PHUNGTHLUKBIA 16
16
1Minung nih khua cu
an khan ko lai,
sihmanhsehlaw a donghnak bia
a ngeitu cu Pathian a si.
2Na tuahmi cu a ṭha dih in
na ruah ko lai,
sihmanhsehlaw Bawipa nih naa
tinhnak na lungthin cu
a hngalh dih.
3Na tuahmi vialte cu Bawipa sinah
pe law
Na khuakhannak cu a tling kho lai.
4 Bawipa nih zeizong vialte hi
anmah ca i tinh ciomi caah
khan a ser hna,
miṭhalo hna hmanh hi, harnak ni
caah a ser hna.
5Miruamkai cu Bawipa caah fihnung
an si,
hnadai tein um ko, dantatnak
hmu loin an um lai lo.
6Pathian leiah felte le zumhawktlak
tein um ko law na sualnak
cu an ngaihthiam lai.
Cun Bawipa kha ṭih law ṭhat lonak nih
an tlunhnawh lai lo.
7Mi cu a umtuning kha Bawipa duhning
a si ahcun,
a ral hna hmanh kha amah he
i rem tein a umter hna.
8Dinlonak in hmuhmi thil tampi
nakcun dinnak in hmuhmi
tlawmte a ṭha deuh.
9Minung nih hin a khualtlawnnak ding
khua kha a khan,
sihmanhsehlaw a kephau a hruaitu cu
Bawipa a si.
10Pathian chimhmi biakhiahnak cu
siangpahrang hmur ah cun a um,
biaceih tikah a kaa nih sualnak
a tuah lo.
11A dikmi tahnak le khing hna cu
Bawipa duhmi an si,
zal chung i a ummi
cuaithlainak lung vialte hna zong
amah nih a tuahmi an si.
12Siangpahrang caah cun ṭhat lonak
tuah hi fihnung a si,
zeicahtiah bawi ṭhutdan cu
dinnak in fehter a si.
13Bia hmaan chim cu siangpahrang
lawmhmi a si,
cun biatak a chimmi cu a dawt hna.
14Mifim nih cun siangpahrang cu
a lung lawmhter aa zuam,
siangpahrang cu a thin a hun ahcun
pakhatkhat thah an si sual lai.
15Siangpahrang hmai ceunak chungah
nunnak a um,
cun a zaangfahnak cu ṭhal ruah a hun
ratpitu khuadawm bantuk a si.
16Fimnak ngeih hi sui nakin
a ṭha deuh,
hngalhthiamnak ngeih hi
ngun nakin
thim deuh awk a si.
17Miding hna nih cun ṭhat lonak
a hrialtu lam kha an zulh,
cucaah khuazei i na kal kha zoh tuah,
na nunnak an khamh khawh lai.
18Porhlawtnak nih hin rawknak ah mi
a kalpi tawn i
uanthlarnak lungthin nih hin
tluknak ah a hruai tawn hna.
19Misifak hna he toidornak lungthin in
um cu,
miporhlaw hna he hranchaw i ṭhenh
nakin a ṭha deuh.
20An in cawnpiakmi kha ṭha tein
ruat law khuaawng na tong lai,
Bawipa kha i bochan law na lung
aa lawm lai.
21A fim i nutling patling lungthin
a ngeimi cu,
thil a thleidang khomi ti a si i
a awka a thlum deuh paoh ah mi
a lem khawh chin hna.
22Fimnak cu a ngeitu caah cun
nunnak cerhti a si,
sihmanhsehlaw mihrut cu
a hruhnak nih dantatnak a inter.
23Mifim nih cun bia a chim hlanah
a ruah hmasa,
cucaah a chimmi cu hmual a ngei.
24Biathlum cu khuaihliti bantuk a si,
nunnak caah a thlum i pum caah
damnak a si.
25Na ruahnak i lam ding a si na timi kha
thihnak lei kalpitu lam a si ko hnga. #Phut 14.12
26Rianṭuantu cu a rawl duhnak nih khan
fak deuh in a ṭuanter,
zeicahtiah a rawlṭamnak kha
daihter a duh.
27Mizeiruaramlo nih, congoihnak kha
a vahpi,
a bia cu kanghtu mei bantuk a si.
28Mi lungthin ṭhalo nih rem lonak kha
an karhter i
Mi dupdap nih hawikom ṭha kha
an ṭhen hna.
29Zaang-ennak a hmangmi nih
a innpa kha a hlen i
A ṭhalo lam ah khan a kalpi.
30A mit curcudup in aa aumi cu
a lungthin chung i
dawtnak a ngei lomi a si,
a hmur aa iapmi nih cun thil ṭhalo
kha a tlunter tawn.
31Ṭuakpar hi sunparnak bawiluchin
a si,
nun a dingmi nih an hmuh.
32Thinhun leiah a khul a nuarmi cu
thazang a ṭhawngmi nakin
a ṭha deuh.
A lungthin aa uk khomi cu khuapi
a latu nakin a ṭha deuh.
33Camcawhfung cu phei cungah hrilh
a si tawn,
sihmanhsehlaw biakhiahnak
taktak cu
Bawipa sin lawnglawng in a si.
Currently Selected:
PHUNGTHLUKBIA 16: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
