PHUNGTHLUKBIA 1
1
Phungthlukbia Ṭhathnemnak
1David fapa Solomon, Israel siangpahrang phungthlukbia: #1Sia 4.32
2Hi phungthlukbia thawng hin
Mi nih fimnak le cawnpiaknak kha
an hngalh lai i
Ruahnak thuk bia kha
an hngalhthiam lai i
3Umtuzia thiamnak le dinnak le
biading ca le i ruannak ding ca i
cawnpiaknak kha an hmuh lai.
4Lungtlawm mi nih fimnak
an hmuh lai i
Seino mi nih hngalhnak le
ruahthiamnak an hmuh lai.
5Cun mifim zong nih an ngaih ahcun
an fimnak a ṭhang lai i
Hngalhthiamnak a ngeimi nih thiamnak
an hmuh chin lai i
6Phungthluk bia hna le tahchunhnak
bia hna le
Mifim mi hna an bia le an biahar kha
an hngalh khawh hna lai.
Seino Lungthin Cheuh
7 Bawipa ṭih hi hngalhnak
hramthawknak a si;
Sihmanhsehlaw mihrut nih cun
fimnak le cawnpiaknak kha
zei ah an rel lo. #Job 28.28; Slm 111.10; Phut 9.10
8Ka fapa, na pa cawnpiaknak cu
ngai law
Na nu ṭhithruainak cu hlaw hlah.
9Zeicahtiah na lu caah aa dawhmi
pangpar ṭhi rual
an si lai i
Na hngawng caah pumṭek ṭhi
an si lai.
10Ka fapa, misual mi nih
an in lem ahcun,
na hna tlakpi hna hlah.
11Annih nih an in thawh i, “Kan sinah
ra ve, thisen chuah awkah
bawh hna u sih,
A sual lomi cu thlachiat ruat loin
lamhruang ah hna u sih;
12Sheol bantukin an nung na bu in
dolh hna u sih;
Sualnak an ngei lo nain khor chung i
a vung kalmi hna bantuk khi
si hna seh.
13Thil man sung vialte cu kan lak dih
hna lai i
Kan inn cu hranchaw in kan khahter
hna lai;
14Kan sinah i tel ve ko,
Tangka bawm kan i hrawm lai,”
an in ti tikah,
15Ka fapa, an sinah cun kal ve hlah,
An lam kha zul hlah;
16Zeicahtiah an ke cu ṭhat lonak leiah
a tlik in an tli i
Thisen chuah awkah
a nam in an i nam.
17Vate hmuhhngan i chiahmi rap cu
pakpalawng a si tawn.
18Sihmanhsehlaw hi mi hna nih
an bawhmi cu
anmah thisen lila kha a si i
Lamhruang an ahmi cu anmah
nunnak lila kha a si ko.
19Zaang-ennak in miaknak hmuh
a duhmi hna lam cu
hi bantuk hi a si.
Hakkauhnak nih an nunnak kha
a hloh tawn.
Fimnak Nih Sawmnak
20Khuachung lam ah khan
fimnak cu a au,
Chawdawrnak hmun ah khan a au; #Phut 8.1-3
21Kulhnak vampang cung khan a au i
Khua chung luhnak kutka hna
ah khan bia a chim:
22“Zei can dah maw mihrut rual hna,
hruh kha nan duh rih ko lai?
Zei can dah, mi nihsawh
hmangmi hna,
mi nihsawh kha a nuam nan ti lai i
mihrut nih fimnak kha nan huat lai?
23Kan chimhhrin hnanak kha nan ngaih
ahcun ruahnak kha
kan cheuh hna lai i
Ka bia kha kan cawnpiak hna lai.
24Sihmanhsehlaw kan kawh hna i
ngaih nan duh lo,
Ka kut kha ka samh i ahohmanh nih
zei ah nan rel lo.
25Fim kan chimhmi hna vialte kha
nan hnon i
Kan chimhhrin hnanak vialte cu
zeihmanh nan duh lo caah,
26Kei zong nih vanchiatnak
nan ton ni ah le
Launak nih an den hna tikah
kan nihsawh men ve hna lai.
27Launak nih thlichia bangin
an den hna tik le
Nan vanchiatnak cu phuchim bangin
a rat i
Harnak le vansang aunak nih
an tlunhnawh hna tikah,
a nih in kan nih men ko hna lai.
28Khi tikah cun an ka auh lai,
sihmanhsehlaw ka let hna lai lo;
An ka kawl len lai, sihmanhsehlaw
an ka hmu lai lo.
29Annih nih hngalhnak kha an huat i
Bawipa ṭihnak kha an i thim lo caah
30Lungthin ka cheuhmi hna kha
pakhat hmanh an cohlang duh lo i
Ka chimhhrin hnanak cu zeihmanh ah
an rel lo.
31Cucaah annih nih an ziaza theitlai cu
an ei lai i
Anmah khuakhannak lila nih cun
a nor cikcek hna lai.
32Zeicahtiah lungtlawm pawl cu anmah
pialnak nih khan a thah hna i
Mihrut hna cu zei ruat khak loin
an umnak nih khan a hrawh hna,
33Sihmanhsehlaw ka bia a ngaimi cu
him tein an um lai i
Vanchiatnak zeihmanh ṭih loin,
zalong tein an um lai,” tiah a ti.
Currently Selected:
PHUNGTHLUKBIA 1: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
