ISAIAH 49
49
Miphun Dang Hna Caah Ceunak
1Lamhlatpi i a ummi miphun hna,
ram hlapi i a ummi hna,
ka bia ngai tuah u.
Ka chuah hlan in Bawipa nih a ka thim
i a sal si awkah a ka fial. #Jer 1.5
2Ka bia cu vainam bantukin a harter,
a kut hrimhrim in a ka huhphenh.
Cantiang bantuk ah a ka ser i
a thalbawm chungah a ka sanh. #Heb 4.12; Biat 1.16
3A ka thawh i,
“Israel, nangmah cu ka sal na si;
nangmah ruangah mi nih
an ka thangṭhat lai,” a ti.
4Kei nih ka thawh i,
“Ṭuan cu ka ṭuan ko, sihmanhsehlaw
ka ṭuanmi cu san a tlai lo.
Ka thazang cu a dih umnak in
ka hman, sihmanhsehlaw zeihmanh
ka tlamtlinh lo,” ka ti.
Asinain Pathian nih thil cu a ṭhatter
ko lai tiah ka zumh i
ka ṭuan man kha a ka pek ko lai.
5Ka chuah hlan in Bawipa nih a ka fial;
a mi cu kirpi ṭhan hna awkah le
aa ṭhekmi Israel mi kha pumh ṭhan
hna awkah, a sal ah a ka ser.
Bawipa nih upatnak a ka pek;
amah cu ka thazang hrampi a si.
6 Bawipa nih cun a ka thawh i,
“Ka sal, nangmah caah rian
ngan deuh chin ka ngei;
Israel mi chungin a tangmi hna kha
lianhngannak ah phakter ṭhan
lawng si loin,
Nangmah cu miphun hna ca ceunak
ah kan ser lai —
cuticun vawlei dihlak nih
khamhnak a hmuh lai,” a ti. #Isa 42.6; Luk 2.32; Lam 13.47; 26.23
7Miphun kip nih fak piin an serhsat i
an huat i,
uktu hna sal a simi cu,
Israel Pathian thiang le khamhtu nih,
“Na luat kha siangpahrang nih
an in hmuh lai i
nangmah upatnak pek awkah
an tho lai;
bawi zong nih an in hmuh lai i
nangmah upatnak pek awkah
niam ngaiin an kun lai,” a ti.
Bawipa, Israel Pathian thiang nih
a sal cu a thim cang i
a biakamnak cu a zulh caah,
hi thil cu a tling lai.
Jerusalem Remh Ṭhan A Si Lai
8 Bawipa nih a mi cu a thawh hna i
“Nanmah khamhnak caan kha
a phak tikah,
kan dawt hnanak kha ka langhter
lai i bawmhnak nan ka hal i nan
aunak kha kan leh hna lai.
Nanmah cu kan ven kan huhphenh
hna lai i
nanmah thawngin mi vialte he
biakamnak ka ser lai.
Atu lio i a rawk dihmi nan ram ah
khan kan umter ṭhan hna lai. #2Kor 6.2
9Thongtlami cu, ‘Chuak u,’ ka ti hna
lai i muihnak chung i a ummi cu,
‘Ceunak ah hung chuak u,’ ka ti
hna lai.
Annih cu tlang cung i a tlongmi tuu
bantuk an si lai;
10zeitikhmanh ah an ti a hal lai lo i
an rawl a ṭam lai lo.
Ni lin le thetse lin nih retheihnak
a pe hna lai lo,
zeicahtiah annih cu anmah a dawtu
hna nih khan a hruai hna lai.
Cerhti umnak hmun ah khan
a hruai hna lai. #Biat 7.16-17
11“Tlang lakah cun lam nganpi
pakhat ka ser lai i
ka mi hna kalnak ding caah cun
lam pakhat ka sial lai.
12Ka mi cu lamhla pipi in
an ra lai i chaklei le nitlaklei in
an ra lai, thlanglei i a ummi Sai-en#49.12 Sai-en (Syene) khua hi Izipt ram thlanglei kap i a ummi a si i Judah mi tampi an rak umnak khua a si.
khua in an ra lai,” a ti.
13Van hna, hlasa tuah u! Maw vawlei,
lunglawmhnak in au tuah!
Tlang cu lunglawmhnak in
au hna seh.
Bawipa nih a mi cu a hnemh cang hna lai;
retheihnak a ingmi a mi cu
a zaangfah cang hna lai.
14Sihmanhsehlaw Jerusalem khuami
nih cun an i thawh i,
“Bawipa nih a kan hlawt cang!
A kan philh cang!” an ti.
15Cucaah Bawipa nih a leh hna i,
“Nu nih a fa cu a philh kho
hnga maw?
A chungchuak cu daw loin
a um kho hnga maw?
Nu nih hin cun a philh hmanh
a philh kho hnga,
sihmanhsehlaw kei nih cun
kan philh bal hna lai lo.
16Jerusalem, nangmah cu
kan philh kho bal lai lo,
na min cu ka zapei cungah
kaa ṭial cang.
17Nangmah an remh ṭhantu ding cu
an ra dengmang cang,
nangmah an hrawktu cu
an kal zau lai.
18Na pawngkam kha zoh law zeidah
a um ti kha ngia tuah.
Na mi cu an i pum cuahmah cang —
inn ah an ra tlung lai.
Keimah cu a nungmi Pathian ka si
hrimhrim bangin,
nang zong na mi cu naa chawr
hrimhrim hna lai;
va ngeika ngaknu nih a hlawn
aa chawr bantuk khin
naa chor ve hna lai!
19“Na ram cu a rak rawk dih i
pakpalawng ah a rak cang dih,
sihmanhsehlaw atu cu, a chung um awk i
a ra dingmi hna caah a hme tuk
cang lai.
Nangmah cu rawk relrul in
an kaltaktu hna kha na sinin
lamhlapi ah ṭhial an si cang lai.
20Sal i na tan lioah a chuakmi
na fale hna nih,
ni khatkhat cu an in thawh lai i,
‘Hi ram hi kan caah a bi tuk cang,
umnak ah hmun dang kan herh,’
an ti lai.
21Cun nangmah le nangmah cu,
‘Aho nih dah mah hna hi
a ka hrinpiak?
Ka fale cu an rak thi cang i fa dang
ka ngeih ti ṭung hna lo.
Kei cu sal ah pei ka tan cu, mak pei
ka si cang cu —
hi fale hi aho nih dah
a rak zohkhenh hna?
Keimahte lawng pei an rak
ka nganh kha — hi fale hna hi khuazei in dah
an rat hnga?’ naa ti lai,” a ti.
22 Bawipa Pathian nih a mi cu a thawh hna i,
“Miphun dang hna cu hmelchunhnak
ka pek hna lai i
nan fale cu inn ah an ratpi hna lai.
23Siangpahrang cu nan caah nan pa
bantuk an si lai i
siangpahrang bawinu hna nih cun
hringtu nu bantukin an in
umh hna lai.
Nan hmaiah niam ngaiin an kun lai i
upatnak an in pek hna lai;
nanmah an in hmaizah hnanak cu
an langhter lai.
Khi tikah Bawipa ka si cu nan hngalh
lai i keimah bawmhnak a hngakmi
paoh cu a khel hna lai lo,” a ti.
24Ralkap bu cu an hranchaw kha
nan chut kho hna maw?
Bawi ṭhawng cu a thongtla hna kha
nan chut kho hna maw?
25 Bawipa nih hi bia halnak cu a leh i,
“Cu bantukte cu a um laimi thil hi
a si.
Ralkap nih an tlaihmi hna thongtla cu
an chuak lai i
Bawi ṭhawng cu a hranchaw kha chuh
a si lai.
Nanmah an dotu hna paoh cu ka doh
hna lai i
nan fale cu ka chuah hna lai.
26Nanmah an hremtu hna cu anmah
le anmah kha ka thahter hna lai,
lainawn le thinhun kha a rit in
an i rit chih lai.
Cu tikah mi vialte nih Bawipa
ka si kha an hngalh lai i,
nanmah an khamhtu hna le
an luattertu hna ka si kha
an hngalh lai.
Keimah cu Israel Pathian ṭhawng
ka si kha an hngalh lai,” a ti.
Currently Selected:
ISAIAH 49: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
