Popular Bible Verses from Revelation 9

Share

And the lave oʼ men, wha warna slain by thir plagues, repentit‐na oʼ the warks oʼ their hauns, that they soudna serʼ demons, and eidols oʼ gowd, and siller, and oʼ brass, and oʼ stane, and oʼ wud; whilk can naither see, nor hear, nor gang: And they repentit‐na oʼ their blude‐sheddin, nor oʼ their incantations, nor oʼ their uncleanness, nor of their plunderins.

And oot oʼ the reek cam locusts on the yirth; and pooer was gien them, as the scorpions oʼ the yirth hae power. And it was bidden them that they soudna skaith the foggage oʼ the yirth, nor yet ony green thing, nor yet ony tree, but only the men wha haena the seal oʼ God on their broo.

And the fifth Angel soondit; and I saw a starn that had faun oot oʼ heeven to the yirth; and thar was gien to him the key oʼ the pit oʼ the abyss.

And it was gien to them that they soudna slay them, but that they soud be tormentit fyve months; and the torment oʼ them was like a scorpionʼs torment, whan it may strike a man.

And they had a king ower them, an angel oʼ the abyss; his name in Hebrew is “Abaddon,” and in oor common tongue he has a name “Destroyer.”