umuunu ye iidzeela dze iihoodza uNguluvi, nda haamu, yu Mubepo va Nguluvi. 12Lino uneefwe sitwanukiye imihoodzehedze gya pe naanyi, ukuta tuhoodzage ngita avaanu va pe naanyi, nda haamu, twanukiye uMubepo ye iihuma kwa Nguluvi, ukuta tudzifike dze átupeeliye uNguluvi mu lusungu lwakwe.
13Imola ye twilonga, tusiilonga mu madzwi ge túwulaniidzwe nu luhalawukagudzi lwa vaanu, nda haamu, amadzwi ge túwulaniidzwe nu Mubepo va Nguluvi, kwe kutigila twiganula amadzwi ga Mubepo ku avo avali nu Mubepo uyo.#2:13 Ku avo avali nu Mubepo uyo Ikikelo pa kikelo, mu madzwi ga Mubepo uyo. 14Lino umuunu ye angaya Mubepo va Nguluvi, asiikwanukila idziihuma kwa Mubepo uyo, pakuva ukwakwe idzo, dze dzeene dza wupuva, kangi iilemwa ukudzifika. Umuunu asiilemwa ukudzifika idzo wugendela wa ngufu iya Mubepo uyo swe. 15Lino umuunu ye ali nu Mubepo va Nguluvi, uyo iikomandza dzonda, ukuta adzihige ngana dza ndakyene, neke kangi umwene iilemwa ukuhigwa nu muunu ye avedzaga ye angaya Mubepo uyo. 16Pakuva uWusimbe uWiimike wiitigila,
“Ye ani ye iidzeela amahoodzo ga Mutwa Nguluvi,
ukuta amutange?”#Isaya 40:13
Neke kangi uneefwe vafuuwa, tuli na mahoodzo agiihuma kwa Kilisiti.
Currently Selected:
1 Vakolindo 2: BEZ
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
