PHUNGTHLUKBIA 14
14
1Nu fim nih an inn kha an sak,
sihmanhsehlaw nu hrut nih
anmah kut lila in an ṭheh dih hna.
2Miding nih cun Bawipa kha an ṭih,
sihmanhsehlaw midepde nih cun
zei ah an rel lo.
3Mihrut biachimmi cu
amah keng ca fungfek a si,
sihmanhsehlaw mifim cu
an hmurka nih a huhphenh hna.
4Cawtum um lonak ah cun buk cu
a lawngin an um ko,
sihmanhsehlaw cawtum thazang
chungin rawl tampi a chuak.
5Zumh awk tlakmi tehte nih cun
lih kha a chim lo,
sihmanhsehlaw tehte dinglo nih cun
lih kha a thaw ah aa chuahchih.
6Miporhlaw nih cun fimnak kha
a kawl nain a hmu lo,
sihmanhsehlaw hngalhthiamnak
a ngeimi caah cun fimnak cu
a fawitemi thil a si ko.
7Mihrut cu hrial ko hna,
zeihmanh an in cawnpiak khawh
ding a um lo.
8Zeicahdah mifim cu a fim?
Zeidah ka tuah lai ti kha
aa hngalh caah a fim.
Zeicahdah mihrut cu a hruh?
Ka hngalh tiah aa ruah caah a hrut.
9Mihrut cu an sual ah an zei a poi lo,
sihmanhsehlaw miṭha nih cun
ngaihthiamnak hmuh kha an duh.
10Na lunglawmhnak cu nangmah
tate a si,
na ngaihchiatnak zong nangmah
tate a si,
Ahohmanh na hrawm kho hna lai lo.
11Miṭhalo inn cu hrawh a si lai,
sihmanhsehlaw miding inn cu
a hungcho lai.
12Lam dik tiah na ruahmi kha
thihnak lei kalnak lam a si kho ko. #Phut 16.25
13Minung cu a nih len ko zongah
a lungchung tein a ngaih
a chia ko hnga,
lunglawmhnak a loh cang ahcun,
ngaihchiatnak a um zungzal ko.
14Miṭhalo nih a hmuh awk hnga
a simi kha a hmuh lai,
miṭha nih a tuahmi thawng khan
laksawng a hmuh lai.
15Mi lungthin tlawm nih cun zei paoh
kha a zumh,
sihmanhsehlaw mifim nih cun
a lamh ding kha ṭha tein a zoh.
16Mifim cu ralring tein a um i
ṭhat lonak kha a hrial,
sihmanhsehlaw mihrut cu
aa ralring lo i
khulrang tuk in a tuah tawn.
17Mi thin tawi nih cun thil hrut kha
an tuah tawn,
sihmanhsehlaw mifim deuhmi cu
an lung a sau.
18Mihrut nih cun an hruhnak
nih a hmuh awk hnga a simi kha
an co.
Mifim cu hngalhnak kha
bawi luchin ah chinhter an si.
19Miṭhalo cu miṭha hna hmaiah
khan an bawk,
miṭhalo cu miding hna kutka ah
khan an kun.
20Misifak cu ahohmanh nih an duh lo,
sihmanhsehlaw mirum cu hawikom
tampi a ngei.
21Lunglawmmi si na duh ahcun
misifak kha va zaangfah hna,
mi zeihmanh zeirello i um kha
sualnak a si.
22Ṭhatnak caah rian na ṭuan ahcun
mi nih an in zumh lai i
an in upat lai,
sihmanhsehlaw chiatnak caah
na tuah ahcun na palh hrimhrim ko.
23Rianṭuan harnak nih hin
ṭhathnemnak a chuahpi,
kaa chim men lawng nih cun
sifahnak lawng a chuahpi ko.
24Mifim hna bawi luchin cu thil
a chunglei an hmuh khawhnak
hi a si,
mihrut hna pangpar ṭhirual cu
an hruhnak hi a si.
25Biatak a chimmi tehte nih nunnak kha
a khamh,
sihmanhsehlaw lih a chimmi cu
mi rawitu a si.
26 Bawipa ṭihnak aa bochanmi
miṭhawng cu,
A tefa hna caah himnak a si.
27Thihnak in luat na duh maw?
Bawipa ṭihnak hi nunnak cerhti a si.
28Siangpahrang cu ukmi tampi
a ngeih tikah a lianngan,
ukmi a ngeih lo ahcun a bawinak cu
a lo ko.
29Dai tein a um khomi cu mifim a si,
sihmanhsehlaw mithintawi nih cun
zeitluk in dah a hruh ti lawng kha
a langhter.
30Lung daihnak nih pum kha
a ngan a damter,
sihmanhsehlaw nahchuahnak cu
khensar zawtnak bantuk a si.
31Misifak kha nan serhsat hna ahcun
anmah a Sertu Pathian nan serhsat
kha a si,
nan zaangfah hna ahcun cucu Pathian
biak a si.
32Miṭhalo cu amah ṭhat lonak nih
a thluk,
sihmanhsehlaw miding cu
a dinnak nih khan a huhphenh.
33Fimnak a ngeimi hna lung chungah
cun fimnak cu nuam tein a cam,
sihmanhsehlaw mihrut hna lung
chungah cun aa nuam lo.
34Miphun a lianhngantertu cu
dinnak a si,
sualnak cu zei miphun paoh caah
ningzahnak a si.
35Siangpahrang nih a felmi rianṭuantu
kha an lawmh hna,
sihmanhsehlaw an rian a tlolhmi cu
dan a tat hna.
Currently Selected:
PHUNGTHLUKBIA 14: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
