ISAIAH 47
47
Babilon Biaceihnak
1 Bawipa nih,
“Babilon, na bawiṭhutdan cung
khan rung ṭum law
leidip lakah i bual tuah.
Hmasa ah cun ngaknu thiang
bantuk na rak si,
ahohmanh tei lo na rak si.
Asinain atu cu nem hniphnepte le
no cipcep tein na um ti lo,
atu cu sal na si cang. #Isa 13.1—14.23; Jer 50.1; 51.64
2Facang rialnak lung kha mer ko kun,
changvut kha rial ko kun.
Na hmai khuhnak puan kha i phawih
law na thil thuam ṭhaṭha kha
i phawih hna.
3Mi kuttang i na um le ningzahnak
na in kha an in hmuh lai,
salnu bantukin hnipuan loin na um
kha an in hmuh lai.
Teirul kan cham lai i ahohmanh nih
an ka kham kho lai lo,” a ti.
4Israel Pathian thiang nih
a kan luatter —
a min cu Lianngan Bik Bawipa a si.
5 Bawipa nih Babilon cu a thawh i,
“Dai zuar in ṭhu ko cang law
a muihnak ah khan um ko;
nangmah cu, miphun tampi hna
bawinu, an in ti ti lai lo.
6Ka mi hna cungah khan ka thin
a rak hung i
ka mi a si ti lomi bantukin
ka rak tuah hna.
Annih cu na kut chungah ka chiah
hna i an cungah zaangfahnak
zeihmanh na ngei lo,
an tar pipi hmanh, hrang ngaiin
na rak ti hna.
7Siangpahrang bawinu ka si zungzal
rua lai tiah naa ruat i
hi thil hi na lung tak in na rak ruat
bal hna lo,
zeitindah an dongh te lai ti zong
kha na rak ruat bal lo.
8Nang, nuamhnak a duhmipa,
hi bia hi ngai tuah,
him te le hnangam tein ka um,
tiah na ruat.
Pathian tluk ngan ah naa ruat i
keimah bantuk ahohmanh
an um lo, tiah na ruah.
Zeitikhmanh ah nuhmei cu ka si bal
lai lo tiah na ruah i
fale thihloh ka ing bal lai lo na ti. #Biat 18.7-8
9Asinain chikkhatte ah, ni khatte ah,
hi thil hi an pahnih in na cungah
an tlung lai.
Camh cu zeizat hmanh na hmang
ko lai nain
na fale cu an thi ṭhiamṭhiam ko lai i
nuhmei cu na si ṭhiamṭhiam
ko lai.
10“Na ṭhat lonak chungah hnangam in
na um ko;
ahohmanh nih an ka hmu lo, tiah
na ruah.
Na fimnak le na hngalhnak nih
a pingah an in hruai i
nangmah le nangmah cu, ‘Pathian ka si —
keimah bantuk midang ahohmanh
an um lo,’ naa ti.
11Vanchiatnak kha na cungah
a tlung lai i
na camh nih khan an khamh
kho lai lo.
Hmakhatte ah na cungah rawhralnak
a tlung lai —
na mang hmanh i na manh bal lomi
rawhralnak kha a tlung lai!
12“Na camh le na eih vialte kha i
chiah hna; na no lio tein na hman
zungzalmi an si.
A bawmh zong an hei in bawmh
khawh ko hnga dahkaw,
na ral kha an thin zong na hei
phanter khawh ko hna
hnga dahkaw!
13Ruahnak an in cheu nain zeihmanh
na tuah kho hlei lo.
Ruahnak an petu hna cu hmaiah
ra chuak hna seh law in khamh
tuah hna seh —
arfi kong kha a cawng i van kha
a bu a bu in a ṭhen i
thla khat hnu thla khat in na cung i
a tlung ding vialte
an chim khotu ding hna nih cun,
in khamh tuah hna ngat seh.
14“Annih cu capawl pelpawi
bantuk men an si lai i
mei nih a kangh dih hna lai.
Anmah le anmah hmanh an i khamh
kho lai lo.
Mei cu toh nuam mei men
a si lai lo,
an ca i a lin tukmi mei a si lai.
15Nan chan chung vialte ruahnak nan
hal zungzalmi arfi zohthiam hna nih
ruahnak an in pekmi hna i an in
phakpi hna laimi cu hihi a si ko.
An dihlak in an in kaltak hna lai i
an duhnak cio paoh ah khan
an kal lai, nanmah khamhtu ah
a tangmi pakhat hmanh an um
lai lo,” a ti.
Currently Selected:
ISAIAH 47: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
