Revelation 9
9
CHAPTIR NINE.
The reek frae the bottomless pit, and the locusts that cam oot oʼt.
1And the fifth Angel soondit; and I saw a starn that had faun oot oʼ heeven to the yirth; and thar was gien to him the key oʼ the pit oʼ the abyss.
2And he unsteekit the pit oʼ the abyss; and reek cam up oot oʼ the pit, as the reek oʼ a great furnace; and the sun and the lift war darkenʼt wiʼ the reek oʼ the pit.
3And oot oʼ the reek cam locusts on the yirth; and pooer was gien them, as the scorpions oʼ the yirth hae power.
4And it was bidden them that they soudna skaith the foggage oʼ the yirth, nor yet ony green thing, nor yet ony tree, but only the men wha haena the seal oʼ God on their broo.
5And it was gien to them that they soudna slay them, but that they soud be tormentit fyve months; and the torment oʼ them was like a scorpionʼs torment, whan it may strike a man.
6And iʼ thae days sal men seek for death, and no find it; and desire to dee, and death flees frae them.
7And the likeness of the locusts was as horses made ready for war; and on their heids war like croons oʼ gowd; and their faces as faces oʼ men;
8And their hair as the hair oʼ weemen; and their teeth like lionsʼ teeth;
9And they had cuirasses as graith oʼ airn; and the noise oʼ their wings as the noise oʼ chariots, as oʼ mony horses rushin to battle.
10And they had tails like scorpions, tails like stings; and iʼ their tails is pooer to skaith men for fyve months.
11And they had a king ower them, an angel oʼ the abyss; his name in Hebrew is “Abaddon,” and in oor common tongue he has a name “Destroyer.”
12Ae wae is past; tak tent! thar are comin yet twa mair waes eftir thir things!
13And the saxth Angel soondit; and I heard a voice frae the horns oʼ the gowden altar, iʼ the presence oʼ God,
14Sayin to the saxth Angel, “Ye that hae the buglehorn! lowse the fowr Angels that are in bonds at the great river Euphrates!”
15And the fowr Angels war lowsed, wha had been made ready for the ʼoor, and day, and month, and year, that they soud slay the third‐pairt oʼ men.
16And the number oʼ the hosts oʼ horsemen, twa million: I heard the number oʼ them.
17And I saw the horses iʼ the vision, and thae sittin on them; haein cuirasses as oʼ fire, and hyacinth, and brunstane; and the heids oʼ the horses as heids oʼ lions; and oot oʼ their mouʼ gangs #9:17 Gin this chaptir airts to the Mahommedan pooer, as maist think, than this micht be a glint oʼ the new way oʼ making war wiʼ poother and ordnance: as amang the Turks.lowe, and reek, and brunstane.
18By thir thrie plagues war slain the third‐pairt oʼ men; by the lowe, and the reek, and the brunstane that cam oot oʼ their mouʼ.
19For the pooer oʼ the horses is iʼ their mouʼ and iʼ their tail; for their tails are like serpents, wiʼ heids; and wiʼ them they do skaith.
20And the lave oʼ men, wha warna slain by thir plagues, repentit‐na oʼ the warks oʼ their hauns, that they soudna serʼ demons, and eidols oʼ gowd, and siller, and oʼ brass, and oʼ stane, and oʼ wud; whilk can naither see, nor hear, nor gang:
21And they repentit‐na oʼ their blude‐sheddin, nor oʼ their incantations, nor oʼ their uncleanness, nor of their plunderins.
Currently Selected:
Revelation 9: SCO1904
Highlight
Copy
Compare
Share
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
