PHUNGTHLUKBIA 2
2
Fimnak Kawl Man
1Ka fapa ka bia kha naa lak hna i
ka nawlbia kha na lung chungah
naa khon hna i
2Fimnak leiah na hna na chit i
hngalhthiamnak leiah na lungthin
na pek ahcun,
3Ahmaan le hmaanlo
thleidan khawhnak
lungthin kha na auh i
hngalhthiamnak kha na kawh ahcun,
4Ngun bantukin na kawl i thuhmi ro
bantukin na kawl ahcun,
5khi tikah Bawipa ṭihnak cu
na hngalh lai i
Pathian hngalhnak cu na hmuh lai.
6Zeicahtiah Bawipa nih cun fimnak kha
a pek hna i
hngalhnak le hngalhthiamnak kha
a cawnpiak hna.
7Miding mi hna caah fimnak ṭha kha
a khon i
ding tein a kalmi hna caah amah cu
phaw a si i
8Biading lam kha a ven i a mithiang
mi hna lam kha a congh.
9Khi tikah dinnak le biading cu
na hngalh lai i
miṭha mi hna lam kha na zulh lai;
10Zeicahtiah fimnak cu na lung
chungah a lut lai i
na lungthin caah hngalhnak cu
a nuammi a si lai.
11Fimnak nih an ven lai,
hngalhthiamnak nih
an zohkhenh lai;
12Miṭhalo hna lam chung khan
an khamh lai i
holh ṭhalo hmangmi hna sin khan
an luatter lai.
13Annih cu muihnak lam zulh awkah
dinnak lam a hlawt i
14Ṭhat lonak tuah ah aa lawm i
hlenthawinak ah cun
aa nuammi an si;
15Annih lam cu a kawi i
an thil tining ah
midepde an si.
16Nu zuangzam sinin an khamh lai i
nu ralṭha, bia thlumthlum a hmang i
17A no lio caan a hawikom kha
a hlawt i
a Pathian biakamnak a philhmi
sin khan an khamh lai.
18Zeicahtiah a lam cu thihnak leiah
a vung kal i
mithi mi hna ram leiah khan
a vung lan.
19A sin i a va kalmi paoh cu ahohmanh
an kir ti lo,
nunnak lam zong an hmu ṭhan ti lo.
20Cucaah miṭha mi hna lam cu zul law
miding mi hna lam cu i tlaih tuah.
21Zeicahtiah miding mi hna cu
hi ram chungah hin khua
an sa kho lai i
ding tein khua a sami hna cu
hi ram chungah hin an um lai.
22Sihmanhsehlaw miṭhalo hna cu
ram chung khan hlonh an si lai i
mi rawi hmangmi hna cu
ram chung cun phawi an si lai.
Currently Selected:
PHUNGTHLUKBIA 2: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
