Hebrews 11
11
CHAPTIR ELEEVEN.
What faith is? and wha had it, and how they made it to be seen? A noble bead?-?roll.
1Noo faith is gruppin the substance oʼ things lookit for; the confidence oʼ raal‐things no yet seen.
2For thar‐in the Elders had gude‐witness borne them.
3Throwe faith we come to ken the warlds war orderʼt by the words of God, sae as that whilk is seen was made oot oʼ what was seen‐na.
4Throwe faith Abel offerʼt to God a mair perfete sacrifeece than Cain; by whilk he obteened testimonie that he was richtous, God testifying anent his gifts: and throwe it, though he deeʼt, he is still speakin.
5Throwe faith Enoch was translatit sae as no to see death, and was seen‐na, for God had translatit him; for afore the translation he had testimonie borne to him that he had been weel‐pleasin to God.
6But, wantin faith, it isna possible to be weel‐pleasin to him; for he that comes to God maun needs hae faith that he is, and that to thae that seek him a Rewarder is he.
7Throwe faith Noah, being tellʼt oʼ things as yet no seen, wrocht‐on by godly fear, made ready an ark to the savin oʼ his hoosehauld; throwe whilk he condemned the warld, and becam heir oʼ the righteousness oʼ faith.
8Throwe faith Abraʼm — he wha was tellʼt — obeyʼd to gang till a place he was to hae for a heritage; and gaed oot, no weel‐kennin whaur he was gaun.
9Throwe faith he bade day‐by‐day iʼ the Land oʼ Promise, as in a fremd land; bidin in tents, wiʼ Isaac and Jaucob, joint‐heirs oʼ the same promise:
10For he was waitin for the Citie wiʼ fundations, biggit, and planned by God.
11Throwe faith eʼen Sarah her sel had strength to conceive, whan she was ayont age: seein that she was haudin him as faithfuʼ that had promised.
12And sae, eʼen frae ane was thar born — and him as he war deid — “as mony as the starns oʼ the sky in their thrang, and as the sand by the lip oʼ the sea; no to be numberʼt.”
13And conform to faith, deeʼt aʼ thir; no haen their sels grippit the promises, but seein them far awa, and salutin them, and confessin that they their sels war fremd anes, and lodgers on the yirth.
14For they that say sic things, mak it plain to be kent that they are seekin a land oʼ their ain.
15For gin they had been thinkin aye oʼ the land they came frae, they micht hae had opportunity oʼ returnin:
16But noo they look for a better land, that is a heevenlie ane; whaur‐for God isna ashamed oʼ them to be socht till as their God; for he did prepare for them a Citie.
17Throwe faith Abraʼm when he was testit, offerʼt up Isaac; aye, he wha blythely acceptit the promises, was offerin‐up his ae and only son;
18Oʼ wham it was said, “Thar sal be caʼd a seed tae thee in Isaac.”
19Reckonin that God could raise him again, eʼen frae ʼmang the deid; frae whilk he, in a likeness, wan him back again.
20Throwe faith Isaac gied blessin to Jaucob and Esau, speakin oʼ comin things.
21Throwe faith Jaucob, whan he cam to dee, blessʼd baith the sons oʼ Joseph; and “worshippʼt, loutin doon on the heid oʼ his staff.”
22Throwe faith Joseph, whan his end cam nar, spak oʼ the gaun oot oʼ the sons oʼ Israʼl, and gaʼe commaun anent his banes.
23Throwe faith Moses, whan he was born, was keepit hidlin thrie month, for that they saw he was an unco bonnie wean, and fearʼt‐na the orders oʼ the king.
24Throwe faith Moses, whan he was grown, wadna be caʼd “Son oʼ Pharaohʼs dochter”;
25Makin choice raither to dree wiʼ the folk oʼ God their ill‐treatment, than to be enjoyin for a wee the pleasurs oʼ sin.
26Reckonin the reproach oʼ the Anointit Ane as unco better than aʼ the gear oʼ Egypt; for he was lookin awa to the giean oʼ the reward.
27Throwe faith he left Egypt ahint, no fearin the angʼer oʼ the king; for he tholed, as behauldin him wha is unseen.
28Throwe faith he institutit the Pasche, and the strinklin oʼ blude; that he that destroyʼt the first‐born soudna be touchin them.
29Throwe faith they gaed athort the Red Sea as on dry grunʼ; whilk the Egyptians, ettlin to do, war whammlʼt ower.
30Throwe faith the waʼs oʼ Jericho fell doon, haein been rinkit roonʼ for seeven days.
31Throwe faith Rahab the courtesan perishʼt‐na wiʼ thae that war disobedient, haein welcomed the spies wiʼ peace.
32And what mair can I say? for time wad fail me tellin oʼ Gideon, Barak, Samson, Jephthah; oʼ Dauvid too, and Samuʼl, and the prophets;
33Wha, throwe faith prevailed ower kingdoms, wrocht richtousness, obteened promises, dang the mooth oʼ lions.
34Quenched the lowin oʼ fire, escapit the mooth oʼ the sword, frae fecklessness raise to strenth, waxʼt michty in war; turned to flicht armies oʼ fremʼd anes.
35Weemen gat back their deid, raisʼt to life; and some war tortured, no acceptin conditions oʼ deliverance, that they micht come to a better Risin‐again.
36Ithers war tried wiʼ mockins and clourins; aye, mair; wiʼ fetters and dungeons:
37They war staned, war sawn sindry, war tempit, war murderʼd wiʼ sword; they gaed aboot rowʼt in sheepskins and goat‐hides, bein in poortith, dool, and misery.
38The warld #11:38 Thank God for sic noble anes! Nae ither leet oʼ heroes was ever as graun as this. The fragrance oʼ their warks oʼ faith is wiʼ us: and their example. Lat us follow on!wasna wordie oʼ them; wanderin on muirlands and mountains, bidin in dens and caves oʼ the yirth.
39And thir aʼ, thoʼ they had witness to their faith, obteenʼd‐na, their sels, the promise.
40God haein aforehaun providit better things for us, that no sindry frae us soud they be perfetit.
Currently Selected:
Hebrews 11: SCO1904
Highlight
Copy
Compare
Share
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
