Hebrews 10
10
CHAPTIR TEN.
Christʼs sacrifeece unco better than thae oʼ the Law. Warnins again back‐gaun.
1For the Law, wiʼ a shadow oʼ the gude things to come, and no the perfete likeness oʼ the things their sels, canna wiʼ thae sacrifeeces offerʼt up year by year aye, mak perfete them that draw nar.
2For than wadna they quat bein offerʼt? for they worshippin, bein #10:2 The Jews war sair misguidit by their Scribes, and garʼt to think the offerans theirsels took awa sin. But the Ae‐offeran needs nae repeatin, as thae offerans are.ance for aʼ purifyʼt, wad hae nae mair conscience oʼ sins!
3But, in them, is a bringin‐back to mind oʼ sins, year by year.
4Impossible isʼt for blude oʼ bulls and goats to tak awa sins!
5Whaur‐for, comin intil the warld, he says, “Sacrifeece and offeran thou willest‐na, but a body didst thou prepare for me.
6“In hail brunt‐offerans, and offerans for sins, thou didst‐na joy;
7“Than said I, ‘Behauld, I am come — (at the heid oʼ the buik it is written oʼ me) — to do thy wull, O God!’ ”
8Aboon, sayin, “Sacrifeeces and offerans, and haill brunt‐offerans, and offerans for sin thou willest‐na, naither didst joy in” — sic as, conform to the Law, are offerʼt;
9Than did he say, “Behauld! I am come to do thy wull!” He taks awa the first, that he may mak siccar the second.
10By the whilk wull we are made holie, throwe the offerin oʼ the body oʼ Jesus Christ ance for aʼ.
11And ilka priest stauns, in truth, day eftir day servin, and offerin ower again the same sacrifeeces; whilk, truly, can never tak awa sins;
12But he, haein offerʼt ae sacrifeece for sins for evermair, sut doon at Godʼs richt haun;
13Frae this waitin, “till his faes be made the fit‐brod oʼ his feet.”
14For by the Ae‐offeran he has perfetit for evermair them that are sanctifyʼt.
15And the Holie Spirit himsel bears witness for us; for eftir he had said,
16“This is the covenant I wull covenant wiʼ them eftir thae days,” says Jehovah, “Giean my laws on their hearts, I wull write them on their minds;”
17He says mair: “Their sins and their ill‐deediness wull I naewise mind ony mair.”
18Noo, whaursaeʼer they are remittit, thar is nae mair offeran for sin needfuʼ.
19Haein than, brethren, bauldness oʼ speech to enter intil the Holiest by the blude oʼ Jesus,
20Whilk enterin‐in he has consecrate for us, a new way, and a way oʼ Life, throwe the veil (that is, his flesh),
21And haein sic a great Heigh‐Priest ower the hoosehauld oʼ God,
22Lat us come nar, wiʼ leal hearts, in the fuʼ confidence oʼ faith; haein been strinklʼt in oor hearts frae an ill conscience; and haein been weshʼt in oor bodies wiʼ pure watir;
23Lat us haud siccar the confession oʼ oor hope wiʼ nae wafflin; for leal is he that did undertak.
24And lat us think upoʼ ane‐anither, for an encouragin to love and gude warks:
25No lattin‐faʼ the forgatherin oʼ oorsels, eʼen as it is the way wiʼ some; but, perswadin aye; and sae muckle the mair, as ye see the dawin oʼ the day.
26For gif we gang on sinnin eftir receivin the knowledge oʼ the truth, nae langʼer, for sin, is thar remainin a sacrifeece;
27But a fearsome lookin‐forrit tae judgment, and a sautness oʼ fire, that sal devoor the enemy.
28Ane that set aside Mosesʼ Law, deeʼt withoot pitie, “afore twa or thrie witnesses.”
29Oʼ hoo muckle sairer punishment, think ye, sal he be hauden wordie, wha trampit the Son oʼ God under fit; and held as an unclean thing the blude oʼ the covenant by whilk he is consecrate, and did wantonly miscaʼ the Spirit oʼ love?
30For we ken wha said, “To me perteens avenging; I wull recompense!” and again, “Jehovah wull judge his folk.”
31It is a fearsome thing to faʼ intil the hauns oʼ a Leevin God!
32But mind‐ye‐na the days gane by, in whilk, ance ye gat licht, ye tholed an unco fecht oʼ sufferans?
33Some pairt that ye war made, wiʼ miscaʼin and griefs, a ferlie for men; and some pairt that ye war made marrows oʼ thae that war sae dune till.
34For ye took the pairt oʼ thae in bonds, and tholed the poindin oʼ yere gear wiʼ joy, kennin that ye hae for yersels better and ever‐bidin gear.
35Ye maunna cast awa, than, yere bauldness oʼ speech; whilk in truth has unco reward!
36For ye hae need oʼ patience, that haein dune Godʼs wull, ye may win the promise:
37For yet, “A wee while, fleetin, fleetin! the Comin Ane sal come, and no delay!
38“But the richtous ane by faith sal leeve; but gin ye gang back, my saul delichts‐na in him!”
39But we are‐na oʼ them wha gang back to perdition; but oʼ faith, to the salvation oʼ the saul.
Currently Selected:
Hebrews 10: SCO1904
Highlight
Copy
Compare
Share
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
