PHUNGTHLUKBIA 23
23
1Uktu bawi hna he rawl ei ah
na ṭhut tikah, aho an si kha
ṭha tein va ruat.
2Cun pawkaumi na si ahcun
na or kha i sum.
3An in pekmi rawl thawthaw kha
hakkau tuk in ei hna hlah,
Zeicahtiah hlen an in timh
a si kho ko.
4Rumnak hmuh awkah i hre tuk hlah,
ngol awkah fimnak a za ngei tuah.
5Na tangka cu mitṭhep ah an lo kho ko,
Thla kha i serh duak in mupi bangin
an zuang kho ko.
6A khiar mipa zanriah cu va ei hlah,
a rawl thawthaw zong kha
na mit va thi hna hlah;
7“Ei tuah hen, ding tuah hen,”
an ti lai,
Sihmanhsehlaw cucu a chim duh
taktakmi a si lo.
8Amah cu na hrom ah sam bantuk ah
a cang lai i
Na eimi vialte kha na luak dih lai i
na faknak bia vialte cu santlailo
ah a cang lai.
9Mihrut theihhngan ah cun bia
va chim len hlah,
Fimnak bia na chimmi cu
zeihmanh ah a rel ṭung lai lo.
10Hlanlio ramri tung kha ṭhial hna hlah,
Ngakṭah kha an lo chut hna hlah;
11Zeicahtiah annih nih a ṭhawngmi
hupphengtu an ngei i
Amah nih cun nangmah kha
taza an in cuai tikah an bia
a chimpiak hna lai.
12Na saya nih an cawnpiakmi kha
ṭha tein ngai law
Fimnak kha naa lak khawh chungin
i lak tuah.
13Ngakchia chimhhrin cu i sum hlah,
fung in na tuk ahcun a thi lai lo,
14Bia ngaingai ti ahcun, Sheol chungin
na khamh a si lai.
15Ka fapa mifim na si ahcun keimah
zong ka lung aa lawm lai.
16Fimnak bia na chim kha
ka theih tikah
keimah zong ka rak i lawm
ngaingai lai.
17Misual kha tluk i zuam hna hlah,
nifate in Bawipa a ṭihmi bel kha
hngar ko hna;
18Cu bantukin na tuah ahcun hmailei ah
ceunak na hmuh lai i na nun khua
zong a sau lai.
19Ka fapa, ngai law fim tuah,
ahmaanmi lam zulh awk kha
i sehchih tuah.
20Zuri hna he i kom hlah, sarammi
hna he zong i kom hlah;
21Zeicahtiah zurimi le sarammi cu
sifahnak an phan lai,
ei le ih lawng na rianh ahcun
puanchia he na vak tuan ko lai.
22Nangmah an hringtu na pa kha a bia
va ngai, na nu kha a tar tikah
va serhsat hlah.
23Biatak kha vaa cawk law zuar ti hlah,
fimnak, cawnpiaknak le
hngalhthiamnak kha i cawk hna.
24Miṭha mi hna an pa cu
aa lawm ngaingai lai;
fapa fim a hringmi pa cu a fapa hna
cungah khan aa lawm lai.
25Na nu le na pa cu lawmhter hna,
nangmah an hringtu cu lawm tein
um seh.
26Ka fapa, ka bia cu i chingchiah hna
law ka nunning hi i zohchunh tuah.
27Hlawhhlangnu cu khor thuk a si,
ralṭha nu cu a bimi tikhor a si.
28Mifir bangin mi a bawh hna i
a va kha pa pakhat hnu pakhat
sinah a rawi lengmang.
29Ahodah chimpit vansang in
a um tawn?
Ahodah a ngaih a chia tawn?
Ahodah mi he aa si tawn?
Ahodah bia a ngei tawn?
Ahodah zei ruang lo ah hma
a ing tawn?
Ahodah mit sen remrum in
a um tawn?
30Zu a camhmi, rim thar he
cawhmi zureu
a hneksak lengmangmi kha an si.
31Hrai chungah sen kirker tein a um i
tleu dildel tein a lang i
vun dolh ah nal ngaiin lanh dawh
a simi zu khi va zoh hlah.
32A donghnak ah cun rul bantukin mi
a cu i ping-er sivai bantukin
mi a henh.
33Khi tikah na mit nih thil khuaruahhar
a hmuh hna lai i.
Fiang tein khua na ruat kho lai lo i
aa ningcang loin bia na chim lai.
34Rili ah lawngin a kal i a rimi bantukin
na um lai i
aa hnin lengmangmi lawng puanzar
ah khin i awk law
cu ko cu na lo lai.
35“An ka tuk an ka den i a si ṭheo lai,
sihmanhsehlaw zeihmanh
ka hngal lo,
Zeicahdah kaa hlauh khawh lo ee?
Din ṭhan ka herh rih i a si ko
hi ta,” na ti lai.
Currently Selected:
PHUNGTHLUKBIA 23: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
