PHUNGTHLUKBIA 3
3
Nawlngaih Forhnak
1Ka fapa, kan cawnpiaknak cu
philh hlah,
Sihmanhsehlaw na lung nih
ka nawlbia cu
i cinken ko hna seh;
2Zeicahtiah nun saunak le
chan saunak le
duhdim nunnuamhnak cu
an in pek lai.
3Felnak le zumh awk tlakmi sinak kha
i chuahtakter hna hlah,
Na hngawng ah i ngerh hna law
na lung tlap cungah i ṭial hna.
4Cuticun Pathian le minung
mithmuh ah
Mithmai ṭha le thangṭhatnak
na hmuh lai. #Luk 2.52
5 Bawipa kha na lung chung dihlak in
i bochan law
Nangmah fimnak kha i rinh hlah.
6Na kalnak lam kip ah amah kha
hngal law
Amah nih na lam kha a tluanter
hna lai.
7Mah mithmuh i a fimmi va si hlah;
Bawipa kha ṭih law ṭhat lonak kha
mertak ko. #Rom 12.16
8Na taksa caah damnak a si lai i
na ruh caah si a si lai.
9 Bawipa cu na chawva le na thilri
theitlai hmasa bik hna in
upat tuah;
10Cun na rawl inn cu khat thluahmah in
an um lai i
Na mitsur nennak khor cu
mitsur hang in an liam lai.
11Ka fapa, Bawipa chimhhrinnak cu
zei rel loin um hin hlah.
An mawhchiatnak nih cun
in nor hlah seh, #Job 5.17 #Heb 12.5-6
12Zeicahtiah pa nih a duhmi a fapa cu
a chimhhrin bangin
Bawipa nih a dawtmi kha
a chimhhrin ve hna. #Biat 3.19
13Fimnak a hmumi cu a lung aa lawm,
hngalhthiamnak a ngeimi zong
aa lawm ve;
14Zeicahtiah fimnak cu ngun nakin
a ṭha deuh i
miaknak a chuahpimi cu sui nakin
a ṭha deuh.
15Fimnak cu rubi lungvar man sungmi
nakin a sung deuh,
na hlawn vialte ah amah tluk
zeihmanh an um lo.
16Nun saunak cu a orhlei kut chungah
a um i
a kehlei kut ah rumnak le
upatnak an um.
17A lam cu lam nuam an si i rumnak
phakpitu lam an si.
18Amah aa tlaihmi hna caah cun
nunnak thingkung a si i
amah kha fek tein aa tlaihmi cu
him tein an um.
19 Bawipa nih fimnak in vawlei kha
a rak dirh;
hngalhthiamnak in van kha
a hmunhter hna;
20A thiamnak thawngin ti thuk hna cu
an i sat i
khuadawm nih dap kha a thlak hna.
21Ka fapa, fimnak ṭha le ruahthiamnak
cu i ken hna,
na mit hmuhnak chungin
liamter hna hlah;
22Annih cu na thlarau caah
nunnak an si lai i
na hngawng caah ṭamhnak an si lai.
23Khi tikah himbawm tein na kal lai i
na ke cu an i chuihpah lai lo;
24Na ṭhut ah na thin a phang lai lo,
na ih tikah na mitkuh a thaw lai.
25Mihrut mi hna cung i a tlungmi
launak ruangah khan
na thin va phang hlah;
miṭhalo cung i a tlungmi rawhralnak
ruang zongah khan
na thin va phang hlah;
26Zeicahtiah Bawipa cu na hnangamnak
a si lai i
na ke cu aa awh nakhnga lo
amah nih an zohkhenh lai.
27Nangmah kut chungah ṭhatnak
tuah khawhnak kha a um tikah,
a hmu hnga ding a simi sinin
ṭhatnak kha va kham hlah.
28Nangmah sinah naa chiah ko nain,
“Va kal law ra ṭhan te, thaizing ah
kan pek lai,” tiah na hawi kha
ti hna hlah.
29Nangmah kha bochan in na pawngah
khua a sa khirkhiarmi na innpa caah
ṭhat lonak khua va khang hlah.
30Na cungah ṭhat lonak zeihmanh
a tuah lo ahcun,
zei ruang lo ah aho he hmanh
vaa si len hlah.
31Zaang en hmangmi cu
va hngar hna hlah,
a lam zong kha zeihmanh
vaa thim hlah;
32Zeicahtiah mi lungthin ṭhalo cu
Bawipa caah fihnung an si i
miding mi cu Pathian nih
a zumhmi an si.
33 Bawipa chiatserhnak cu miṭhalo
mi hna inn cungah a tlung i
sihmanhsehlaw miding mi hna
umnak cu thluachuahnak a pek.
34Mi zei ah a rel lomi hna cu
zei ah a rel ve hna lo i
mi toiah aa dormi hna cu
duhdawtnak a pek hna. #Jei 4.6; 1Pet 5.5
35Mifim mi nih upatnak cu an co lai,
sihmanhsehlaw mihrut mi nih
zohchuknak kha an hmuh lai.
Currently Selected:
PHUNGTHLUKBIA 3: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
