PHUNGTHLUKBIA 13
13
1Fapa fim nih cun a pa nih
a chimhhrinnak kha a ngaih,
Sihmanhsehlaw mi lungpuam nih cun
ka palh tiah a ti bal lo.
2Miṭha nih cun dinnak theitlai kha
an ei,
sihmanhsehlaw mirawihmang
hna nih cun zaang-ennak kha
buh le sa tlukin an duh.
3Na biachimmi kha i ralring law
na nunnak kha naa veng kho lai,
ralrin loin bia a chimmi nih cun amah
lila kha aa hrawk ko.
4Mizaangthu pa nih cun
zeilo pakhatkhat kha
a duh ngaingai ko hnga,
sihmanhsehlaw cucu
a hmu bal lai lo,
rian fak piin a ṭuanmi tu nih cun
a duhmi paohpaoh kha a hmuh lai.
5Miding nih cun lihbia kha an huat;
Sihmanhsehlaw miṭhalo hna rian
ṭuannak cu fihnung le
ningzak an si.
6Dinnak tuahnak nih khan miding cu
a ven hna,
sihmanhsehlaw ṭhat lonak cu
mi sual mi hna tluknak a si.
7Mi a cheukhat cu mirum bantukin
an i umter, sihmanhsehlaw
zeihmanh an ngei lo,
a cheukhat cu sifak bantukin
an i um ter, sihmanhsehlaw
chawva tampi an ngei.
8Mirum nih a nunnak khamh awkah
tangka hman a hau.
Sihmanhsehlaw misifak cu
ahohmanh nih an tlerh lo.
9Miding hna cu ceu ngaiin a ceumi
meiceu bantuk an si.
Sihmanhsehlaw miṭhalo cu
a mit cuahmahmi meiinn bantuk
an si.
10Uahfaihnak nih cun rem lonak
lawng kha a chuahter.
Sihmanhsehlaw aa nawl thiammi
hawikom hna bu chungah cun
fimnak a um.
11Khulrang in hmuhmi rumnak cu
a ziam zau,
sihmanhsehlaw tlawmpal,
tlawmpal tein khonmi cu
a karhcho.
12Ruahchannak cu a nikhua
rauhter tikah hin lung a fak,
sihmanhsehlaw saduhthahmi cu a tlin
tikah hin nunnak thingkung a si.
13Chimhhrinnak bia zei ah
a rel lomi nih
amah cungah harnak a tlunter,
sihmanhsehlaw a zulmi nih cun
laksawng a hmuh lai.
14Mifim hna cawnpiaknak cu nunnak
cerhti a si,
mah cucu thihnak rap chungin
an luatter khotu a si.
15Fimnak ṭha nih duhdawtnak a hlawh,
Sihmanhsehlaw hlennak cu
rawhralnak lei lam kalnak a si.
16Mifim cu a fim i zei thil paoh kha
a thuhphenh,
Sihmanhsehlaw mihrut nih cun
a hruhnak kha a zar in a zar.
17Lamkaltu ṭhalo nih harnak chungah
a luhpi tawn hna,
Sihmanhsehlaw zumh awk tlak
lamkaltu nih cun zeizong vialte kha
an ṭhatter ṭhan tawn.
18Cawnpiaknak zei ah a rel lomi cu
sifahnak le ningzahnak nih
a phak hna,
sihmanhsehlaw chimhhrinnak zei ah
a relmi cu upatnak an hmu.
19Saduhthah tlin hi zeitluk in dah
a ṭhat!
Sihmanhsehlaw ṭhat lonak mertak hi
mihrut caah cun fihnung a si.
20Mifim hna sinah i chawk ve
lengmang law na fim lai,
mihrut hna he i kom law
a ping ah an in hruai lai.
21Misual mi cu vanchiatnak nih
a zulh hna,
sihmanhsehlaw miding cu ṭhatnak
laksawng an hmu lai.
22Miṭha nih cun an fa fa chin tiangin ro
an chiahpiak hna,
sihmanhsehlaw misual mi nih
an pumh luaimaimi chawva cu
miding hna sinah a kal ko lai.
23Thlawh lomi vawlei nih
misifak mi hna caah
rawl a za in a chuah ko lai,
sihmanhsehlaw cu zong cu dinlonak
thawngin a lo dih ko lai.
24Na fa cu dan na tat lo ahcun
na huat a si,
na dawt ahcun amah kha
chimhring tuah.
25Miding cu ei awk a za in an ngei,
sihmanhsehlaw miṭhalo cu
an rawl a ṭam zungzal ko.
Currently Selected:
PHUNGTHLUKBIA 13: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
