EZEKIEL 18
18
1 Bawipa nih a ka thawh i, 2“Mi nih Israel ram chungah an chim lengmangmi phungthlukbia ‘Hringtu nu le pa hna nih mitsur thei thor an ei i an fale ha a za,’ an rak timi kha a sullam zeidah a si? 3Ka nun bangin ka chim, tiah Bawipa Pathian nih a ti, hi phungthlukbia hi zeitikhmanh ah Israel ram chungah hman a si ti lai lo. 4A nungmi paoh cu keimah ta an si dih, an hringtu nu le pa si hna seh, an fale si hna seh, an dihlak in ka ta an si. A sualmi paoh cu a thi ko lai.
5“A dingmipa, a dingmi thil le a hmaanmi thil a tuahmipa kha ruat hmanh. 6Khuahrumbo ah khan rawl a ei bal lo, Israel mi siasal kha a zohcho bal hna lo i midang nupi sinah a sual lo i nu kha an hnisuk lioah a naih bal hna lo. 7Ahohmanh a hrem bal hna lo i leibatu nih biakamnak ca i thil an pekmi kha a khirh zungzal hna, zeitikhmanh ah mi a ramh bal lo. Rawl a ṭammi kha rawl a pek hna i hnipuan a ngei lomi kha hnipuan a pek hna. 8A miak lak in siseh, a karh in siseh, tangka a cawih bal hna lo. 9Dinlonak kha a hrial i pakhat le pakhat karlak ah aa buaktlak tein a um. Ka nawlbia kha a zulh hna i ka phungbia kha fel tein a tuah hna. Cu bantuk mi cu miding an si: amah cu a nung lai, tiah Bawipa Pathian nih a ti. #Lev 18.5
10“Amah nih cun fapa pakhat a ngeih ko hnga i a fapa cu zaang-en hmangmi, lainawng, hi nawlbia zeihmanh i a rel lomi a si ko hnga. 11Hi nawlbia hi pakhat hmanh a zul lomi, khuahrumbo ah rawl a ei i 12midang nupi sinah a sualmi, vanchiami le sifakmi kha a hrem i miramh a hmangmi, leibatu nih biakamnak ca i thil an pekmi a khirh lomi, siasal kha a zohcho i fihnung phung kha a tuah vemi, 13a miak le a karh in lei a cawihmi, hi bantuk mi cu a nung lai lo. Hi thil fihnung vialte hi a tuah hna caah a thi lai i a thisen kha a lu cungah a tla ko lai.
14“Hi miṭhalopa nih hin fapa a hei ngeih ve ko hnga i cu a fapa nih cun a pa sualnak vialte cu a hmuh dih ko hna hnga; a hmuh cu a hmu ko hna hnga nain pakhat hmanh a tuah hna hnga lo. 15Khuahrumbo ah rawl a ei bal lo, Israel mi hna siasal kha a zohcho bal hna lo, midang nupi he a sual bal lo. Mi kha a hrem hna lo, biakamnak thil kha a la lo i a fir lo. 16A rawl a ṭammi kha rawl a pek hna i hnipuan a ngei lomi kha hnipuan a pek hna. 17Biadinglo kha a hrial i a karh in siseh, dongtanh in siseh phaisa a cawih bal hna lo. Ka phungbia kha a zulh hna i ka nawlbia kha a tuah hna. Cu bantuk mi cu a pa sualnak ruangah khan a thi lai lo; a nung ko lai.
18“A pa cu mihremhmang le miramhhmang a si ko hnga i a rualchan lakah khan nuncan ṭhalo in a nungmi a si ko hnga i a ṭhat lo ruangah cun a thi ko hnga. 19Nannih nih nan i thawh hnga i, ‘A pa sualnak ruangah khan zeicahdah a fapa kha dantat a si lo?’ nan ti hnga. Zeicahdah dantat a si lo ti ahcun, a dingmi le a hmaanmi thil kha a tuah zungzal i ka nawlbia kha ralring tein a zulh hna caah a si, cucaah cun a nung lai. 20A thi ding cu midang si loin a sualmi kha a si lai; a fa nih a pa sualnak kha aa hrawm lai lo, a pa zong nih a fapa sualnak kha aa hrawm lai lo. Miding mi nih a dinnak theitlai kha a hmuh lai i miṭhalo nih a ṭhat lonak theitlai kha a zun ve ko lai. #Deu 24.16
21“Cun miṭhalopa nih a ṭhat lonak vialte kha a hlawt hna hnga i ka nawlbia vialte kha a tuah hna hnga i a dingmi le a hmaanmi thil kha a tuah ko hna hnga. Cu pa cu a nung lai; a thi lai lo. 22A tuahmi ṭhat lonak vialte kha philhpiak a si lai i dinnak a tuahmi ruangah khan a nung lai. 23Miṭhalo mi thih cu maw ka duh? A ziaza kha aa remh i a nun kha ka duhmi a si deuh lo maw? tiah Bawipa Pathian nih a ti.
24“Cun miding mipa nih a ziaza ding kha a hlawt ko hnga i miṭhalo mipa nih fihnung a phunphun a tuahmi kha a tuah ve ko hnga; mah hihi tuah buin a nung ko hnga maw? Nung hlah, dinnak a rak tuahmi vialte kha hngalhpiak a si lai lo; zumhawktlak loin a nung, a sual i cucaah cun a thi lai. 25Bawipa nih zulhmi phunglam ngei setsai lo in rian a ṭuan, nan ti. Israel mi hna ngai hmanh u, phunglam ngei loin a tuahtu cu nanmah nan si, keimah ka si lo. 26Miding mipa nih a dinnak a mertak i ṭhat lonak lam ah khan a kal i a thih ahcun, a thih cu, cu ziaza ṭhalo a tuah ruangah cun a si lai. 27Cu bantukin miṭhalo mipa nih a ṭhat lonak kha a kaltak i a dingmi le a hmaanmi kha a tuah ahcun a nunnak kha a khamh lai. 28A sualnak kha an sining tein a hmuh hna i a hnulei a mertak hna ahcun, a nung lai, a thi lai lo.
29“Israel mi nih nan i thawh i, ‘Bawipa nih phunglam ngei loin a tuah,’ nan ti. Asilo, phunglam ngei loin a tuahmi cu nanmah Israel mi nan si, keimah ka si lo. 30Cucaah cun maw Israel mi hna, Bawipa Pathian nih hitin a ti: Ahohmanh nanmahle nan tuahnak cung cio ah bia kan ceih hna lai. Nan ṭhat lonak khan i mer cang ko sawh u, cu ti a si lo ahcun nan ṭhat lonak kha nan tluknak a si lai. 31Thil ṭhalo nan tuahmi kha hlonh hna u law lungthin thar le thlarau thar i lak u. 32Zeicahdah nan thih lai ee, Israel mi hna? Ahohmanh nan thih cu ka duh ṭung lo, tiah Bawipa Pathian hrimhrim nih a ti,” tiah a ti.
Currently Selected:
EZEKIEL 18: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
