Popular Bible Verses from Hebrews 11

Share

Noo faith is gruppin the substance oʼ things lookit for; the confidence oʼ raal‐things no yet seen. For thar‐in the Elders had gude‐witness borne them.

But, wantin faith, it isna possible to be weel‐pleasin to him; for he that comes to God maun needs hae faith that he is, and that to thae that seek him a Rewarder is he.

Throwe faith we come to ken the warlds war orderʼt by the words of God, sae as that whilk is seen was made oot oʼ what was seen‐na.

Throwe faith Abraʼm — he wha was tellʼt — obeyʼd to gang till a place he was to hae for a heritage; and gaed oot, no weel‐kennin whaur he was gaun. Throwe faith he bade day‐by‐day iʼ the Land oʼ Promise, as in a fremd land; bidin in tents, wiʼ Isaac and Jaucob, joint‐heirs oʼ the same promise

Throwe faith Noah, being tellʼt oʼ things as yet no seen, wrocht‐on by godly fear, made ready an ark to the savin oʼ his hoosehauld; throwe whilk he condemned the warld, and becam heir oʼ the righteousness oʼ faith.

Throwe faith Enoch was translatit sae as no to see death, and was seen‐na, for God had translatit him; for afore the translation he had testimonie borne to him that he had been weel‐pleasin to God.

Throwe faith Abel offerʼt to God a mair perfete sacrifeece than Cain; by whilk he obteened testimonie that he was richtous, God testifying anent his gifts: and throwe it, though he deeʼt, he is still speakin.

Throwe faith eʼen Sarah her sel had strength to conceive, whan she was ayont age: seein that she was haudin him as faithfuʼ that had promised.

For he was waitin for the Citie wiʼ fundations, biggit, and planned by God.

Throwe faith Moses, whan he was grown, wadna be caʼd “Son oʼ Pharaohʼs dochter”; Makin choice raither to dree wiʼ the folk oʼ God their ill‐treatment, than to be enjoyin for a wee the pleasurs oʼ sin. Reckonin the reproach oʼ the Anointit Ane as unco better than aʼ the gear oʼ Egypt; for he was lookin awa to the giean oʼ the reward. Throwe faith he left Egypt ahint, no fearin the angʼer oʼ the king; for he tholed, as behauldin him wha is unseen.

Throwe faith Abraʼm when he was testit, offerʼt up Isaac; aye, he wha blythely acceptit the promises, was offerin‐up his ae and only son

Throwe faith Rahab the courtesan perishʼt‐na wiʼ thae that war disobedient, haein welcomed the spies wiʼ peace.

Throwe faith they gaed athort the Red Sea as on dry grunʼ; whilk the Egyptians, ettlin to do, war whammlʼt ower.

Throwe faith the waʼs oʼ Jericho fell doon, haein been rinkit roonʼ for seeven days.

Throwe faith he institutit the Pasche, and the strinklin oʼ blude; that he that destroyʼt the first‐born soudna be touchin them.

Throwe faith Joseph, whan his end cam nar, spak oʼ the gaun oot oʼ the sons oʼ Israʼl, and gaʼe commaun anent his banes.

Throwe faith Jaucob, whan he cam to dee, blessʼd baith the sons oʼ Joseph; and “worshippʼt, loutin doon on the heid oʼ his staff.”

Throwe faith Isaac gied blessin to Jaucob and Esau, speakin oʼ comin things.