PHUNGTHLUKBIA 12
12
1Hngalhnak a duhmi nih cun a palh
tikah na palh tiah chimh kha
a duh,
palhnak chimh huat cu hruh a si.
2 Bawipa nih miṭha cu a lawmh hna,
sihmanhsehlaw ṭhat lonak khua
a khangtu cu sual a phawt hna.
3Mi hi ṭhat lonak nih a fehter kho lo,
sihmanhsehlaw miṭha hna hram cu
ṭhial khawh lomi hram an si.
4Nupi ṭha cu a va caah bawi luchin
a si,
sihmanhsehlaw ningzahnak
a tluntertu
nupi cu ruh chung i khensar
zawtnak bantuk a si.
5Miding hna tinhmi cu mi cung i
ding tein tuah kha a si,
sihmanhsehlaw miṭhalo hna khuakhannak cu
hlennak in a khat.
6Miṭhalo hna bia nih cun thisen
chuah ding kha a bawh,
sihmanhsehlaw miṭha hna bia nih cun
khamhnak kha a umter.
7Miṭhalo cu an tla i cucu an donghnak
a si,
sihmanhsehlaw miding hna tefa cu
an i peh lengmang.
8Na fim ahcun thangṭhatnak
na hmuh lai,
na hruh ahcun mi nih
an in zohchuk lai.
9Mah nunnak caah rian
a ṭuan ciahmahmi,
mi sawhsawhte si cu,
mingan bantuk i um i rawlṭam
ṭung nakcun a ṭha deuh.
10Miṭha nih cun an saṭil kha an zawn
an ruah hna,
sihmanhsehlaw miṭhalo cu an saṭil
cungah cun an puar.
11Amah a lote a thlo lengmangmi cu ei
awk a za in a ngei,
sihmanhsehlaw san a tlai lomi
rian i caan pakpalawng i hman cu
hruh a si.
12Miṭhalo hna ralhau cu tlak bantukin
a cim,
sihmanhsehlaw miding hna hram cu
fek tein a dir.
13Mi ṭhalo cu amah chimmi bia lila nih
khan rap ah a foihter,
sihmanhsehlaw miding cu harnak
chungin an luat.
14Mi cheukhat nih an bia thawngin
hlawh tlinnak an hmuh,
sun a cheu nih an kut rian ṭuannak
thawngin an hmuh awk hnga kha
an hmuh ve.
15Mihrut nih cun ka ding tiah a ruah
zungzal,
lungthin cheuhmi a ngaimi cu
mifim an si.
16Mihrut thinhun cu aa hngal zau,
sihmanhsehlaw mifim nih cun
serhsatnak kha zei ah rel duh loin
a umtak men ko.
17Biatak a chimmi nih cun
ding tein tehte a khan,
sihmanhsehlaw tehte ding lo cu
hlennak bia in a khat.
18Ruah set loin chimmi bia nih cun nam
chunh bangin mi a chunh,
sihmanhsehlaw mifim bia nih cun
hma kha a damter.
19Biatak cu zungzal in amah ningte
a si ko,
sihmanhsehlaw lih cu caan tawite
lawnglawng a nung.
20Ṭhat lonak khua a khangtu hna cu
anmah le anmah an i hleng ko,
sihmanhsehlaw zapi ca ṭhatnak
a kawlmi hna caah cun
lunglawmhnak a um.
21Miding hna cungah cun ṭhat lonak
a tlung lo,
sihmanhsehlaw miṭhalo hna nih cun
harnak lawnglawng kha an hmuh.
22 Bawipa nih lihchim hmangmi cu
a huat hna,
Sihmanhsehlaw miding cu
a lawmh hna.
23Mifim nih cun a fimnak kha
a langhter lo,
Sihmanhsehlaw mihrut nih cun
a hruhnak kha a thanh in a thanh.
24Miteima cu uktu an si lai,
sihmanhsehlaw mithathu cu
an thathutnak nih mi sal ah
a canter hna lai.
25Lung retheihnak nih minung cu
lunglawm loin a tuah,
Sihmanhsehlaw dawtnak bia nih cun
lunglawmhnak in a khahter.
26Miding nih cun ṭhat lonak
kha an hrial,
Sihmanhsehlaw miṭhalo nih cun
a pialtertu hna lam kha an zulh.
27Ramvai thathu nih
sa an kap kho bal lo,
Sihmanhsehlaw teimami nih cun
a sungmi chawva kha an hmuh lai.
28Dinnak cu nunnak lei kalnak lam a si,
Hruhnak cu thihnak lei kalnak
lam a si.
Currently Selected:
PHUNGTHLUKBIA 12: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
