EZEKIEL 17
17
Mupi Pahnih le Mitsur Ruang
1Mah hihi Bawipa nih ka sinah a chimmi bia cu an si; a ka thawh i, 2“Mipa, Israel mi cu tahchunhnak bia le tuanbia in chim hna,” a ka ti. 3Hihi Bawipa Pathian bia cu a si: “Mupi nganpi, pakhat a hmul aa dawh ngaingai i, thla ngan pipi a ngei i a thla kaupi in a samhmi a rak um. Lebanon tlang ah khan a va zuang i Sidar kung a hluai kha a khiah i
4Chawleh chawhrawlnak ram ah
a zuanpi i chawdawrmi hna
khua ah khan a chiah
5Cun Israel ram khan mitsur ruang
note pakhat kha a lak i
a ṭhantertu dingah ti a um
zungzalnak vawlei ṭhatnak
hmun ah khan a phun.
6Mitsur ruang note cu a hnah
a hun corh i niam tein hmun
kaupi ah a zam i mitsur ruang ah
a hung cang.
A nge hna cu mupi leiah khan
an ṭhang i a hram hna cu thuk
piin vawlei ah khan an lut.
Mitsur ruang cu a hnah kha
an hung tam i a ruang kha
an khuh dih.
7Mupi dang pakhat a um ve i thla ngan pipi a ngei i a hmul zong a chah ngai. Cun mitsur ruang nih khan a um lionak dum nakkhan ti tam deuh a ka pek khawh lai tiah a ruah caah mupi leiah cun a hram le a ṭe cu a mer hna.
8A ngaingai ti ahcun, mitsur ruang kha vawlei a ṭhatnak ti a tamnak hmun, a hnah tampi a ngeih khawh i thei tampi a tlai khawh i mitsur ruang ṭha a si khawh nakding hmun ah khan cin a si ko cang.
9Cucaah Bawipa Pathian bia hihi a si tiah chim hna: hi mitsur ruang hi a nung kho in a ṭhang kho ngai lai maw? Mupi pakhatkhat nih khan a hram in a bongh i a thei kha a zun dih hna lai lo maw? A nge kha a khiak hna in an car dih lai lo maw? Cuti i phawinak dingah cun thazang ṭhawng tuk zong a herh lai lo i miphun ṭhawngpi zong a herh lem lai lo. 10Phun cu phun a si ko cang, asinain a nung in a ṭhang lai maw? Nichuahlei thli nih hranh in a car ko hnga lo maw? A umnak hmun ah cun a car hnga lo maw?” a ti.
11 Bawipa nih cun a ka thawh i, 12“Ralthawh hmangmi hna kha, hi bianabia sullam hi nan hngal maw? tiah hal tuah hna. Babilon siangpahrang kha Jerusalem ah a ra i an siangpahrang le a bawi pawl kha Babilonia ah a kalpi hna tiah chim hna. #2Sia 24.15-20; 2Cha 36.10-13 13Siangpahrang tefa hna chungin mi pakhat kha a lak i amah he cun biakamnak a tuah i zumhtlak in ka um lai tiah bia a kamter. 14Ram cu a ṭhawn ṭhan khawh nakhnga lo le, biakamnak kha a zulh taktak nakhnga ramchung upa kha sal ah a hruai hna. 15Asinain Judah siangpahrang kha ral a tho i rang le ralkap tampi hal awkah Izipt ram ah khan lamkal a thlah hna. Cu bantuk mi cu a hlawh a tling kho hnga maw? Hi bantukin a tuah caah rawhnak cu a luat kho lai maw? Biakamnak kha hrawk in a luat kho hnga maw? 16Ka nun bangin ka chim, tiah Bawipa nih a ti: Cu siangpahrang cu siangpahrang ṭhutdan cungah a ṭhuttertupa ram chungah khan a thi lai; bia aa kammi kha zei ah a rel lo i chiat aa serhmi a let ṭhanmi cu Babilon ah khan an thi lai. 17Mi tampi thihnak ding caah raltuknak chuntlung le kahcham tampi a sermi Babilon mi hna kut chung khan Izipt siangpahrang ralkapbu ṭhawng hmanh nih an chanh kho lai lo. 18A chiatsermi le a biakammi kha a let ṭhan hna. Hi thil vialte cu a tuah hna, atu cu an luat ti lai lo.
19Cucaah hihi Bawipa Pathian bia cu a si. A thawh i, “Ka nun bangin ka chim, keimah min chalh in chiat a sermi kha zei ah a rel lo i aa let caah dan ka tat lai. 20Sur rap ka chiah lai i aa foih lai. Ka cungah zumh awk tlak in a um lo caah Babilon ah ka kalpi lai i khika ah dan ka tat lai. 21A ralkap ṭhawng bikbik hna cu raltuknak hmun ah an thi lai i a nungmi a taangmi hna cu a kenkip ah an i ṭhek dih lai. Cun khi tikah keimah Bawipa nih hi bia cu ka chimh ti kha nan hngalh lai, tiah a ti.
Pathian Nih Ruahchannak A Kamh Hna
22Mah hihi Bawipa Pathian bia a si:
Keimah zong nih sidar thingkung
a hluai pakhat kha ka lak ve lai i
tlang sang pakhat cungah
ka phun lai.
23Israel tlang sang bik ah ka phun lai.
Nge tampi a hun ngei hna lai i
thei an tlai hna lai i
sidar thing dawh ngaingai ah
a cang lai.
Cuka ah cun va a phunphun kha
an um lai i a thladem ah khan
khua an sa lai.
24Ram chung thing vialte nih khan,
Keimah cu Bawipa ka si kha
an hngalh lai.
Keimah nih thingkung a sangmi kha
ka hau hna i
thingkung a niammi kha
ka santer hna i
a romi kha ka hrinter hna.
Hihi Bawipa nih ka chim i ka tuah lai, tiah a ti.
Currently Selected:
EZEKIEL 17: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
