PHUNGTHLUKBIA 22
22
1Min ṭhat maw chawva tampi dah
naa thim lai, ti na si ahcun,
min ṭhat kha vaa thim deuh.
2Mirum le misifak hna cu an i dang lo
zeicahtiah Bawipa sermi cio an si.
3Mifim nih cun harnak a rat kha
a hmuh tikah hrial khawhnak
aa zuam,
sihmanhsehlaw mihrut nih cun
a pahchih thluahmah ko i
a hnuah aa ngaichih.
4 Bawipa kha ṭih, mi toiah i dor law
rumnak le upatnak le nunsaunak
kha na hmuh lai.
5Miṭhalo mi hna lam ah cun
hling le rap an um;
aa ralringmi nih cun a hrial in
a hrial hna.
6A zulh awk a simi lam kha
ngakchia cu cawnpiak law,
a upat tikah mah cucu
a pialtak ti lai lo.
7Mirum nih misifak kha an uk hna,
cawitu cu coihtu sal a si.
8Dinlonak thlaici kha na tuh ahcun
harnak kha na zun lai i
na rian theitlai cu fungfek kha a si lai.
9Siannak lungthin a ngeimi cu
thlua a chuak lai,
zeicahtiah a rawl kha sifakmi
a hrawm hna.
10Mi lungpuam kha dawi u law
rem lonak a lo lai, siknak le
holh ṭhalo a dong lai.
11Siangpahrang cu faknak in
na hawikom ah na ser khawh lai,
sihmanhsehlaw Bawipa nih
lungthiangmi kha a duh hna.
12Lihchimmi bia kha lih an si tiah
Bawipa nih a langhternak thawngin
biatak cu him tein a kilven.
13Mithathu cu inn ah aa benh ko,
lengah ka chuah ahcun chiandeih
nih a ka seh lai, a ti.
14Va cungin pa aa duhmi bia cu
khor thuk bantuk a si,
Bawipa nih chiat a serhmi hna cu
cuka ah cun an tla lai.
15Ngakchia nih hin hruhnak thil le thil
ṭhalo hi an tuah tawn phung a si,
Sihmanhsehlaw chimhhrinhnak fung
nih cun ṭha deuh in
a cawnpiak hna lai.
16Sifak mi hrem cu miaknak
a si sawk ko lai,
sihmanhsehlaw mirum sin, i ser cu
sifahnak a si.
Nunchimhnak le Ralrin Peknak Bia Sawm Thum
17Na hna chi law mifim mi bia hi kan
cawnpiak lai.
Cun na lungthin cu ka fimnak na
hmuh nakhnga caah hmang tuah;
18Zeicahtiah na lung chung i chiah cu
a nuammi a si lai i
Na duh chel paoh ah khan na vun lak
khawh hna lai.
19 Bawipa kha i bochan tiah nangmah cu
kan duh caah
Nihin ah hin hi thil hna hi nangmah
ca ṭhatnak ding caah kan chimh.
20Hika ah hin nangmah caah fimnak bia
sawm thum kan ṭialpiak,
hi bia hna cu hngalhnak in a khatmi le
lungthin cheuhnak ṭha in
a khatmi an si.
21Cu bia hna nih cun biatak kha zeidah
a si taktak ti kha an in cawnpiak lai
i nangmah an fialtupa sinah khan
ahmaanmi bia cu na kirpi ṭhan
khawh lai.
22Sifakmi cu sifak an si ruangah
zeitikhmanh ah va ramh hna hlah,
Retheimi zong zung chungah
va hrial hlah.
23Zeicahtiah annih cu Bawipa nih a dirpi
hna lai i anmah an nunnak ca i
a simi an thilri a lakpiaktu hna kha
an thilri a chuh ve hna lai.
24Thinhun a hmang lengmangmi cu
va kom hlah, thin tawimi zong
va kom hlah,
25A lam kha naa cawn sual lai i
nangmah le nangmah rap ah
naa foih lai.
26Mi leiba ruangah
aamah vaa khang hlah,
27Na cham khawh lo sual ahcun
na ihkhun zong
an in lakpiak lai.
28Nan pupa hna nih an rak chiahmi
ramri tung kha ṭhial hna hlah.
29Amah a rian ah a thiammipa cu
siangpahrang hna hmaiah
a dirmi a si lai,
mi sawhsawh hna hmai men ah
a dirmi a si lai lo.
Currently Selected:
PHUNGTHLUKBIA 22: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
