Roma Ju z'a ntùm bwe là
Ju z'a ntùm bwe là
A lo be tshùa bon ngu'njù mba Kristô kwù mbèn ndo num vù là, a tswe mba Akila mba Prisila ba Yuda tse bo na' nkaṅ ntù' benkristô là na' to'te neke nsa Nkùn Mebwô mfe tètla' ngô Roma là (Mfa'Ghantum 18.2). A ju z'a ghù mbwe Ndà Nsi yà be bwe ngelaṅ ze Paulo na' nke nsoṅ Nkùn Mebwô ntùm ba ngô Siria, Asia, Turkia bo Grikia là. Nsi na' tshob Paulo ndù a nèn “ntùm njoṅ dù' fa ntùm njù”. A b'a ndùlala na' ngù kà Paulo nke nkù ntù nèn Roma bèn lo bwe nèn tà kum ngô Pànyà. Be ke' lèn mb'a na' zin nkum tshen dù' li là, nda' ndù, ngelaṅ z'a ke nabte mb'a nsi lo' zinte yi là, a kite ta' ṅwa'ni ba Roma, yen ni bagt'a ndù, benkristô tse bo ke ntse'te ju Akila bo Prisila tusô Roma là (1.7; 16.3-5).
Paulo tshùate njam yen ṅwa'ni là, ngù njoṅ ben fa tse bo ke' b'a ba Yuda là lèn ndù, Nkùn Mebwô z'a tshwèt nsa là b'a ze njoṅ benntùn fa num nsitsha'a. Yen ṅwa'ni li tshob njoṅ nu fa, mfà num mi nkwate mi a kut tu i ndù: Nkùn Mebwô b'a ju neta ze Nsi num njé'te bwe, mbwôgmbwe njôg ba Yuda tse bo bam i là, là, ke lagte nebèn njôg mba benntùn tshen nà tse bo ke' b'a ba Yuda là (1.16).
Nelèn nu mfà num fagte z'a be netèt ba Yuda boa ben bo ke' b'a ba Yuda là, na' mb'a mà nu ndùb benkristô tse mbwe (mebwô mebwô mba be tsemo' benntùn tse bo bam Nsi ghù kà boa ba Yuda be ntshu ntshù' num nkàn mub là). Be ku'ni neyen mfi' tshen tshu là ntùm tsemo' ṅwa'ni ngantum Nsi Paulo (ṅwa'ni ba Galatia). Paulo tshwèt mbam nsen ni mbe Nkùn Mebwô z'a tshwèt nsa là, b'a ze njoṅ benntùn fa ke faṅ sàm mènntùn nyiaṅtu mba ntshù' (1.16). Mbe lo bwe, a bèn nke mbagte mba Nsi num njôg mba zit mèn no z'a bi, nda' ndù, ndù a bwôgmbwe mbam i, njab ntù i num i là (1.18—8.39).
Yen nà be tôge, a lôte nu mfà num tsemo' ba Israél tse bo num mbe num tsemo' ngelaṅ nke nga Kristô là. A kàn mfe mbam ntshob ndù yen negha là, ke' ku'ni netshètte sàm ju num nka'ni Nsi mi kondèn ni bèn mbe miagte ju ndùb là (kam 9—11). Num ndonni, bwôntù Nsi num ben tse bo ke' b'a ba Yuda là, a b'a ta' netsiaṅ ze Nsi tshwèt ntsiaṅ yub yi ndù bo se' nkwé yôg nswe là (12.1—15.13).
Mbe miagte Paulo soṅ mb'a nsi zin yi nèn mà Roma là mbèn nkut tun ṅwa'ni bo kua' ko' mi ntsha'te (15.14—16.27). Njoṅ benntùn fa tse bo num ndiag mba Nsi na' ntshùa njam Yésu mfà yôg benntùn nà, nsi siaṅ yen ṅwa'ni li, nu tshùa yube num sob laṅ se, num mba Nsi num ndo' ma' mfi' fa' se là (11.33-36). A nsi tshùa ndùlala, bo ghù fènntù, mbam Nsi mba bo yub num mat z'a bwô ndù njoṅ benntùn fa ke mbam i yi là.
Currently Selected:
Roma Ju z'a ntùm bwe là: BMa
Highlight
Share
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.