PHUNGTHLUKBIA 17
17
1I sik lengmang bu i puai tuahnak
inn i um nakcun
daite i buhṭhing pei khat ei
a ṭha deuh.
2A fimmi sal nih a bawipa fapa,
zeiruaramlo a simi kha a uk lai i
unau pakhat ve bantukin ro kha
a co ve lai.
3Sui le ngun cu mei in hneksak an si,
minung lung cu Bawipa nih
a hneksak.
4Mihrokhrawl cu hrokhrawl bia lawng
kha a thlingthla,
lihchim hmang nih cun thangchiatnak
bia lawng kha a ngai.
5Misifak nihsawh cu a Sertu
nehsawh kha a si,
Mi nih van chiat an ton tikah
a di a riammi cu
dantat loin a luat lai lo.
6Tu le fa hi tar hna bawiluchin an si,
Fapa hna an sunparnak cu an pale hi
an si.
7Bia ṭha chim le mihrut an i tlak lo,
bia lih chim le bawi an i tlak lo chinchin.
8Mi a cheu nih, nawhthuh nih cun
camh bantukin rian a ṭuan khawh,
tiah an ruah,
zeipaoh a tuah khawh tiah an zumh.
9Midang sualnak a thup khotu nih
kha pa dawtnak kha a hmuh lai.
Sihmanhsehlaw kha thilte kha
hlasak in a sa lengmangmi nih cun
hawikom he ṭhennak a ser.
10Mihrut voi za khat tuk nakin,
mifim voi khat chimhhrin cu
thuk deuh a pil.
11Miṭhalo nih cun ralthawhnak
lawng kha an kawl,
annih cu a puarmi lamkaltu kha
an thlahhnawh hna lai.
12Mihrut a hruh lio i ton nakcun
a fa chuhmi vompi ton a ṭha deuh.
13Mi nih ṭhatnak cu ṭhat lonak in
a lehrulh ahcun,
ṭhat lonak cu a inn chungin aa ṭhial
bal lai lo.
14Sik hram i thawk hi ti khamnak a pem
hramthawk bantuk khi a si.
A kauh chin hlanah ngol ko.
15Miṭhalo thiamcoh le miding
sualphawt hi,
an pahnih in Bawipa mithmuh ah
fihnung an si veve.
16Mihrut caah cun tangka hi zei san dah
a tlaih?
Fimnak a ngeih lo ahcun fimnak cu
a cawk khawh lai maw?
17Hawikom nih cun zei tik paoh ah
dawt zungzal a si,
u le nau cu harnak i hrawm awkah
hrin kan si.
18Midang caah aamah aa khaang i
biakamnak caah aa pemi cu
mihrut a si.
19Remlonak a duhmi nih cun
sualnak a duh,
a inn kulhnak innka sang piin
a sermi nih
cun rawhralnak kha
a sawm ko hna.
20Ruahnak kawi a ngeimi cu khuaawng
an pem lo,
lei ṭhalo a ngeimi cu vanchiatnak
chungah an tla tawn.
21Fapa hrut cu a pa caah ngaihchiatnak
a si, a pa cu lunglawmhnak
a ngei lo.
22Lungthin lawmh hi si ṭha a si,
sihmanhsehlaw lungthin ngaihchia
nih ruh kha a roter.
23Biaceihtu ṭhalo nih ziknawh
an lak tawn i
dinnak in bia an ceih lo.
24Lungthin a tlamtling cangmi nih cun
thil ṭha tuah awk kha an hngalh,
sihmanhsehlaw a tlam a tling lomi
nih cun an lungthin an thlek kho lo.
25Fapa hrut nih cun a pa kha
awlokchong in a tuah i
a hringtu a nu caah lungretheihnak
a si.
26Miding mi dantat cu a ṭha lo,
miṭha mi hna fung in tuk cu palh a si.
27Amah aa zum vemi nih cun bia tampi
a chim lo,
dai tein a ummi cu thil thuk piin
a hmu khomi an si.
28Mihrut hmanh hi daite in a um ahcun
mifim ah rel a si,
a hmur aa cip peng ahcun
mifim ah ruah a si.
Currently Selected:
PHUNGTHLUKBIA 17: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
