PHUNGTHLUKBIA 4
4
Fimnak Ṭhathnemnak
1Maw ka fapale hna, nan pa
cawnpiaknak hi ngai u law,
hngalhnak nan ngeih khawh nakhnga
ṭha tein ngai tuah u;
2Zeicahtiah nunchimhnak kan pekmi
hna cu a ṭhami nunchimhnak an si i
Kan cawnpiaknak hna hi hlaw hlah u.
3Ka pa caah ngakchia ka rak si i
ka nu caah fapa dawt, a nomi
ka rak si tikah khan,
4Ka pa nih cun a ka cawnpiak i,
“Ka bia hi na lung in fek tein
i tlaih hna,
ka nawlbia hi zul hna law nung tuah;
5Ka chimmi bia hi philh hna hlah law i
theihter duh loin um hna hlah.
6A hmasa bik ah a herhmi cu fimnak
hmuh hi a si;
hngalhthiamnak kha
na ngeihmi vialte na hloh dih ding
a si zongah i cawk.
7Fimnak cu hlaw hlah, amah nih cun
him tein an zohkhenh lai;
amah cu daw law an huhphenh lai;
8Na lung chungah i chiah law
sangpi ah an cawi lai,
i pom law upatnak an phakter lai.
9Aa dawhmi pangpar rual
na lu cungah a chiah lai i
nangmah cu sunparnak luchin an pek
lai,” tiah a ti.
10Ka fapa, ka bia cu ngai law pom hna,
na nunkhua a sau lai.
11Fimnak lam kha kan cawnpiak lai i
dinnak lam ah khan kan hruai lai.
12Na kal tikah na ril lai lo i
na tlik zongah
zeihmanh nih an tlukter lai lo.
13Cawnpiaknak kha i tlaih peng law
thlah hlah;
Cucu zul peng tuah, na nunnak a si.
14Miṭhalo hna lam ah cun lut hlah,
miṭhalo hna lam cu zul hlah;
15Hrial law a cungah cun kal hlah,
pialtak law kaltak ko.
16Zeicahtiah annih cu thil sual
pakhat tal an tuah lo ahcun
an it kho lo i
mi pakhat tal an tlukrilhter hna lo
ahcun an i hngilh kho lo.
17Ṭhat lonak changreu kha an ei i
zaang-ennak zu kha an din.
18Sihmanhsehlaw miding
mi hna lam cu
zingka ceunak, chun laicer tiangin
a ceu chin lengmangmi bantuk a si.
19Miṭhalo hna lam cu zan muihnak
bantuk a si,
Zei cungah dah kan tluk i
kan rilh ti kha an hngal lo.
20Ka fapa ka bia cu ngai hna law
ka chimmi cu na hna chi tuah hna.
21Na lung chungah i chiah hna law
lohter hna hlah.
22Zeicahtiah aa hmuhmi caah
cun nunnak an si i
a pum dihlak damnak an si.
23Na lung kha ṭha tein veng tuah,
Zeicahtiah cuka cun nunnak
cerhti kha a put.
24Hrokhrawl bia cu na kaa chungin
chuahter hna hlah law
Depdetnak bia cu hlaw diam ko hna.
25Na mit nih ding tein hmailei kha
zoh ko hna seh,
Na hmai i a ummi thil cu fek tein
i zohchih ko.
26Na ke nih a lamhmi lam kha ṭha tein
zoh law cuticun him tein
na kal kho lai. #Heb 12.13
27Orhlei ah siseh, kehlei ah siseh,
pial hlah;
Ṭhat lonak vialte kha hrial dih hna.
Currently Selected:
PHUNGTHLUKBIA 4: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
