Roma 1

Tsha'te

1Me Paulo ngafa' Kristô Yésu z'a tsiaṅ àm ndù me be ngantum, ntsho' àm num nkùn mebwô Nsi, 2z'a na' nka' tà mbwe, ntshùa num ntshu ghatshob ntshob Nsi tse, ntùm ṅwa'ni nelàne, 3mfà num mén i, Yésu Kristô Tshùaben be: Num mat mbàb wut, a tum ntùm nzwit David; 4num mat Ywèt Nelàne, Nsi yab i Mén i ntùm neta ntshùa num nelo num vù; 5be lo tshùa njam i, nkwé kondèn mba ntum netèt njoṅ ghakelèn Nsi fa, ndù bo bam i, nju' ntshu i, ngamte lén se, 6mba bin tse Yésu Kristô tsiaṅ zin nà, bin tum à netèt bo. 7Me kite yen ṅwa'ni li à njoṅ benntùn fa tse bo be mà Roma, tse Nsi kô yube, ben nelàn tse Nsi tsiaṅ yub là. Kondèn mba fite z'a fe Nsi, tà be, mba Tshùaben Yésu Kristô là, be bin.

8Me bwôgmbwe ndabte Nsi àm ntshùa njam Kristô num njoṅ zin fa, nummbe bamntù zin ju'ni ntùm njoṅ njù fa. 9Nsi ze me num mfa' yi ywèt tshàm ntùm nkùn mebwô Mén i là, b'a ngakwénta màm ndù me num ntsi lén sin ke bot; 10ntùm màm le'te Nsi, nke nde't'é njoṅ ndù fa, a be z'a be, a be mo' lé'njù, me fon manze, ntùm ze nekô Nsi, nse' la' bin nà. 11Nummbe ntù àm tshwèt nkù neyen zine, ndùlala ndù me fà ju kondèn z'a fe ywèt là bin, ndù a fà tànntù bin, 12yen nà b'a ndù bamntù zin mba yàm, z'a b'a ntam nà, fà fènntù be, ngelaṅ me nsi be netèt bin nà.

13 # Mfa' Gha. 19.21 Fèt tshàm, me ke' kô nelem zin ndù me lo ke nabte nese' la' bin ndù me ghù bon ntàme, mba netèt bin, mba me na' ngù mba netèt tsemo' ghakelèn Nsi là, là me be ntùm netshètte tà nkum sènni. 14Me b'a nganjo ba Grikia mba ba ghùn, ba zenu mba ba kagni. 15Ndùlala ntù àm tshwèt nkù netshob nkùn mebwô mba bin zin tse bin be Roma là.

Bamntù bèn nke njôg mèn

16 # Mark. 8.38 Nummbe me ke' ko tuswe nkùn mebwô, nummbe a b'a neta Nsi num yôg mba we lo z'a bam nà, nto' num ze Yuda, mbatte ze Grikia. 17Nummbe #Hab. 2.4nunetsin Nsi tswite wul i bwe, a num nto' num bamntù, miagte num bamntù, ndaṅndaṅ mba bo na' nkite ndù: Mèn netsin nsi yôg à njam bamntù là.

Nukebwô ghakelèn Nsi

18Yantù Nsi be ntswite wul i mfe kamànyam num newag neghamte Nsi mba num nuketsin ben tse bo be ma' nenùn ndàtsha ntùm nuketsin yub là. 19A b'a ndùlala, ju ze be bo ke ku'ni nelèn num Nsi là la'te wul i netèt bo, nummbe Nsi la'te wul i bo. 20Fe ngelaṅ njù be là, lén Nsi tse be mènntùn ke ku'ni neyen nà, yen nà b'a ndù: Neta i ze yoṅ ntshù', mba ze nebe Nsi, be mènntùn yen, nummbe zenu i ku'ni nelèn yub ntùm tshu tse Nsi nabte là: Ndùlala ndù kà nu latnta be. 21Nummbe #Ef. 4.17-18mba mba bo lèn Nsi là, bo ke' ghamt'é mba Nsi là, ke labt'é, là nkwatenu mub lo' yub nèn yi num tshu banban, ntù tshob tse kagni sènte ntùm njame. 22Mbe lo' wut tshob mba ghazenu là, ntù' ba mbabune, 23mbate #Neb. 4.16-18nkuni Nsi z'a ke' be kwù là num neto z'a b'a mfuni mènntùn z'a be nkwù là, mba num neto z'a b'a mfuni nsaṅe, nyàm nku nkuà mba nyàm tse bo num nsoṅ mbam mub nsi là.

24Ndùlala Nsi tshùa njam ghe'te ntù tshob ma' yub ntùm yôg ṅu'u, ndù bo bagte wut tshob yub tu, 25bo tse bo bate nenùn Nsi num tatte, ngamte mbèn mfa' ju nenabte, ntshùa nganabte là, yi z'a b'a ngambotni yoṅ ntshù' là. Amén. 26A ndùlala Nsi ma' yub ntùm ghe'te tuswe. Nummbe zwi tshob bate netamte z'a be mat mba bo bwe yub yi là num z'a ke' be mat bo bwe yub yi là, 27be ndaṅndaṅ, mba bandum faṅ netamte mandum mba mènnzwi z'a be mat mba bo bwe yub yi là, nkù ntùm ghe'te netamte bo bo bandum, nke ngù nu tuswe, ntshùa ndùlala nke nkwé ntsho'fa' mi a ku'ni num yub nefàn manze là num tu wut tshobe.

28Mba bo na' mbe ke kô nelèn Nsi là, Nsi ma' yub ntùm yôg kagni ndù bo ghù ju z'a ke' bwô neghù là. 29Bo dun njoṅ nuketsin fa, nukebwô, ze'te, tshùag, ndun ghe'te, nezwi mèn, ntsha, nkùnkù, tatte, ndàm, 30nebagte lén benntùn, ghakebam Nsi, ghatshàb ntshu, ghako'tewut, ghata'nsoṅe, ghate nukebwô, ghatatu mbwe tà tshob mba mà tshobe. 31Ba kagni ghakelé' nka'ni, ghakeghù nkôni, ghake kondèn, 32bo tse bo lèn ntshù' Nsi mi a tshob ndù ghaghù lèn tshen tshu là ku'ni nekwù là, bo tshwèt ngù tshen tshu là, ke b'a nda' ndùlala, là bo tshwèt nyàmte ben tse bo tshwèt ngù tshen tshu là là.

Currently Selected:

Roma 1: BMa

Highlight

Copy