ISAIAH 48
48
Pathian Hi Hmailei Caan Uktu A Si
1Israel mi hna, hihi ngai tuah u,
Judah tefa hna, ngai tuah u.
Bawipa min in chiat nan ser i Israel
Pathian cu kan biak nan ti —
sihmanhsehlaw nan chimmi cu
pakhat hmanh a sullam nan ruahmi
a si lo.
2Asinain, kannih cu khua thiangmi
kan si,
Israel Pathian aa bochanmi kan si,
cu Pathian cu a min ah Ralkapbu Bawipa a si, tiin nan i porhlaw.
3 Bawipa nih Israel cu a thawh i,
“Hlan liopi khan a um ding thil cu
ka rak chimchung i cun
hmakhatte ah cucu ka hun umter!
4Lunghak mi nan si lai ti kha
ka hngalh cia,
thir bantukin a ṭhawng i dar bantukin
kuaih khawh lomi nan si.
5Nan hmailei caan cu hlanpi in
ka rak chimchung cang,
thil cu an hung um hlanah ka rak
thanh chung cang,
zeicahtiah cucu nan siasal nih
an tuahmi a si nan ti nakhnga lo le
nan thirdar milem nih an tluntermi
a si nan ti khawh nakhnga lo
caah a si.
6“Ka chimchungmi vialte kha
an tling dih;
ka chimchungmi kha an hmaan
nan ti awk a hau.
Atu cu a ra lai dingmi thil thar
kan chimh hna lai,
hlan i ka rak phuan bal lomi thil
kha kan chimh hna lai.
7Atu lawnglawng ah hi thil cu
ka umter hna,
hi bantuk hi hlan ah zeitikhmanh ah
a rak um bal lo.
8Rinh awk tlak na si lo cu ka hngalh,
na chuahka in midohhmang na si
cu hngalh a si.
Hi ti na rak si ruangah hin hi kong
na theih bal lonak le
bia pakhat hmanh na hna
a phak bal lonak cu a si.
9“Mi nih ka min kha an thangṭhat
khawh nakhnga,
ka thinhunnak cu kaa sum;
ka thin cu kaa sum hranhram i
ka hrawk hna lo.
10Ngun cu somei chungah hneksak
a si bangin
temhinnak mei chungah khan
kan hneksak hna.
Asinain santlailo nan rak si.
11Thil ka tuahmi hi keimah ca
lawnglawng ah a si ko,
ka min kha chiatter ka duh lo,
cun keimah ta lawnglawng a simi
sunparnak kha midang he
i hrawm zong ka duh fawn lo,” a ti.
Sairas Cu Bawipa Nih Hruaitu Ah A Thim
12“Ka thimmi Israel mi hna,
ngai tuah u,
keimah lawnglawng hi
Pathian ka si,
a hmasa bik le a hmanung bik ka si. #Isa 44.6; Biat 1.17; 22.13
13Ka kut in vawlei hram kha ka ser hna
i van kha ka samh hna.
Van le vawlei kha ka auh hna tikah,
khulrang tein an ra chuak.
14Nan dihlak in i pum u law
ngai tuah u.
Ka thimmi nih Babilon kha a tuk lai
tiah zei pathian hmanh nih
an rak chimchung kho lo;
ka thimmi nih cun ka fialmi kha
a tuah lai.
15Bia a chim i a kotu cu keimah ka si;
keimah nih ka chuahpi i
hlawhtlinnak ka pek.
16Cucaah ka naih u law ka chimmi kha
ngai tuah u.
A hramthawk tein hlangfang in
kan chimh hna i
ka bia cu ka tlinter zungzal,” a ti. (Atu cu Bawipa Pathian nih a ṭhawnnak kha a ka pek i
a ka thlah.)
17Israel Pathian thiang, nanmah
an khamhtu hna Bawipa, nih,
“Keimah cu Bawipa nan Pathian,
nan ca ṭhatnak cawnpiak
an duhtu hna le
nan zulh awk hnga lam
an hmuhsaktu hna ka si.
18“Ka nawlbia kha rak ngai u law,
ti ka hei duh dah!
Thluachuahnak cu nan caah,
zeitikhmanh i a reu bal lomi tiva
bantukin, a luan in a luang zungzal
ko hnga!
Ti kam a deng lengmangtu tilet
bantukin teinak cu nan sinah
a phan ko hnga!
19Nan tefa cu rili kam thetse zat in
an tam hnga i
zeitikhmanh i rawk kho lo dingin
ka ser hna hnga,” a ti.
20Babilon in chuak tuah u, luat in
kal tuah u!
“Bawipa nih a sal Israel cu
a khamh cang,” tiin thawngpang cu
lunglawmhnak in aupi u,
khuazakip ah thanh u. #Biat 18.4
21 Bawipa nih a mi cu a lin i a romi thetse
ram tan in a rak hruai hna tikah,
tihal retheihnak an ing lo;
lungpi chungin an caah ti
kha a chuahter;
lungpi kha a cheu i a chungin
ti a luang.
22 Bawipa nih, “Misual mi hna caah cun
himnak a um lo,” a ti. #Isa 57.21
Currently Selected:
ISAIAH 48: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
