Roma 2

Nukebwô ba Yuda

1Ndùlala #Mat. 7.1; Luk. 6.37nu latnta ke bwe, wù mènntùn, k'o b'a be we lo, z'o tshwèt ntsho'te mo' mèn nà. Nummbe o tshwèt mbe tsho't'é, nke ntsho'te mba tu wul o, ngwù ntsha, nummbe wù z'o tshwèt ntsho'te là, o be ngù be ndaṅndaṅ. 2Là be lèn ndù netsho'te ntsha Nsi num ben tse bo num ngù lèn tshen tshu là là b'a ntùm mat nenùne.

3Là wù mènntùn z'o tshwèt ntsho'te mo' mèn, mbèn nke ngù be ndaṅndaṅ nà, o kwate ndù o nsi kù netsho'te ntsha Nsi ké? 4O num ngwag bwôntù i ze ndùb, sagntù i mba nefènt'é ké? O ke' lèn ndù bwôntù Nsi ke ntènt'o à num nekaṅ ntù ké? 5Là, a tshùa num sagntù o mba mb'o ke' kô nekaṅ ntù o là, o tse'te yantù num o, num lé'njù yantù ze netsho'te ntsha Nsi ze netsin nsi tswite wul i là. 6Nsi #Yobk. 62.13; Tànk. 24.12nsi fà mba we lo be ndaṅndaṅ num mfa' mi: 7A nsi fà yôg matmat ben tse bo num nkagtùn ntùm mfa' mebwô, nke ndiag ghamte, nku'ni mba nebe ke kwù là; 8a nsi fà yantù mba tshùagntù ghadiag ntsha, ghakebam nenùne, là ghabam nuketsin; 9a nsi fà nge' mba zwentù ntùm ntù mba zit mèn no z'a num ngù nukebwô là, nto' num ze Yuda, mbatte ze Grikia. 10Là fà ghamte, nku'ni mba fite mba we lo z'a num ngù numebwô là, nto' num ze Yuda, mbatte ze Grikia. 11Nummbe #Neb. 10.17netôte mèn ke' be mbwe Nsi.

12Njoṅ benntùn fa tse bo ghù nukebwô mba bo ke' lèn ntshù' là, nsi bi mba bo ke' lèn ntshù' là; njoṅ benntùn fa tse bo ghù nukebwô ntùm ntshù' là, bo nsi tshùa num ntshù' tsho'te yube. 13Nummbe a ke b'a ghaju' ntshù' bèn mbe ben netsin mbwe Nsi, là ghaze ntshù' nsi tù' ben netsine. 14Ngelaṅ ghakelèn Nsi tse bo ke' ghù ntshù' num nze tshu ts'a be ntùm ntshù' là yub tu là, tshen ben nà tse bo ke' ghù ntshù' là num mbe ntshù' tu wut tshobe, 15bo num nda'te ndù bo kite ju ze ntshù' num ntshob là ntùm ntù tshobe: Nze ntù tshob num nkwé nta, nkwatenu mub nke ntshobte yube, mbèn nke nyàmte yube. 16Num sen lé'njù là, Nsi nsi tsho'te mfa' tsham benntùn num nkùn mebwô àm, ntshùa njam Kristô Yésu.

17Wù z'o be ntsiaṅ wul o ze Yuda, nke mfite num ntshù' nke nta' nsoṅ num Nsi, 18wù z'o be ndèn ze nekô Nsi, nke ndaṅte, ndèn tshu ts'a ywimte mba ntshù' tswit'o là, 19wù z'o be ndo' wul o mba ngatshagte ba mfùmiag, mba nka' ben tse bo be ntùm njam nà, 20mba ngasoṅte ghakelèn ju, mba ngatswite bonfi, nummbe o ghù ngwùt zenu mba nenùn ntùm ntshù' là, 21ndùlala ke bèn ngù, wù z'o be ntswite mo' mèn nà, ke tswite tu wul o! Wù z'o be ntshob ndù kà mèn yi là, o num nj'é! 22Wù z'o be ntshob ndù kà mèn ghù màndà là, o num ngù màndà! Wù z'o be mbàn nsi neto là, o num nge'te tshu ntùm ndà tshobe! 23Wù z'o be nta' nsoṅ num ntshù' là, o num mbagte lén Nsi, nummbe o num mfàn ntshù'! 24Nummbe #Es. 52.5bo num ntshabte lén Nsi netèt ghakelèn Nsi num bin, ndaṅndaṅ mba bo kite là.

25Nummbe nesi ket ke njwimt'a ngelaṅ z'o be nze ntshù' là; là, a be z'o num mfàn ntshù' là, mb'o bagte yu nesi ket. 26Ndùlala, a be ze mèn z'a ke' si ket ze ntag ntshù' là, mba bo ke nsi lo' yen nà mba mèn z'a si ket là ké? 27Ndùlala mèn z'a ke' si ket num mbàb wut, là nke nze ntshù' miagte là, nsi tsho't'o, wù z'o ze miag ṅwa'ni mba nesi ket, là nke mfàn ntshù' là. 28Mèn Yuda ke be mèn Yuda à num num, nesi ket ke be nesi kel à num num mbàb wut, 29là #Neb. 30.6mèn Yuda be mèn Yuda à ntùm bwe, nesi ket be nesi ket ntù ntùm Ywèle, ke b'a num miag ṅwa'ni. Ze nenyàmte ke fe à benntùn, là, a fe à Nsi.

Currently Selected:

Roma 2: BMa

Highlight

Copy