PHUNGTHLUKBIA 15
15
1Lehnak nem nih thinhunnak
a damter,
sihmanhsehlaw biahrang nih cun
thin a phawh.
2Mifimpa lei nih hngalhnak kha
a karhter,
sihmanhsehlaw mihrut nih cun
pakpalawng bia kha a chim.
3 Bawipa nih khuazei ka i thil a ummi
hmanh kha a hmuh dih,
ṭhatnak kan tuah ah siseh, chiatnak
kan tuah ah siseh,
a kan hmuh dih ko.
4Bia nem cu nunnak thingkung a si,
sihmanhsehlaw ṭhat lonak a tuahtu
lei nih lungthin kha a khuai tawn.
5Mihrut nih a pa chimhhrinnak kha
zei ah a rel lo,
sihmanhsehlaw mawhchiatnak
zei ah a relmi cu mifim a si.
6Miding nih an chawva kha
an i chiah khawh,
sihmanhsehlaw harnak caan
a phak tikah
miṭhalo nih cun an thlau hna.
7Mifim hmurka nih hngalhnak kha
an ṭhanter,
mihrut lungthin tu cu, cu bantuk
a si lo.
8Miṭhalo hna raithawinak cu Bawipa
caah fihnung a si,
sihmanhsehlaw miṭha hna
thlacamnak cu a lawmhmi a si.
9Miṭhalo hna ziaza cu Bawipa caah
fihnung a si,
sihmanhsehlaw dinnak
a kawlmi kha a dawt hna.
10Palhnak kha na tuah ahcun fak piin
dantatnak na hmuh lai,
chimhhrinnak kha na duh lo
ahcun na thi lai.
11Sheol le Abaddon hmanh Bawipa hmaiah cun an lang ko,
minung lungthin chinchin cu
zeitluk in dah a langh lai!
12Miporhlaw nih cun chimhhrinnak
kha a duh lo,
mifim hna sinah khan ruahnak va hal
awkah a kal bal lo.
13Lungchung lawmhnak nih hmai
a panhter,
sihmanhsehlaw lungfahnak nih lungthin
a khuai tawn.
14Mifim nih cun hngalh chin lengmang
kha an duh,
sihmanhsehlaw mihrut cu
an hruhnak ah khan an i za ko.
15Harnak a ingmi hna caah cun nifate hi
ni har an si dih ko,
sihmanhsehlaw lung aa lawmmi hna
caah cun nunnak hi
a nuam zungzal ko.
16Bawipa ṭih bu tein tlawmte ngeih hi
tampi ngeih i hnahnawk ngai i
um nakin a ṭha deuh.
17Dawtnak aa telnak zanriah cu
an hringso he lawng hmanh
siseh law,
a thaumi caw sa in tuahmi zanriah,
huatnak aa telmi nakin
a ṭha deuh.
18Thintawi nih siknak a chuahter,
sihmanhsehlaw lungsaunak nih
rem lonak a damter.
19Mithathu lam cu hling nih
a buathnawh,
sihmanhsehlaw teimami lam cu
lampheipi a si.
20Fapa fim nih a pa kha a lawmhter,
sihmanhsehlaw a hrutmi mino nih
a nu kha a nehsawh.
21Mihrut cu an hruhnak ah khan
an i lawm ko,
sihmanhsehlaw mifim nih cun
ahmaanmi thil kha an tuah.
22Ruahnak i cheuhnak a um lo ahcun
khuakhannak kha a pingah
a kal tawn,
sihmanhsehlaw ruahnak cheutu
an tam ahcun a hlawh
a tling tawn.
23Mipa nih a lehnak kha
a lunghmuih ko lai,
sihmanhsehlaw a caan he
ahmaanmi bia fang khat cu
zeitluk in dah a ṭhat deuh!
24Mifim cu nunnak lam leiah khin
an hung kal,
thihnak lam leiah cun an vung kal lo.
25 Bawipa nih aa porhlawmi inn cu
a ṭheh,
sihmanhsehlaw nuhmei thilri kha
a humhak hna.
26 Bawipa nih miṭhalo hna ruahnak cu
a huat,
mithiang hna bia cu a lawmhmi
an si.
27A hak a kaumi nih a innchungkhar
cungah harnak a tlunter,
sihmanhsehlaw nawhthuh a duh lomi
cu saupi a nung lai.
28Miṭha nih cun bialehnak an tuah
hlanah an ruah hmasa,
miṭhalo nih cun khulrang in an leh,
sihmanhsehlaw an lehnak nih cun
harnak a chuahter.
29Miṭha nih thla an cam tikah Bawipa
nih a ngaihpiak hna,
sihmanhsehlaw miṭhalo cu zei ah
a rel hna lo.
30Hmaipanh nih mi a lawmhter,
thawngṭha nih mi a lawmhter chinchin.
31Chimhhrinnak a ṭhami kha ṭha tein
a ruatmi cu
mifim hna bu chungah khan
aa tel ve lai.
32Chimhhrinnak zei ah na rel lo ahcun
nangmah le nangmah
harnak naa pe,
sihmanhsehlaw chimhhrinnak kha
na cohlan duh ahcun
na fim chin lai.
33 Bawipa ṭih hi fimnak ding caah
cawnpiaknak a si,
upatnak phaknak lam cu
toidornak a si.
Currently Selected:
PHUNGTHLUKBIA 15: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
